Read icen AMatiyu 17 Bible Online

AMatiyu 17 - icen bible

AMatiyu 17

¹Ama nkɔs karataat, aYeso sok aBitrus nɛ aYakubu nɛ aYohana arunyining aYakubu me, ba tsɛ ba ngarak ihwyanang iratek ikak, ba tsɛ ba sot azɔng zɛɛt ba.

²Wat ba di nse wu kpa shesheng na yisi bá. Ayisi wu ron tɛ kunom, ares wu gyɛs tɛ mgbey irong.

³Bafi imɛɛs wu bataat e, zɛngɛ ba wat ba di atan aMusa nɛ atan aIliya ku wuruk, ba tsin cɛɛt nɛ aYeso.

⁴Wat aBitrus fɛ̀ nɛ aYeso, “ATisa, i se yɛɛt ni in sot yit azeng. Ki ngɔn shim a, in da nok yit abut ataat azeng, kuzining nek ngɔn, kuzining nek aMusa, kuzining nek aIliya bà.”

⁵Na tsin rēn cɛɛt, anɔk akan wat a ka ba te gyip, ba fok kutɔ ayɛt anɔk e yɛ, “Arim hom yong, a yɔng fi in kushim, ni iwu fi in di bi itɛrɛk iyɛ makiyi. Fok yin ifɛ̀ wu!”

⁶Ni izen fɛ́ bafi imɛɛs e fok anɔng, ba kpa na ayisi gup aben nek nnyim.

⁷Awɛt aYeso bɛ́ a ka ba raas, wɛt a fɛ̀ ni iba, “Dorok yin! I bi fok yin nnyim awo.”

⁸Ni izen fɛ́ ba sok ace naton, ba di vit akak azɔng nkum aYeso kyɛk.

⁹Ni izen fɛ́ ba se ni itisik sak aben ihwyanang e, aYeso fɛ̀ ni iba, “Da i bi tak yin akak ikyɛng fi i di yin ninyen awo, tit ama fɛ́ ba mi dorok Arim Anet ni iku.”

¹⁰Bafi imɛɛs e ku rip yɛ, “Akyɛ sak fɛ́ bafi itees ntsi aMusa nye fok, i se gbing-gbing ma aIliya tung bɛ́ ninyen ɛ?”

¹¹AYeso ka ba bun ni ifɛ̀ yɛ, “AIliya mi bɛ̀, nɔng a da nye nkyɔrɔk fi in mi beseng.

¹²Awɛt imi fɛ̀ ni yin, aIliya man na a bɛ́, wɛt banet nɛ ba kurēn awo, iba ku nyes ikyɛng fɛ́ ba shim. Kpaf anɔng fɛ́ Arim Anet da sɔ izot ni mbɔk bá.”

¹³Ne anɔng wu, fɛ́ bafi imɛɛs wu di rēn fok a se ni icɛɛt naton aYohana anet abatisma.

¹⁴Fɛ́ ba tsɛ ba ta narɔ kudyɛng banet e, anet akak bɛ́ ne aYeso, a te gururuk ashon wu.

¹⁵A fɛ̀ ni wu, “ATisa, fok angmishish arim hom, a kus itsitsiring, a sɔ izot makiyi. A tɛn na kpa ni rong, ni izen ikak na kpas na ashi.

¹⁶I mi bɛ́ ni wu na bafi imɛɛs ngɔn, awɛt ba kyem ba ku te kyang awo.”

¹⁷AYeso fɛ̀ ni iba, “Iyin bafi kuzam kang, fi i se yin vit inɔɔk atsak, ni kana boroso yin, sak akyɛ kuri izen fi in da woso tsesek ni iyin ɛ? Bɛ́ yin ni nggon e aze.”

¹⁸AYeso gyɔng itseng e, i wuruk ayɛt nggon e, nkum izen e yɔng, nggon e wat ka te kyang.

¹⁹Ama anɔng, bafi imɛɛs e tsɛ narɔ aYeso ni nɛt, ba ku rip yɛ, “Akyɛ sak itseng e ki gaat yit itun e yɛ?”

²⁰AYeso fɛ̀ ni iba, “Nek inɔɔk atsak yin yet ibaane. Won in ki tak yin atsak, ki inɔɔk atsak yin yet ibaane ti kica amusta, i da kyem i fɛ̀ yin ni ihwyanang yɛ, ‘Serek aze sak aza’ I da serek. Vit ikyɛng fi i da ki gaat yin.”[14]

²²Ni izen fɛ́ banet ngma kusum tsɛ ba nyim na aGalili, a fɛ̀ ni iba, “Ba da nabak Arim Anet ni bɔk banet,

²³ba da ku fɛt, ni kunom kufɛ́ ataat, ba bi ku donong ni kutset.” Bafi imɛɛs wu beseng iyɛ makiyi.

²⁴Ama fɛ́ aYeso nɛ bafi imɛɛs wu tsɛ ba ta na aKafarnahum, bafi ishashang itsɔm mben nek inok kutu iya Adakunom ntong, tsɛ ba sɛ aBitrus ba fɛ̀ ni wu, “Anet itees yin tarasa itsɔm mben awɛ?”

²⁵A fɛ̀ ni iba, “Ey, a tarasa.” Ni izen fɛ́ aBitrus tsɛ a nɔ ari, aYeso wu a tung fɛrɛng, “ASiman, ngɔn di anɛ? Bangan bá ba tarasa bágwɔm itsɔm inɔɔs ni itsɔm mben ɛ? Ayet nnon mben e ya? Ke banet baduk ɛ?”

²⁶ABitrus fɛ̀ ni wu, “Na baduk.” AYeso fɛ̀ ni wu, “A sot nnon mben e tarasa awo.”

²⁷Kɔn in bi ka ba beseng yit iyɛ, tse ni ikang, i da tsi barak iguk ngɔn. Ìzos yɔng fi i da tun yit, tarak kanu yɛ, i da sɛ kuta itsɔm kukan, tun iko, tsi ki tarang yit mo itsɔm inok kutu iya Adakunom ntong e, ifɔɔn ni inaan.