Read icen AMatiyu 2 Bible Online

AMatiyu 2 - icen bible

AMatiyu 2

¹Ama kutes aYeso na aBatalami ni mben aJudiya, na aHiridus tsin yet agbat agwɔm ni izen e yɔng. Banet kutsik irēn nse ádat, tsɛ na aRushelima,

²ba se ni irisim, “Ayɔng fɛ́ ba tes fɛ́ ayet agwɔm baYahuda me se kɛ? Iyit di yit àdat wu abatin, in bi in ku ya yit ntong.”

³Fɛ́ agwɔm aHiridus fok anɔng, a nɔ kudaam, gung nɛ banet aRushelima.

⁴Ama fɛ́ a mi tusung ngma bagbat áware, nɛ bágwɔm irēn ntsi aMusa, a ka ba rip karɔ fɛ́ ba fɛ̀ ba di ki tes Anet-Isheshek e.

⁵Ba fɛ̀ ni wu, “Ni wɔp aBatalami ni mben aJudiya, nek ikyɛng de fɛ́ atan e kin jɛk,

⁶‘Awɛt ngɔn aBatalami, ni mben aJudiya, ngɔn wu i rat awosong ayɛt bágwɔm mben aYahuda awo; nek ayɛt ngɔn wu fɛ́ agwɔm akak bi di ne, ayɔng fɛ́ a bi yet anek banet aIsrela.’ ”

⁷AHiridus yes banet kutsik irēn nse ádat e ni nɛt, a shim a rēn akpaf izen fi iba di di àdat e.

⁸A ka ba tom sak na aBatalami me, a fɛ̀ ni iba, “Tseng yin, tsi tsɛt yin nggon e yelel. Nɔng ki i sɛ yin ika, ni bi ni di tak yin, nɔng in da tsin in ka ka ya ntong.”

⁹Ama fɛ́ ba ma fok ifɛ̀ agwɔm e, ba yit irèn, àdat e yɔng fɛ́ ba di iwu abatin, a ya kashon ni itseng ashon ba, a tsɛ a nyeseng narɔ fɛ́ ba di tes nggon e.

¹⁰Ni izen fɛ́ ba tɛ ba di àdat e, ba nye iyɛ ikan hwyɛ awo.

¹¹Fɛ́ ba nɔ ari me, ba di nggon e ni nggɔ ka aMarya, ba te gururuk aben, ba ka ka ya ntong. Ama anɔng, ba tarak amala bá, ba nɔɔk kunang nkyɔrɔk itsɔm hwyɛ wo, ata asɛng, aluban nɛ amur[1].

¹²Ba tɛ ba bun sak ni wɔp bá; ba kuus irèn ikak zɛɛt, nek Adakunom mi tsang ka ba kɔrɔk kuto na nabos, yɛ da na ba tɛ ba got narɔ aHiridus awo.

¹³Ama fɛ́ batsen e mi tseng, aTisa tom atomaza akak ne a tak aYusufu na nabos yɛ, “Dorok, sok nggon e ni nggɔ ka hwyet yin sak na aMasat. Di wey yin azɔng ma in ki tak yin, nek aHiridus da kpa itsɛt ika nɔng a da fɛt.”

¹⁴Nek anɔng, aYusufu sok kabang nggon e ni nggɔ ka, ba yit irèn natuk sak na aMasat.

¹⁵Ba sot azɔng sak izen iku aHiridus. Na anɔng fɛ́ ba di shining ikyɛng fɛ́ aTisa kin fɛ̀ nanu atan: “Na aMasat wu in yes ari hom.”

¹⁶Ni izen fɛ́ aHiridus rēn fok banet kurēn nse ádat mi ku sak kyɛw, a kpa fes makiyi, a nɔɔk ifɛ̀ fok na ba fɛɛs ngma nnon namatek e fɛ́ na se nkum ayɛ afaa sak aben, fɛ́ na se ni wɔp aBatalami ni nwɔp in bakat, a sok kpaf izen fɛ́ banet kurēn nse ádat fɛ̀ ni iwu.

¹⁷Na anɔng, ikyɛng fɛ́ atan aIrimiya kin fɛ̀ di shining,

¹⁸“Ba fok nkun banet na Arama, nanak nɛ kafa kawe makiyi. Na aRahila tsin tos nek nnon wu. A rawu dang shan akabɔk, nek na mi kus.”[2]

¹⁹Ama iku aHiridus, atomaza aTisa tonong ice wu sak na aYusufu na nabos na aMasat,

²⁰a fɛ̀ ni wu, “Dorok, sok kabang nggon e ni nggɔ ka, ti bun sak ni mben aIsrela, nek bayɔng fɛ́ ba se ni itsɛt kutset nggon e, ba mi kus.”

²¹Nek anɔng, a dorok a sok nggon e ni nggɔ ka, ba tseng sak ni mben aIsrela.

²²Awɛt fɛ́ a fok yɛ Arkilayus wu a tsin ya igwɔm akatek wu aHiridus ni mben aJudiya, a fok nnyim ibun azɔng, nek ikyɛng fɛ́ ba mi ku tak na nabos, nek anɔng, ba kana kɔrɔk ba tsɛ ba sonong abak aGalili,

²³ba tsɛ ba sot na kabang wɔp fɛ́ ba yes ika aNazaret. Na anɔng ba di shining ikyɛng fɛ́ ba kin jɛk yɛ, “Ba bi ku yes anet aNazaret.”