Read icen AMatiyu 22 Bible Online

AMatiyu 22 - icen bible

AMatiyu 22

¹AYeso tɛ nye banet igorok icɛɛt, a fɛ̀,

²“Igwɔm azanɛn se tɛ agbat agwɔm akak fɛ́ a moon amok iweneng nek ari wu.

³A tom basam wu na ba tse sak na bayɔng fɛ́ ba mi ka ba rini nek amok e, na ba ka ba yes na ba bɛ́, awɛt banet e raba dang tse.

⁴“A tɛ tom basam e bakak sak na bayɔng fɛ́ ba ka ba rini me yɛ nɛ ba ka ba tak fok, ‘In mi gang inye kaakyɛ ifɛ́ amok e: Ba mi tsɛk ámung ni ínyak fi i nɔ makiyi, ba mi gang kaakye. Bɛ́ yin amok kuweneng e.’

⁵“Wat bayɔng fɛ́ ba ka ba rini me di te nhwyɛ ba ni ifɛ̀ me awo, ba ya kashon ni inye ikyɛng fi i se ashon ba kyɛk: Akak tse ni ikɔ wu, akak tse narɔ ijik wu.

⁶Wat ishɛrɛp ba, yisik basam e, ba tsosok zii, ba fɛs iba.

⁷Agbat agwɔm e nye kafa kawe makiyi. Nek anɔng, a tom batsom wu, ba tsɛ ba fɛs bafi ifɛs banet yɔng, ba di kas árong ni wɔp bá me.

⁸“Ama anɔng, agwɔm e fɛ̀ na basam wu, ‘Ba mi gang inye nayak amok iweneng e, awɛt bayɔng fɛ́ ba ka ba rini me, bi ízɔk e awo.

⁹Nek anɔng, di kuus yin agbat irén, yes yin ngma bayɔng fi i kyem i sɛ yin.’

¹⁰Basam e wuru, ba kuus agbat irén, ba tusung ngma banet fɛ́ ba kyem ba sɛ, ngma batek e nɛ aduk e, nek anɔng kutu amok iweneng e shining na batsen.

¹¹“Awɛt izen fɛ́ agbat agwɔm e nɔ, nɔng a da bin di batsen e, a di anet akak azɔng fɛ́ da a te ares fɛ́ a yet afɛ́ amok iweneng e awo.

¹²A ku rip yɛ, ‘Arɔ, ngɔn tsa anɛ fi inɔ azeng, dang te ares fɛ́ a yet afi iweneng ɛ?’ Anet e di wey yuu.

¹³“Wat agwɔm e fɛ̀ nɛ banet itomong wu, ‘Ku rosom yin, mbɔk nɛ atak, da barak yin iwu ni rin amatse, azɔng fɛ́ ba da tos ni ros anyi.’

¹⁴“A yet banet dot fɛ́ ba rini, awɛt gyet fɛ́ ba kasa.”

¹⁵Ama anɔng, BaFarasi tsɛ ba tɔ ikyɛng fɛ́ ba da nye ba di yit aYeso ni ifɛ̀.

¹⁶Ba tom bakak ayɛt bafi ikuus bà nɛ banet-aHiridus na ba tse ni wu, wɛt iba fɛ̀ ni wu, “Anet itees, iyit irēn yit ngɔn yet anet fi i bɛ̀ atsak na anu. Ngɔn tees banet kucɛɛt Adakunom kufɛ́ atsak. Vit ngɔn ni ishim ice, nek banet ngma kusum ba yet ikyɛng izining ashon ngɔn.

¹⁷Ki tak yit ikyɛng fi ngɔn di i se kpaf. Ni ku di ngɔn, ntsi yit fɛ̀ ni in tarasa yit aKaisar agwɔm aRoma itsɔm mben a? Ke Awɛy ɛ?”

¹⁸Wat aYeso mi rēn kuyiring anyas bà, a fɛ̀ ni iba, “Iyin bafɛ́ nanu nafifa, akyɛ sak fi i di tsɛt yin ni inɛn ni ifɛ̀ hom ɛ?

¹⁹Di tonong yin itsɔm fi i di tarasa yin itsɔm mben e.” Ba ku bɛ́ ni ica itsɔm aRoma me,

²⁰a ka ba rip yɛ, “Nawu angan, ni iyerek angan de fɛ́ ba di te naton itsɔm e yɛ?”

²¹Ba fɛ̀ ni iwu, “Na fɛ́ aKaisar.” A fɛ̀ ni iba, “Nɔk yin aKaisar ikyɛng fi iyet ifɛ́ aKaisar, ni nɔk yin Adakunom ikyɛng fi iyet ifɛ́ Adakunom.”

²²Ni izen fɛ́ ba fok anɔng, ikyɛng e wɛt i ka ba te kpɔrɔk, ba ku won, ba tseng.

²³Atuk e yɔng, BaSadusi tse na aYeso. Iba wu ba nye fok vit idoro bafaben.

²⁴Ba tsɛ ba ku rip yɛ, “Anet itees, aMusa kin fɛ̀, ‘Ke akak ku dang tes nnon, i se gbing-gbing arunyining na bereng abining e, a ku tsɛt mo izit.’

²⁵Fok, barɔ bakak kanakataat nin nggɔ bá kin se azeng ni yit, afi imɛsɛng e bɔ abining, a bɛ́ a ku dang nggon, nek anɔng, arunyining bɛ́ a sok abining e.

²⁶Iwu tɛ a di ku anɔng bà dang nggon. Afɛ́ ataat sak afɛ kanakataat bɛ́ ba di sot nɛ abining e, ba di kus anɔng vit kutes.

²⁷Ama me, abining e nɛ a ku.

²⁸Wat ni izen idoro bafaben, abining e bi yet afɛ́ angan ayɛt banet kanakataat yɔng ɛ? Nek kaangan bá mi sot ni wu.”

²⁹AYeso fɛ̀ ni iba, “Iyin wey yin irèn nek vit iyin ni irēn ikyɛng fi kufumung Adakunom fɛ̀ ni kukyem wu.

³⁰Nek izen idoro bafaben, bamatek bi tɛ ba ras nweneng awo, banyining bi tɛ ba tsees nweneng awo. Ba bi sot tɛ batomaza.

³¹Naton idoro bafaben, iyin ki mang fa yin ikyɛng fɛ́ Adakunom kin fɛ̀ ni iyin awɛ? Ba kin jɛk yɛ,

³²‘Imi wu in yet Adakunom aIbrahim, Adakunom aIshaku, nɛ Adakunom aYakub.’ Idɔng tonong yɛ, a yet Adakunom bafi kutset, da afɛ́ bafaben awo.”

³³Ni izen fɛ́ kudyɛng banet e fok itees wu me, ikyɛng e ka ba te kpɔrɔk.

³⁴Ni izen fɛ́ BaFarasi di aYeso mi mees BaSadusi ni kucɛɛt, iba tsɛ ba kana tusung.

³⁵Azining ayɛt ba, fɛ́ a yet agwɔm irēn ntsi aMusa, tsɛ a ku mara ni irip yɛ,

³⁶“Anet Itees, akyɛ agbat-ifɛ̀ fi iwat iratek ngma ayɛt ntsi aMusa yɛ?”

³⁷AYeso fɛ̀ ni iwu, “ ‘Shim Adakunom ni iyɛ ngɔn ngma, ni kutset ngɔn, ni kuyiring ngɔn ngma kusum.’

³⁸Ntsi nang na fi in yet nfɛ́ ashon e, ni in yɔng fi in wat ni iratek.

³⁹Nfɛ́ afaa fi in se ti iyɔng e yet: ‘Shim afidang isot ngɔn ti ice ngɔn.’

⁴⁰Ngma ishɛrɛp ntsi ni ijɛk afumung batan e, nye shɛɛt naton nfaa nang.”

⁴¹Ni izen fɛ́ BaFarasi me mi kana tusung, aYeso ka ba rip yɛ,

⁴²“Iyin di yin tɛ Anet-Isheshek e yet angan ɛ? A yet arim angan ɛ?” Ba fɛ̀ ni iwu, “A yet arim aDauda.”

⁴³A fɛ̀ ni iba, “Wɛt akyɛ sak Kabik te aDauda ku yes aTisa yɛ? Nek aDauda kin fɛ̀ yɛ,

⁴⁴‘ATisa fɛ̀ na aTisa hom: “Sonong aze ni ibɔk iyak hom, ma in sak bafi fa ni ngɔn na ba kpa natak ngɔn.” ’[24]

⁴⁵Ke aDauda kin ku yes ‘ATisa,’ nɛ anɛ fɛ́ Anet-Isheshek e da sot arim aDauda kong ɛ?”

⁴⁶Vit anet fɛ́ a kyem a fɛ̀ na aYeso ikikak. Nkum atuk e yɔng, vit anet fɛ́ a tɛ bɛ̀ agap iyɛ a tɛ a ku rip ikikak.