Read icen AMatiyu 26 Bible Online

AMatiyu 26 - icen bible

AMatiyu 26

¹Ama fɛ́ aYeso mi gang ncɛɛt e yɔng, a fɛ̀ na bafi imɛɛs wu,

²“Kyɔn ti iyin irēn yin, ishɛrɛp nkɔs nfaa ni in nɔ yit ayɛt amok aPasova, ba da nabak Arim Anet ni mbɔk banet, na ba ku tegak nakon.”

³Wat bagbat áware nɛ bashɔn iwɔp, kana tusung na atasa ari agbat-agbat àware fɛ́ ba ku yes aKayafas.

⁴Ba kpa tsɛt irèn fɛ́ ba di ki tekap aYeso nifam, na ba fɛt.

⁵Ba tak ace ba, “In bi ku tekap yit ni izen amok awo, nek banet da ki kpa yit ni ifa.”

⁶Na aYeso resek mo na aBetani ari aSiman fɛ́ a kin tsang yet akparong.

⁷Wat abining akak, tsɛ a ne na name nkɔn ntek ni kitsung alabasta, fɛ́ na bi itsɔm makiyi. Ni izen fɛ́ aYeso se ni kuyak, abining e tsɛ a ku korok name me.

⁸Wat izen fɛ́ bafi imɛɛs wu di anɔng, ayɛ bá beseng, ba fɛ̀, “Akyɛ kuri ibeseng name yɔng anɔng ɛ?

⁹Zɔng ke ba rɛp name nang ni itsɔm dot, nɔng ba bin kaba bakan itsɔm e.”

¹⁰Nek aYeso rēn kuyiring bá, a fɛ́ ni iba, “Akyɛ yet kudaam yin nɛ abining yong ɛ? Iwu mi di nye imi ikyɛng itek.

¹¹Bakan bi gang azeng nate yin awo, awɛt imi di ki nak azeng azatse ni iyin awo.

¹²Name fɛ́ a di korok e ni irɔm, a di nye nɔng ba bin di te mo ni irɛk.

¹³Atsak fi in tsin ki tak yin, kaakɛ fɛ́ ba bi shara ifɛ̀ itek deng azatse, ba bi yiring ni ikyɛng fɛ́ abining yong nye.”

¹⁴Ama anɔng, azining ayɛt kusɔk abe afaa me, fɛ́ ba ku yes aJudas aIskariyoti, a wuruk sak narɔ bagbat áware,

¹⁵a tsɛ a ka ba rip yɛ, “Akyɛ fi i di ki nɔɔk yin, ki in ki nabak yin iwu yɛ?” Iba ku nɔɔk ica atsɔm akan nsɔk ntaat.

¹⁶Nkum izen e yɔng, aJudas nɔ itsɛsɛk irén fɛ́ a di ki nabak aYeso.

¹⁷Ni kunom kufi imɛsɛng amok iya akpam fɛ́ a se vit ayist e, bafi imɛɛs aYeso tsɛ ba ku rip yɛ, “Akɛ fi ngɔn shim in tsin da nye yit e, fi i da tsi i di ya nayak amok aPasova me yɛ?”

¹⁸AYeso fɛ̀ ni iba, “Tseng yin sak ayɛt iwɔp, i da sɛ yin anet akak, fɛ̀ yin ni iwu, ‘Anet itees fɛ̀: Izen hom mi bɛ́ bakat. Imi da ya nayak amok e ari ngɔn nɛ bafi imɛɛs hom.’ ”

¹⁹Wat bafi imɛɛs aYeso me tsɛ ba nye kpaf ikyɛng fɛ́ a ka ba tak, ba nye kuyak amok aPasova me.

²⁰Ni izen fɛ́ kahwyɛ nye, aYeso tse narɔ iyak nɛ bafi imɛɛs wu kusɔk abe afaa me.

²¹Izen fɛ́ ba se ni kuyak, a fɛ̀ ni iba, “Atsak fi in tsin ki tak yin, azining ayɛt yin di ki rɛp.”

²²Ba nɔ kudaam makiyi, ba kpa ku risim bazizining, “Ka! ATisa, ngɔn di ti imi wu yɛ?”

²³AYeso fɛ̀ ni iba, “Anet yɔng fɛ́ a tsin tes kubɔk ni itsɛn gung ni imi, iwu fɛ́ a di ki rɛp.

²⁴Arim Anet da tseng kpaf tɛ fɛ́ ba kin di jɛk, awɛt kawɛy se naton anet yɔng fɛ́ a di ki rɛp! I da sot anet e, kaduk ke da ba kin ku tes awo.”

²⁵Wat aJudas fɛ́ a da rɛp aYeso me fɛ̀, “Ka! ATisa, ngɔn di ti imi wu yɛ?” AYeso fɛ̀ ni iwu, “Ngɔn mi fɛrɛng.”

²⁶Ba se ni iya kuyak, aYeso sok akpam, a di nɔɔk ifeng sak ne Adakunom, a bushung akpam me, a nesek bafi imɛɛs wu, a fɛ̀, “Nga yin, ya yin, kurɔm hom kang.”

²⁷Wat a sok kitsɛ̀n ashi me, a di nɔɔk ifeng sak ne Adakunom, a sok a ka ba nɔɔk, a fɛ̀, “Sɔ yin, ngma yin.

²⁸Nasok hom nang na fi kushi, fɛ́ ba da nosong nek ifuut anɛn banet dot.

²⁹Won in ki tak yin, imi bi ti in sɔ ashi anap nang awo, tit ma atuk fi in bi sɔ afas gung ni iyin ni igwɔm aDa hom.”

³⁰Ama fɛ́ ba ra abom, ba wuruk sak ni Ihwyanang Ifat.

³¹Wat aYeso fɛ̀ ni iba, Atut natuk kang, ngma yin i da teng yin i di won yin, nek i se ni ijɛk, “ ‘In da rus anek e, kukpara me da te sharatat.’

³²“Ama fɛ́ ba di dorok ni irɛk, imi bi tung tseng sak na aGalili aza yin.”

³³Wat aBitrus fɛ̀ ni iwu, “Ke ngma ba ba teng nek ikyɛng fi i da te ni ngɔn, imi da teng awo.”

³⁴AYeso fɛ̀ ni iwu, “Atsak fi in tsin da tak, natuk atut, na atsanyon resek dang tɛp, ngɔn di ki toon ite kataat.”

³⁵Awɛt aBitrus fɛ̀, “Ki in da ku, imi da ka toon awo.” Ngma ishɛrɛp bafi imɛɛs e fɛ̀ anɔng bà.

³⁶Ama anɔng, aYeso nɛ bafi imɛɛs wu, ba tseng narɔ kakak fɛ́ ba yes ika yɛ aGetsemani, a fɛ̀ ni iba, “Tsing ra di sonong yin azeng ninyen, imi da serek aza, in da ra awon.”

³⁷A sok aBitrus ni nnon aZebedi nafaa, aYakubu nɛ aYohana, a nɔ kudaam ni ibeseng iyɛ.

³⁸Wat a fɛ̀ ni iba, “In bi kudaam ni iyɛ ti ku di ki fɛt. Sot yin azeng, in da tot yit gung.”

³⁹A bang serek ashon, a kpa na ayisi aben, a ra awon, yɛ, “Ada hom, ki i da nye, won na ba sok kitsɛ̀n mgbang kang ashon hom. Ngma na anɔng, da kushim hom awo, won kufɔɔn ni ku sot.”

⁴⁰Ama anɔng, a tɛ bun sak narɔ bafi imɛɛs wu, a tsɛ a ka ba sɛ ni nda. A rip aBitrus, “Iyin da kyem itot yin nfi igip izining awɛ?”

⁴¹“Tosok yin ace yin, ni ras yin awon, kɔn i bi kpa yin ni imara. Kabik shim, awɛt kurɔm se gbɛrɛk.”

⁴²A tɛ bun ifɛ́ afaa narɔ ira awon e, a fɛ̀, “Ada hom, kɛ ba da kyem ba di sok kitsɛ̀n mgbang e awo, ma in sɔ ika, won ni in nye kushim ngɔn.”

⁴³Ni izen fɛ́ a tɛ a bɛ́s wu, a tɛ ka ba sɛ ba se ni nda, nek ayisi ba mi te tsorgos ni nda.

⁴⁴Wat iwu tseng a ka ba won, a tsɛ a ra awon afɛ́ ataat, a tɛ a fɛ̀ nɛ Adakunom kpaf tɛ fɛ́ a mi fɛ̀ ni iwu.

⁴⁵Ama anɔng, a tɛ bun sak narɔ bafi imɛɛs e, a fɛ̀ ni iba, “I rēn se yin ni nda ni fɔrɔng yin ɛ? Di yin, izen e mi bɛ́ bakat fɛ́ ba da nabak Arim Anet ni mbɔk bafi inɛn.

⁴⁶Dorok yin, in tseng yit! Anet irɛp hom yong a mi bɛ́ ta!”

⁴⁷Na aYeso tsin rēn cɛɛt, aJudas azining ayɛt bafi imɛɛs wu kusɔk abe afaa me, tsɛ a ta zɔng gung ni kudyɛng banet fɛ́ ba berese áwal ni íshɛn; ayet bagbat áware nɛ bashɔn iwɔp wu ba tom banet e.

⁴⁸Anet irɛp e mi tɔ ni iba ikyɛng fi iba di ki te ayisi: “Ayɔng fi imi ku wusup nɛ kanu[29], iwu me yɔng; Ku tekap yin.”

⁴⁹Nkum ba tsin nɔɔs kyɛk, aJudas di berem sak narɔ aYeso, a fɛ̀ ni iwu, “Show, Anet Itees!” Awat a ku yit ni iwusup.

⁵⁰AYeso fɛ̀ ni iwu, “Afidang yin, nye ikyɛng fi i bɛ́ ni ngɔn.” Wat banet e ne, ba ku tekap, ba ku yit gak.

⁵¹Ni i di anɔng, azining ayɛt bayɔng fɛ́ ba se gung nɛ aYeso, a kɔrɔk àwal wu, a di tɛmɛng kuto asam agbat-agbat àware.

⁵²AYeso fɛ̀ ni iwu, “Sɔɔn àwal ngɔn ayɛt kubas ko. Nek ngma anet fɛ́ a sok awal, awal wu a da ku ya.

⁵³Iyin di yin ti imi da kyem ni in tak aDa min, na wat a di tom batomaza fɛ́ ba wat kudyɛng batsom kusɔk abe afaa awɛ?

⁵⁴Wat na anɛ wu fɛ́ ba di ki shining ikyɛng fi i se ni ijɛk ni ifumung Adakunom ɛ? Ifɛ̀ me tonong fok, i se gbing-gbing nkyɔrɔk nang ni in te anɔng!”

⁵⁵Ama anɔng, aYeso fɛ̀ nɛ banet e, “Wat iyin bɛ yin na áwal ni íshɛn i bi i di tekap yin mo, imi yet anet itsang agap ɛ? Kaakyi kunom imi wosok itees banet ni itu iya Adakunom ntong, iyin da i di tekap yin awo.

⁵⁶Ngma nkyɔrɔk nang te anɔng, nɔng ikyɛng fɛ́ batan kin mang jɛk bin sɛ i di shining.” Ama anɔng, ngma bafi imɛɛs wu me, teng ba ku won.

⁵⁷Banet fɛ́ ba tekap aYeso, tse ni iwu ashon aKayafas, agbat-agbat àware, narɔ fɛ́ bafi itees ntsi aMusa nɛ bashɔn iwɔp mi kana tusung mo.

⁵⁸ABitrus ka ba kuus mo ama yik-yik, sak atasa agbat-agbat áware me. A nɔ, a tsɛ a sonong nɛ banet itosok kasa me, nɔng a da bin di ikyɛng fi i da te.

⁵⁹Bagbat áware me nɛ bafɛ́ azumung ishɔt e, ba sɛ ni itsɛt inɛn nbɔs fɛ́ ba da bɔ aYeso ne, nɔng ba bin se ba ku fɛt mo.

⁶⁰Awɛt da ba kyem ba sɛ awo, ngma nɛ anɔng banet dot bɛ́ ba nesek nanu mbɔɔs naton wu. Ni igang e, banet bafaa tsɛ ba ne,

⁶¹ba fɛ̀, “Anet yong fɛ̀, ‘Iwu da kyem a fo kutu iya Adakunom ntong kang, na tɛ na nok iko ni nkɔs ntaat.’ ”

⁶²Wat agbat-agbat àware me, dorok tsik, a fɛ̀ na aYeso, “Ngɔn bi ikyɛng fi i da fɛ̀ naton kukun fɛ́ banet bang bɛ́ ne naton ngɔn awɛ?”

⁶³AYeso di wey yuu. Agbat-agbat àware me, fɛ̀ ni iwu, “Imi da shi min ashon Adakunom aza: Ki tak yit kɛ ngɔn wu i yet Anet-Isheshek, Arim Adakunom e yɛ.”

⁶⁴AYeso fɛ̀, “Ngɔn mi fɛrɛng. Awɛt atsak fi in tsin ki tak yin: Azeng sak ashon, i bi di yin Arim Anet ni isonong ni ibɔk iyak Azɔk Bazɔk, na tsin bɛ́s wu ayɛt anɔk aton aza.”

⁶⁵Ni izen fɛ́ agbat-agbat àware me fok anɔng, a sarak kukpin wu nek ibeseng iyɛ, a fɛ̀, “A mi beseng iyerek Adakunom kari! Akyɛ ikyɛng icɛɛt fi in tsɛt yit kong ari? Yɔkɔnɔng, iyin mi fok yin kuri ibyɛs fɛ́ a nye Adakunom e.

⁶⁶Akyɛ fi iyin di yin ɛ?” Iba fɛ̀ ni iwu, “I se kpaf na a ku!”

⁶⁷Ba cish aYeso ncicɛ na yisi, ba ma ku tsot. Bakak ku tang mbɔk na a fok

⁶⁸na ba ku risim, “Anet-Isheshek, tak ibes, angan wu fɛ́ a da rus ɛ?”

⁶⁹Ni izen e yɔng, na aBitrus resek mo atasa, kanamang kakak fɛ́ ka ra kutomong ari me, bɛ́ ka ku sɛ, ka fɛ̀ ni iwu, “Ngɔn kin se gung na aYeso anet aGalili me yɔng bà.”

⁷⁰Awɛt aBitrus toon ashon ba ngma, yɛ, “Imi rēn ikyɛng fi iyin di cɛɛt yin naton e awo.”

⁷¹A wuruk sak na tunyeneng, kanamang kakak fɛ́ ka ra isam azɔng e tɛ ka ku di, ka fɛ̀ nɛ banet fɛ́ ba se azɔng, “Anet yo, se gung nɛ aYeso anet aNazaret e.”

⁷²A tɛ toone, ni kushi: “Imi rēn anet e awo!”

⁷³Ama kizen gyet, banet fɛ́ ba se ni nyeseng azɔng, bɛ́ ba fɛ̀ na aBitrus, “Na atsak e, ngɔn yet azining ba. Kucɛɛt ngɔn, mi da tonong.”

⁷⁴A kpa yes kawɛy naton ice wu, na a woso nyes kushi ashon ba, “Imi rēn anet yong awo!” Ni izen e yɔng, atsanyon wat a kpa tɛp.

⁷⁵Wat aBitrus yiring ni ikyɛng fɛ́ aYeso fɛ̀ ni iwu, yɛ, “Na atsanyon dang tɛp, ngɔn da nye nanan hom kataat.” A di berem amatse, a tsɛ ya kanak makiyi.