Read icen AMatiyu 28 Bible Online

AMatiyu 28 - icen bible

AMatiyu 28

¹Kunom aSabat bi ku got, wɛt atuk imɛsɛng inyim nnom, aMarya afɛ́ aMagadala nɛ aMarya azining e, ba wuruk bop sak ni irɛk e.

²Ni izen izining, mben dorok in zuut makiyi, nek atomaza Adakunom akak, ne azanɛn, a bingiring kuta fi ku se nanu irɛk e, a di sonong naton ko.

³Nse wu se ti mgbey iza, nkum fɛ́ ares wu tɛrɛk ti itarang.

⁴Wɛt nnyim yit batsom e gyet awo, nkum fɛ́ ba tiim nrɔm, ba wat ba sot ti nkom e.

⁵Atomaza me, fɛ̀ na banyining e, “I bi fok yin nnyim awo, nek imi rēn fok i tsin tsɛt yin aYeso, ayɔng fɛ́ ba kin ku tegak.

⁶A se azeng awo, ba mi ku donong, kpaf tɛ fɛ́ a kin ki tak yin. Bɛ́ da di yin karɔ fɛ́ ba kin ku mes mo.

⁷Ti bun yin ziri ziri, i da tsi i tak yin bafi imɛɛs wu: ‘A mi dorok ni ifaben, a mi yit irèn ashon yin sak na aGalili. Azɔng fi i da tsi i ku di yin.’ Di yin, in mi ki tak yin.”

⁸Wat ba won kurɛk e ayɛt nnyim nɛ kafa kakan makiyi. Ba ta itsi, nɔng ba da tsɛ ba tak bafi imɛɛs wu ifɛ̀ me.

⁹Ba se na anɔng, aYeso nyim ni iba, a fɛ̀ ni iba, “Show yin!” Ba serek bakat ni iwu, ba di kpa na atak wu, ba ku ya ntong.

¹⁰AYeso fɛ̀ ni iba, “I bi fok yin nnyim awo, tsi tak yin baruneng na ba tseng sak na aGalili, ba da tsɛ ba di di azɔng.”

¹¹Ni izen fɛ́ banyining e se ni irèn, bakak ayɛt batsom e, bun sak ayɛt iwɔp, ba tsɛ ba tak bagbat áware me ngma ikyɛng fi ite.

¹²Fɛ́ ba fok anɔng, bagbat áware nɛ bashɔn iwɔp, wat ba yes kazumung, ba tɔ ikyɛng inye, ba nɔɔk batsom e itsɔm dot,

¹³ba fɛ̀ ni iba, “Ikyɛng de fi iyin da fɛ̀ yin, ‘Bafi imɛɛs wu bɛ́ natuk, ba yi kukom wu, iyit ni nda.’

¹⁴Ki ifɛ̀ me nɔ ni ito agwɔmna, iyit rēn yit ikyɛng fi in da ku tak yit, vit inɛn fi i da ki sɛ yin.”

¹⁵Wat batsom e shan itsɔm e, ba nye kpaf tɛ ba di fɛ̀ ni iba. Ba rēn shara ifɛ̀ me deng nate baYahuda sak atut.

¹⁶Bafi imɛɛs kusɔk abe azining e, tseng sak na aGalili, sak ni ihwyanang fɛ̀ aYeso fɛ̀ ni iba ba di tse.

¹⁷Ni izen fɛ́ ba ku di, ba ku ya ntong; ngma na anɔng bakak ba bɛ̀ ayɛ gak.

¹⁸Wat aYeso bang serek bakat ni iba, a fɛ̀ ni iba, “Ba mi di nɔk ngma ice azanɛn nɛ kazatse.

¹⁹Nek anɔng, tseng yin, tsi tsɛt yin bafi imɛɛs ayɛt ícɛ́n azatse ngma kusum, ka ba ras yin abatisma ayɛt iyerek Ada, nɛ Arim e, nɛ Kabik aJɛrɛ,

²⁰ka ba tees yin na ba nye ngma ikyɛng fi in ki tak yin. Rēn yin fok, imi se gung ni iyin kaakyi izen, sak igang azatse.”