Read icen AMatiyu 4 Bible Online

AMatiyu 4 - icen bible

AMatiyu 4

¹Ama anɔng, Kabik aJɛrɛ tsa aYeso sak ayɛt ayit nɔng aShetan bin ku mara.

²Ama itemak kanu nnom nsɔk nnaas nɛ natuk nsɔk nnaas, izong kudaam.

³Anet imara me bɛ́ a ku sɛ, a fɛ̀ ni iwu, “Ki ngɔn yet Arim Adakunom, fɛ̀ na ata nang na sot akpam.”

⁴AYeso ku bun ni ifɛ̀ yɛ, “I se ni ijɛk ni ifumung Adakunom yɛ, ‘Na nayak na kyɛk fɛ́ anet di sɛs kutset awo, tit ni ifɛ̀ fi ines narɔ Adakunom de.’ ”

⁵AShetan e tɛ a ku sok sak ni kuwɔp ku jɛrɛ, aRushelima, a ku sak a nyeseng ni iriyɔng kutu iya Adakunom ntong.

⁶A fɛ̀ ni wu, “Ki ngɔn yet Arim Adakunom, barak ice ngɔn sak aben. Nek i se ni ijɛk, ‘Adakunom bi nɔɔk batomaza wu kanu icɛɛt naton ngɔn, wat iba bi da bereng tɛrɛrɛ ni mbɔk bá, da ba bi won ni turuk kutak ni kuta awo.’ ”

⁷AYeso tɛ a fɛ̀ ni wu, “I se ni ijɛk, ‘I bi mara aTisa Adakunom ngɔn awo.’ ”

⁸AShetan e tɛ a ku sok a ngarak ni iwu naton ihwyanang ikak fi i yet isɔp makiyi. A ku tonong nzam-nzam igwɔm azatse ni nta na,

⁹a fɛ̀ ni wu, “Ngma nkyɔrɔk na da sot nfɔɔn, ki ngɔn te gururuk i di ya ntong.”

¹⁰AYeso fɛ̀ ni wu, “Dorok azeng aShetan! I se ni ijɛk yɛ, ‘Ya aTisa Adakunom ngɔn ntong, iwu aziwu kyɛk fi i da ku ra isam.’ ”

¹¹Ama anɔng, aShetan tseng a ku won, batomaza bɛ́, ba ku sɛ mo.

¹²Ni izen fɛ́ aYeso fok yɛ ba mi te aYohana ari inyang, a tɛ bun sak na aGalili.

¹³A won aNazaret, a tsɛ sot na aKafarnahum, kuwɔp anu kudúng fi ku se bakat nɛ aZebulum nɛ aNaftali,

¹⁴mok ba di shining ikyɛng fɛ́ atan aIshaya kin fɛ̀,

¹⁵“Mben aZebulum nɛ mben aNaftali, iyin fi i se yin ni irèn sak ni kudúng, ni kunyi aJodan, ngɔn aGalili afi Ícɛn-iduk!

¹⁶Banet fɛ́ ba resek ayɛt nhwyi ba mi di mgbey nratek; naton bayɔng fɛ́ ba resek ni mben fi iku mi ka ba te gip, karɔ mi ki te yin weshek.”

¹⁷Nkum izen e yɔng, aYeso tumung ishara banet ifɛ̀ yɛ, “Wosong yin anɛn yin, nek igwɔm azanɛn mi bɛ̀ bakat.”

¹⁸Izen fɛ́ aYeso se ni kutseet ni fam izek aGalili, a di banet bafaa, aSiman fɛ́ ba ku yes aBitrus, nɛ arunyining Andarawus. Ba se ni bara agunung ayɛt izek, nek iba yet bafi iyisik ìzos.

¹⁹AYeso fɛ̀ ni ba, “Bɛ́ yin, di kuus yin mo, in da ki sak yin, ni i sot yin bafi iyisik banet.”

²⁰Zɛng-ngɛ-ziri, ba wat ba wosong agunung bá, ba kpa ku kuus mo.

²¹A ya kashon ni kutseet, a sɛ banet bafaa bà, aYakubu arim aZebedi nɛ arunyining aYohana. Ba se ayɛt kukyɛ ashi nɛ ada ba aZebedi, ba se ni inye agunung bá. AYeso ka ba yes,

²²Zɛng-ngɛ-ziri, ba wosong kukyɛ ashi bá, nɛ ada bá, ba ku kuus mo.

²³AYeso teng a tsees kaakyɛ na aGalili, na tees banet narɔ inyis baYahuda, na a shara ifɛ̀ itek ifi igwɔm, na tes kyang kaakyi nri nrɔk, ni ndaam fɛ́ banet bɔrɔng e.

²⁴Na anɔng wu, kucɛɛt wu teng ku tseng kaakyɛ ni mben aSiriya. Nek anɔng, banet del na bafi nzam-nzam nrɔk, bayɔng fɛ́ ba bɔrɔng makiyi, bafi nrɔk ítseng, bafi ikus itsitsiring, nɛ bayɔng fɛ́ aduru nrɔm bá mi kus, iwu ka ba tes kyang.

²⁵Kudyɛng banet fɛ́ ba ne na aGalili, nɛ bayɔng fɛ́ ba ne na aDikapolis[3], nɛ bayɔng fɛ́ ba ne na aRushelima, nɛ bayɔng fɛ́ ba ne ni mben aJudiya, nɛ bayɔng fɛ́ ba ne ni nyi kuya kufi kukyɛk aJodan, teng ba ku kuus mo.