Read icen AMatiyu 5 Bible Online

AMatiyu 5 - icen bible

AMatiyu 5

¹Ni izen fɛ́ a di kudyɛng banet e, a ngarak naton ihwyanang, a sonong. Bafi imɛɛs wu tse narɔ wu,

²a kpa ka ba tees yɛ,

³“Awɛng se gung na bayɔng fɛ́ ba yet bakan na abik, nek ba mi sot bafi igwɔm azanɛn.

⁴Awɛng se gung na bayɔng fɛ́ ba bɛ̀ kafa kawe, nek Adakunom bi ka ba men ayɛ.

⁵Awɛng se gung na bafi nhwyɛ, nek Adakunom bi ka ba nɔɔk kazatse.

⁶Awɛng se gung na bayɔng fɛ́ ba foos izong, ni iyɛ ingash ira atsak, nek Adakunom bi ka ba nesek ihwyas.

⁷Awɛng se gung na bayɔng fɛ́ ba foos angmishish, nek Adakunom bi ka ba tonong angmishish bà.

⁸Awɛng se gung na bayɔng fɛ́ ayɛ ba se cɛ́l, nek ba bi di Adakunom.

⁹Awɛng se gung na bayɔng fɛ́ ba monoso kusonong kukyang, nek ba bi ka ba yes nnon Adakunom.

¹⁰Awɛng se gung na bayɔng fɛ́ ba ka ba nesek iyɔm nek kusot atsak, nek ba mi sot bafi igwɔm azanɛn.

¹¹“Awɛng se gung ni iyin ni izen fɛ́ banet ki tosong yin, na ba ki nesek yin iyɔm, na ba di bɔs nbɔs ni yin, na ba ki nyes yin nzam-nzam anyas, nek i yet yin bafi ikuus hom.

¹²Nye yin iyɛ ikan makiyi, nek izang yin yet iratek azanɛn, nek kpaf anɔng wu, fɛ́ ba kin nesek batan ashon iyɔm.

¹³“Iyin wu i yet yin ntɔk azatse. Awɛt ki ntɔk e wey kuta ná, nɛ anɛ fɛ́ ba da tɛ ba di te kuta ni na yɛ? In da sot vit ikyɛng fɛ́ ba da tɛ ba di nye ni ina, tit na ba nosong ina, nɛ banet shɛsh ina.

¹⁴“Iyin ba i yet yin mgbey azatse. Kuwɔp fi ku se ni igung, ba kyem ba nɛt iko awo.

¹⁵Vit anet fɛ́ a ta kurong na agaramun, na ma fam iko na katsereng. Ikyɛng fɛ́ ba nye yet, ba saas iko narɔ kagarang, ni ku nesek kaangan mgbey ari me.

¹⁶I se kpaf anɔng, won mgbey yin ni in ron nate banet, nɔng ba bin di ntomong yin ntek, nɔng ba bin di tere Ada yin fɛ́ a se azanɛn.

¹⁷“Iyin di yin ti imi bɛ́ nek in bi in buruk ntsi aMusa ni ikyɛng fɛ́ batan kin jɛk ɛ? Awɛy! Imi bɛ́ nek in bi in shinishi ina.

¹⁸Won in ki tak yin atsak, ba buruk kazanɛn nɛ kazatse, vit itin ijɛk, ke kizizɔ́ fɛ́ ka da wey ni Ntsi, ma ba shining kaakyi ikyɛng ninyɛn.

¹⁹Nek anɔng, ngma anet fɛ́ a beseng ntsi fi nwat mbaane, a di tees banet fok na ba nye anɔng, ba bi ku sak na a sot afɛ́ ama ayet igwɔm azanɛn. Awɛt ayɔng fɛ́ a ras na tees ikyɛng fi ntsi Adakunom fɛ̀, ba bi ku yes aratek ni igwɔm azanɛn.

²⁰Nek in tsin ki tak yin yɛ, ki kusot atsak yin wat kufe BaFarasi nɛ bafi itees ntsi aMusa awo, vit iyin ni inɔ ayɛt igwɔm azanɛn.

²¹“Iyin mang fok yin fok ba kin tak banet ashon, ‘Da i bi fɛt akak awo, nɛk ngma anet yɔng fɛ́ a fɛt akak, ba da ku ra ishɔt.’

²²Awɛt imi tsin ki tak yin yɛ, ngma anet yɔng fɛ́ a bɛ̀ kafa kawe na arunyining, ba da ku ra ishɔt. Ngma ayɔng fɛ́ tosong arunyining, ba da tse ni iwu nazumung bashɔn. Awɛt ngma ayɔng fɛ́ a yes akak, ‘Kushɔp’ a da se na awey inɔ ari irong.

²³“Nek anɔng, ki i tsin nɔɔk kunang ngɔn ni kuta ashosh, azɔng kuyiring da bɛ́ fok arunyining bɛ̀ kafa kawe ni ngɔn,

²⁴won kunang ngɔn azɔng ashon kuta ashosh e, tun tseng, tsi kana nye yin nɛ arunyining ninyen, i da ni ibun, ni nabak kunang ngɔn.

²⁵“Ke akak bɛ̀ kucɛɛt ni ngɔn, fɛ́ a shim a te kukun ngɔn nitu ishɔt. Kpa tɔ ni iwu gyam, ni ren resek yin dang ta yin nitu ishɔt e, ke da anɔng awo, a da ka nabak ni bɔk anet ishɔt, ne anet ishɔt da nabak ni bɔk nggon ishɛn, ne ba tse ba da te kpaf ari inyang.

²⁶Won in da tak atsak, vit ngɔn ni iwuruk, tit ma itarang kaakyɛ abɔk fɛ́ ba da kuus.

²⁷“Iyin kin mang fok yin fɛ́ ba kin fɛ̀, ‘Da i bi ra kujang awo.’

²⁸Awɛt imi tsin fɛ̀ ni iyin fok, ngma ayɔng fɛ́ a yɛrɛk abining na foos ikɔk wu, a mi ra kujang ni iwu ni iyɛ wu.

²⁹Ki iyisi ngɔn ifi kuyak, da bɛ́s ni ikpas, kobok ide, i da barak ide atsá. Iwat gyat ni ibit abak irɔm ngɔn akak aza yɔng fɛ́ ba da barak kurɔm ngɔn ngma kusum ari irong.

³⁰Ki kubɔk iyak ngɔn da bɛ́s ni ikpas ni inɛn, tɛn iko, barak iko atsá. Iwat gyat ni ibit abak irɔm ngɔn akak, aza yɔng fi kurɔm ngɔn kusum da tsi ku nɔ ari irong.

³¹“Ba kin fɛ̀ ni ba, ‘Ngma ayɔng fɛ́ a kam kuweneng nɛ abining wu, i se gbingbing na a ku nɔk kufumung ikam iweneng.’

³²Awɛt imi tsin fɛ̀ ni iyin fok, ngma ayɔng fɛ́ a kam nɛ abining wu, ke da nek inɛn kujang awo, a tsin te abining e ni kujang, ngma ayɔng fɛ́ a bɔ abining e, a tsin ra kujang.

³³“Iyin kin mang ti i fok yin fɛ́ ba kin fɛ̀ nɛ banet ashon, ‘Da i bi tɛn yin kushi awo, bereng yin kushi fi i mi nye yin sak nɛ aTisa.’

³⁴Awɛt imi tsin fɛ̀ ni yin, da i bi nye yin kushi ko gyet awo. I bi nye yin kushi nɛ kaza awo, nek ka yet kuta isonong igwɔm Adakunom yɔng.

³⁵Ke ni nye yin kushi nɛ kazatse awo, nek ka yet karɔ isaas atak Adakunom. Ke ni i nye yin kushi ni aRushelima awo, nek ka yet kuwɔp Agbat Agwɔm.

³⁶Da i bi nye yin kushi ni ice yin awo, nek iyin da kyem i te yin kukwey ice kuzining ni ku tɛrɛk ke ni ku webek awo.

³⁷Won ‘Ey’ yin na a sot ‘Ey’, na ‘Awɛy’ yin na a sot ‘Awɛy’, ikyɛng fi i got anɔng, i ne na amaan e.

³⁸“Iyin kin mang fok yin fɛ́ ba kin fɛ̀, ‘Anet fɛ́ a tun afidang iyisi, ba da ku tun ifuu bá, ke inyi fɛ́ a tun afidang e ayi, na ba ku tun inyi bà.’

³⁹Awɛt imi tsin fɛ̀ ni yin, ke akak ki bɛ́ yin nɛ anyas, i bi ti i ku bun yin mo ni ifà wo. Ke anet akak da rus kufok iyak, ku tirik kufi imen bà.

⁴⁰Ke anet akak tse kukun ngɔn nitu ishɔt, nɔng a da bin shan kukpin ngɔn, ku nɔɔk ngma ni ikyɛng ifamasa irɔm ngɔn.

⁴¹Ke anet akak da te mo gbingbing fok ni i nye yin kutseet akilo azining, tseng ni iwu sak akilo afaa.

⁴²Nɔk kaangan ikyɛng fɛ́ a bɛ́ itsɛt ni ngɔn, i bi rone ni kuta na ayɔng fɛ́ a bi itsɛt kukɔp ni ngɔn awo.

⁴³“I ki mang fok yin fɛ́ ba kin fɛ̀, ‘Shim afidang isot ngɔn, ni rangɔn afi ifa ngɔn.’

⁴⁴Awɛt imi tsin fɛ̀ ni yin: Shim yin bafi ifa yin, ras yin bayɔng fɛ́ ba ki nesek yin iyɔm awon,

⁴⁵nɔng i da sot yin nnon Ada yin fɛ́ a se azanɛn. Iwu fɛ́ a saas kunom ni ku tat naton bafɛ́ anyas nɛ batek, na tɛ na toos ni iza sak naton bafi kusot atsak nɛ bafi nhwyi.

⁴⁶Ki i shim yin wɔn bayɔng fɛ́ ba ki shim yin kyɛk, akyɛ izang fi i da sɛ yin ɛ? Bafi ishashang itsɔm mben, nyes anɔng bà awɛ?

⁴⁷Ki i nye ashow bafidang yin kyɛk, akyɛ de fi i tsin nye yin fi i got i fɛ́ bakak ɛ? Banet fɛ́ ba yet bafi nhwyi pet ba ras anɔng awɛ?

⁴⁸Nek anɔng, tseng yin kpaf, kyɔn tɛ Ada yin di se kpaf.