Read icen AMatiyu 8 Bible Online

AMatiyu 8 - icen bible

AMatiyu 8

¹Ni izen fɛ́ aYeso tik ni ihwyanang e, kudyɛng banet ku kuus mo.

²Akparong akak tsɛ, a te gururuk ashon aYeso, a fɛ̀ ni iwu, “ATisa, ki ngɔn shim, i da kyem i di te jɛrɛ.”

³AYeso nabak kubɔk wu, a di ra anet e. A fɛ̀ ni wu, “Ey, imi shim, te kyang!” Ni izen izining, ikparong wat iku won.

⁴AYeso ma fɛ̀ ni iwu, “Fok, i bi tak akak ikikak awo. Di berem tsi tonong àware ice ngɔn, nabak kunang fɛ́ aMusa fɛ̀, nɔng i da tonong fok a mi da te kyang.”

⁵Ni izen fɛ́ aYeso nɔ na aKafarnahum, agbat atsom akak tsɛ a ku sɛ, a tsot akabɔk ni iwu,

⁶“ATisa, asam hom se gbɛrɛk ari, a bɔrɔng makiyi.”

⁷AYeso fɛ̀ ni wu, “In da tsin in ku te kyang.”

⁸Agbat atsom e fɛ̀ ni iwu, “ATisa, imi kyem fi ngɔn da tsɛ ari hom awo. Ngɔn fɛrɛng kyɛk, asam hom da te kyang.

⁹Nek imi ice min in se aben igwɔm, in bɛ̀ batsom aben ni imi. In fɛ̀ na a yo, ‘Tseng,’ na tseng. Ni in fɛ̀ na a ya, ‘Bɛ́,’ na bɛ́. In fɛ̀ na asam hom, ‘Nye ide,’ na nye anɔng.”

¹⁰Ni izen fɛ́ aYeso fok anɔng, a ku te yɔɔt, a fɛ̀ na bayɔng fɛ́ ba se ni iku kuus mo, “Won in ki tak yin atsak, in mi kyem in sɛ akak ni aIsrela kusum fɛ́ a bɛ̀ kuri inɔɔk atsak anɔng awo.

¹¹Imi fɛ̀ ni iyin banet dot bi nes abatin, nɛ abace, na ba sosok na ba ya amok gung nɛ aIbrahim, nɛ aIshaku, nɛ aYakub[4] ni igwɔm azanɛn.

¹²Awɛt ba bi woro nnon ari igwɔm amatse, ni rin, azɔng wu ba bi ya ának na ba ros anyi.”

¹³Wɛt aYeso fɛ̀ na agbat atsom e, “Tseng! Kpaf ni inɔɔk atsak ngɔn, ba mi da nye ne.” Ba te asam wu kyang kpaf ni izen e yɔng.

¹⁴Ni izen fɛ́ aYeso nɔ ari aBitrus, a sɛ anekop aBitrus na meneng ni ifes.

¹⁵A ku ra ni kubɔk, ifes e wat i ku wosong, a dorok a kpa ku nye ikyɛng iya.

¹⁶Fɛ́ kawuwuri nye, ba ku bɛ́s nɛ banet dot fi kurɔk itseng ka ba daam, a ka ba turung itseng e ni ifɛ̀ na tes bafi nrɔk kyang.

¹⁷Ba nye anɔng, ba bin di shining ikyɛng fɛ́ atan aIshaya kin fɛ̀ yɛ, “A kin sok kugbɛrɛk yit, a fanang nrɔk yit.”

¹⁸Ni izen fɛ́ aYeso di kudyɛng banet fɛ́ ba ku te nate, a fɛ̀ na ba tat sak ni nyi ku ya kufi izek e.

¹⁹Wɛt anet itees ntsi aMusa akak bɛ́ ni wu, a fɛ̀ ni wu, “Anet itees, imi da ka kuus mo sak kaakyɛ karɔ fi ngɔn di ki tse.”

²⁰AYeso fɛ̀ ni wu, “ÁGbayɔrɔ bɛ̀ ábóng na, nanon bɛ̀ arɛ na, awɛt Arim Anet bɛ̀ karɔ ikɔs awo.”

²¹Azining ayɛt bafi imɛɛs wu fɛ̀ ni wu, “ATisa, won in tsin nɛt ada hom ninyɛn.”

²²Awɛt aYeso fɛ̀ ni wu, “Ngɔn di kuus mo, won nkom ni in nɛsɛk nkom bá.”

²³AYeso ma nɔ ni kukyɛ ashi, bafi imɛɛs wu ku kuus mo.

²⁴Ni izen izining, itsombos ikak tsi i ne makiyi ni izek e, nkum ashi fɛ́ a nɔɔs ayɛt kukyɛ ashi makiyi. Awɛt aYeso se ni nda.

²⁵Bafi imɛɛs e tsɛ ba ku shemeng, ba fɛ̀ ni wu, “ATisa, ki sheshek yit! Ashi da ki ya yit!”

²⁶AYeso fɛ̀ ni iba, “Iyin fi bɛ̀ yin inɔɔk atsak igyebet, akyɛ sak fi iyin bɛ̀ yin nnyim anɔng ɛ?” A dorok, a gyɔng itsombos ni idoro ashi me, karɔ wat ka te yuu.

²⁷Ikyɛng e te banet yɔɔt, ba fɛ̀, “Akyɛ kuri anet yong ɛ? Fɛ́ awun ni kuren ashi ku foos ifɛ̀ yɛ?”

²⁸Ni izen fɛ́ a tsɛ a ta ni nyi ku ya kufi mben bafɛ́ aGadarin[5], bafi kurɔk itsɛ́ng bafaa ne na arɛk bá, sak inyim nɛ aYeso. Nek kuren fɛ́ ba ras, vit anet fɛ́ a kyem a got irèn e yɔng.

²⁹Ba ta ntɔ yɛ, “Arim Adakunom, akyɛ fi ngɔn tsɛt ni iyit ɛ? Ngɔn shim i bi i ki zoot yit ni izen yit resek dang nye yɛ?”

³⁰Kukpara áza kuratek kin se ni iya kuyak sak ashon ba gyet.

³¹Itsɛ́ng e tsot akabɔk na aYeso yɛ, “Ki i da ki tun yit, ki won yit nin nɔ yit ayɛt áza na.”

³²Wat iwu fɛ̀ ni ide, “Tsɛng yin!” Nek anɔng, i wuruk, i tsi i nɔ ayɛt áza me, kukpara áza me ngma kusum, wat ku di berem ni kuren sak ni ice ibanang, i kpas ayɛt ashi, a kus.

³³Banek áza me, ta itsi, sak ayɛt iwɔp, ba tsɛ ba taas banet ngma ikyɛng fi ite, ni ikyɛng fi ite na bafi kurɔk itseng e.

³⁴Banet iwɔp ngma kusum wuruk, tsɛ ba sɛ aYeso. Ni izen fɛ́ ba tsɛ ba ku sɛ, ba tsot akabɔk fok yɛ na ka ba won mben bá.