Read icen AMarkus 1 Bible Online

AMarkus 1 - icen bible

AMarkus 1

¹Itumung ifɛ̀ itek naton aYeso Kristi, Arim Adakunom.

²Ti i di se ni jɛk ni ifumung atan aIshaya yɛ, “Di yin, in bi tom atom hom ashon ngɔn, nek na a nye irèn mok ngɔn.[1]

³Kutɔ akak fɛ́ a bi yes natse, ‘Nye yin aTisa irèn, ku nye yin irèn tabat.’ ”[2]

⁴Nek anɔng, aYohana kin bɛ̀, a ras abatisma abak atse. Na shara ifɛ́ fok, “Wosong yin anɛn yin, tirik yin sak na Adakunom, mok ba ki ra yin abatisma, nɔng Adakunom da ki fuut yin anɛn yin.”

⁵Ngma banet mben aJudiya nɛ bafɛ́ aRushelima ngma kusum, tses sak ni wu, ba taas anɛn bá, a ka ba ras abatisma ni kukyɛk aJodan.

⁶AYohana kin tes ares fɛ́ ba nye ina nɛ akwey itsaap-igung, a rosom kudun kukpa na awit wu, nayak wu yet itse ni itong ayit.

⁷Itom wu kin se ane, “Anet fɛ́ a bi bɛ̀ ama hom, a di wat na agap, imi kyem ni in kumung, ni in bisik kudun ikpatak wu awo.

⁸Imi ki ras yin abatisma nɛ ashi, awɛt iwu bi ki ras yin abatisma nɛ Kabik aJɛrɛ.”

⁹Ni izen e yɔng, aYeso kin ne na aNazaret afi mben aGalili, aYohana ku ra abatisma ni kukyɛk aJodan.

¹⁰Ni izen fɛ́ aYeso se ni iwuruk ayɛt ashi me, a di kazanɛn tarak piyot, na Kabik tsin tisik naton wu tɛ abɔp.

¹¹Wat kutɔ ne azanɛn fok: “Ngɔn yet Ari hom, ayɔng fi in shim makiyi; in bi itɛrɛk iyɛ ni ngɔn makiyi.”

¹²Ni izen izining, Kabik e ku yirik sak na atse,

¹³a sot azɔng na atse, nkɔs nsɔk nnaas, na aShetan woso a ku mara. A sot gung ni inyam ayit azɔng, awɛt batomaza ku sɛs mo.

¹⁴Ama fɛ́ ba mi te aYohana ari inyang, aYeso tse na aGalili, a shara ifɛ̀ itek fi i ne na Adakunom.

¹⁵A fɛ̀ yɛ, “Izen mi nye! Igwɔm Adakunom mi bɛ́ bakat! Wosong yin anɛn, tirik yin sak na Adakunom, ni nɔk yin atsak ni ifɛ̀ itek e!”

¹⁶Fɛ́ aYeso se ni kutseet bakat ni izek aGalili, a di aSiman nɛ arunyining Andarawus, na ba tsin tang agunung ba ayɛt idung e, nek kutomong bá yet iyisik ìzos.

¹⁷AYeso fɛ̀ ni ba, “Bɛ́ yin! Di kuus yin mo, in da ki sak yin, i da sot yin bafi iyisik banet.”

¹⁸Ni izen izining, ba wat ba wosong águnung bá, ba ku kuus.

¹⁹Ama fɛ́ a bang serek gyet, a di aYakubu arim aZebedi, nɛ arunyining aYohana ayɛt kukyɛ ashi, ba se ni inye águnung bá.

²⁰Vit ibeseng izen, a ka ba yes, ba wosong ada bà aZebedi ayɛt kukyɛ ashi me, nɛ ishɛrɛp bafi itomong e, ba ku kuus mo.

²¹AYeso nɛ bafi ikuus wu tse na aKafarnahum, fi kunom aSabat nye, aYeso tsɛ a nɔ narɔ inyis baYahuda, a kpa tees banet ifɛ Adakunom.

²²A te banet e yɔɔt ni kuri itees fɛ́ a se ne, nek a ka ba ra itees tɛ anet fɛ́ a bi ice, da tɛ bafi itees ntsi aMusa awo.

²³Ba se nɛ anɔng, anet akak azɔng narɔ inyis baYahuda me fɛ́ a bɛ aduk abik a ta kukun fok,

²⁴“Ngɔn tsɛt akyɛ ni iyit aYeso anet aNazaret ɛ? Ngɔn bi i wey ni yit ɛ? Imi rēn anet fi ngɔn yet, ngɔn yet aJɛrɛ me afɛ́ Adakunom!”

²⁵AYeso kɔn itséng e, a fɛ̀ ni ide, “Te yin yuu! Wuruk ni wu!”

²⁶Aduk abik e zuut anet e makiyi, ka wuruk ni wu ni kukun.

²⁷A te ngma banet e kpɔrɔk makiyi, ba kpa cɛɛt wɔɔn bá, yɛ, “Akyɛ deng iyet ideng kong ɛ? Itees ifas ikak yeng atut, fi i bi ice! A cɛɛt kyɛk na áduk ábik nyes ikyɛng fɛ́ a fɛ̀.”

²⁸Kucɛɛt naton wu, fuush ziri ziri ngma ni mben aGalili.

²⁹Ziri, ama fɛ́ ba mi wuruk narɔ inyis baYahuda me, ba tseng gung na aYakubu nɛ aYohana sak ari ba aSiman nɛ Andarawus.

³⁰Ba tsɛ ba sɛ anekop aSiman na meneng ni ifes, ba tak aYeso ifi irɔk e.

³¹Nek anɔng, aYeso tsɛ a ku sɛ, a ku yit kubɔk, a ku sɛ mo a dorok. Ifes e wat i ku won, a da nɛ kpa ka ba nɔɔk kuyak.

³²Nawuwuri, ama fi kunom mi kpa, banet tses ba sɛs aYeso na bafi nzam nrɔk bà, nɛ bafi nrɔk itséng.

³³Banet iwɔp e ngma kusum, ka na tusung atitu ari me.

³⁴AYeso tes banet dot bafi nrɔk zizɛɛt kyang. A tɛ turung itséng dot, a nɔɔk itséng e kawat icɛɛt awo, nek i ku rēn gyat.

³⁵Na bop adiding, nɛ karɔ rèn resek hwyi, aYeso dorok, a won kari me, a tse narɔ fɛ́ ka se yuu, a ra awon azɔng.

³⁶ASiman nɛ bafidang itseet wu, ba tsɛ ba tsɛt aYeso,

³⁷ni izen fɛ́ ba ku sɛ, ba fɛ̀ ni wu, “Kaangan tsin da tsɛt!”

³⁸AYeso fɛ̀ ni ba, “Won in tseng yit sak abak kakak, sak na naban nwɔp na bakat, nɔng in da tsin shara yit ifɛ̀ itek azɔng bà. Nek ikyɛng fi i bɛ́ ni imi dɔng.”

³⁹Nek anɔng, a teng a kat kaakɛ ni mben aGalili, na shara ifɛ̀ itek na narɔ inyis baYahuda, na turung itséng ni nrɔm banet.

⁴⁰Akparong akak tsɛ a ku sɛ, a te akuut aben, a ku tsot akabɔk fok, “Ki i fi shim, ki i di te halal.”

⁴¹Ayɛt angmishish, aYeso fɛ̀ ni wu, “Ey, in shim anɔng.” A nabak kubɔk, a ku ra mo, a fɛ́ ni wu, “Te halal!”

⁴²Ni izen izining, ikparong e wat i ku won, a te halal.

⁴³AYeso ma fɛ ni wu na tseng, a ku kɔrɔk kuto yɛ,

⁴⁴“Fok! I bi tak akak ikyɛng deng awo. Awɛt di berem, tsi tonong ice ngɔn sak na àware, tsi nabak kunang ashosh ngɔn kpaf ti ikyɛng fi ntsi aMusa ki tees yit nek ikanang. Nye anɔng mok i di tonong isɛ kukyang ngɔn.”

⁴⁵Awɛt anet e wuruk, a kpa a teng a shara ikyɛng fi ite. Nek anɔng, aYeso kyem a tɛ kat washak ayɛt iwɔp e kong awo, tit na sosok ama iwɔp, na narɔ fɛ́ na se yuu. Ngma na anɔng, na banet nes na narɔ zizɛɛt, ba tsɛ ba ku sɛs.