Read icen AMarkus 14 Bible Online

AMarkus 14 - icen bible

AMarkus 14

¹Ishɛrɛp nkɔs nfaa nɛ amok iyiring ni nzem aPasova, ni nzem iya aKpam vit ayist. Bagbat áware nɛ bafi itees ntsi aMusa tsɛt irèn fɛ́ ba di ki tekap aYeso ni nɛt, na ba ku fɛt.

²Awɛt ba fɛ̀, “In bi nye yit nizen amok awo, kɔn banet bi ki dorok nhwyɛ.”

³AYeso se na aBetani ari aSiman fɛ́ a kin yet akparong. Na aYeso tsin yas, abining akak ne ni kitsung kuta alabasta fɛ́ ba nye, fɛ́ ka se ni shining na name nkɔn ntek, na fi itsɔm makiyi, ba nye name me na anaat. A fo kaban tsung e, a ma korok aYeso name me ni ice.

⁴Anɔng e sak batsen beseng iyɛ, ba te kanak, “Akyɛ bɛ ni ibeseng name nang anɔng ɛ?

⁵Kɛ ba fɛ̀ ba rɛp ina, ki iwat itsɔm itarang anet itomong nfi iyɛ gburang, ke ba sok itsɔm e, na ba kaba bakan e, ki iwat!” Ba ma gyɔng abining e gyet awo.

⁶Awɛt aYeso fɛ̀ ni ba, “Ku won yin! I kudaam yin nek anɛ? A mi di nye ikyɛng itek.

⁷Bakan e se gung ni yin kaakyi izen, ngma izen fi ishim i ka ba sɛ yin mo, i da nye yin. Awɛt imi se gung ni yin kaakyi izen awo.

⁸Abining yong mi nye ikyɛng fɛ́ a da kyem a nye. A mi di korok name ni rɔm, nɔng a di ki nye gyam nek kunɛt hom.

⁹Won in ki tak yin atsak, kaakɛ fɛ́ ba da shara ifɛ̀ itek na azatse kang ngma kusum, ba da teng ba taas ikyɛng fɛ́ abining yong nye, nek iyiring ni wu.”

¹⁰Ba se na nɔng, aJudas aIskariyoti, azining ayɛt bafi imɛɛs wu kusɔk abe faa me, a tse narɔ bagbat áware nɔng a da bin ka ba nabak mo aYeso.

¹¹Izen fɛ́ ba fok anɔng, ba nye iyɛ ikan makiyi, ba fɛ̀ ey, fok ba da ku nɔɔk itsɔm. Nek anɔng, aJudas kpa tsɛt irèn fɛ̀ a di ki nabak aYeso.

¹²Ni kunom kufi imɛsɛng amok iya akpam vit ayist, fi ku yet kufi itsɛɛk aturuk gyam nek amok e, bafi imɛɛs wu tsɛ ba ku rip ye, “Akɛ fi ngɔn shim ni in tsin da nye yit e, nek iya amok aPasova me yɛ?”

¹³Wat aYeso tom bafi imɛɛs wu bafaa, a fɛ̀ ni ba, “Tseng yin ayɛt iwɔp, anet akak fɛ́ a sok itsung ashi da nyim ni yin. Ku kuus yin mo.

¹⁴Ngma kari fɛ́ a di nɔ, fɛ̀ yin nɛ anet ari me, ‘Anet itees risim, kutu fɛ́ a di ki ya amok aPasova nɛ bafi imɛɛs wu akɛ?’

¹⁵A da ki tonong yin kutu aton kuratek fɛ́ ba mi nye iko gyam. Azɔng wu fi i da ki nye yit nayak e.”

¹⁶Bafi imɛɛs e tseng, ba nɔ ayɛt iwɔp e, ba tsɛ ba sɛ nkyɔrɔk e kpaf tɛ aYeso ka ba tak. Ba nye aPasova me.

¹⁷Izen fɛ́ kahwyɛ nye, aYeso nɛ bafi imɛɛs wu kusɔk abe faa tsɛ ba ta ari me.

¹⁸Fɛ́ ba se ni kuyak, aYeso fɛ̀ ni ba, “Won in ki tak yin atsak, azining ayɛt yin bi di nabak, ayɔng a tsin tes kubɔk na tsereng gung ni mi.”

¹⁹Wat bafi imɛɛs e beseng iyɛ, ba kpa ku risim bazizining, “Ki imi yɛ?”

²⁰AYeso ka ba bun ni ifɛ̀ yɛ, “Azining ayɛt yin kusɔk abe faa me, ayɔng fɛ́ a tsin tes kubɔk gung ni imi na tsereng kazining.

²¹Arim Anet da ku kyɔn ti i se ni jɛk naton wu. Awɛt kawɛy naton anet yɔng fɛ́ a bi nabak Arim Anet! I bi se kanduk kɛ da ba ku tes ngma awo.”

²²Na ba tsin ren yas, aYeso sok akpam e, a nɔɔk Adakunom ifeng, a ma bushung, a nɔɔk bafi imɛɛs wu, a fɛ̀, “Nga yin, kurɔm hom kang.”

²³A ma sok aridɛ, a nɔɔk Adakunom ifeng, a ka ba nabak e, ngma ba, ba sɔ ayɛt e.

²⁴AYeso ma fɛ̀ ni ba, “Nasok hom nang. Nasok irosom kushi, fɛ́ ba da nosong nek banet dot.

²⁵Won in ki tak yin atsak, in bi tin sɔ ashi anap nang awo, tit kunom yɔng fi in bi sɔ ina afas ni igwɔm Adakunom.”

²⁶Ama fɛ́ ba ra abom, ba ma wuruk sak ni Ahwyanang Ifat.

²⁷AYeso ma fɛ̀ ni ba, “Ngma yin i da teng yin, ni i di won yin, nek i se ni ijɛk yɛ, ‘In bi rus anek e, ni ítsamang e te sharatat.’

²⁸Awɛt, ama fi mi dorok ni irɛk, in da tung tseng ashon yin sak na aGalili.”

²⁹Wat aBitrus fɛ̀ ni wu, “Kɛ ngma ba ba tirik ba da won, imi da tirik awo.”

³⁰AYeso fɛ̀ ni wu, “Won in da tak katsak, natuk atut, dang atsanyon na tɛp ite kafaa, ngɔn di ki toon ite kataat.”

³¹Awɛt na aBitrus bang nye na agap fok, “Kɛ da in da ku gung ni ngɔn, in da ka toon awo.” Ngma ishɛrɛp bafi imɛɛs wu fɛ̀ anɔng bà.

³²Ba tsɛ ba ta narɔ fɛ́ ba yes ika aGetsemani, aYeso fɛ̀ nɛ bafi imɛɛs wu, “Sonong yin azeng. Imi yɔng in tsin ra awon.”

³³A sok aBitrus nɛ aYakubu nɛ aYohana gung ni wu. A wat a nɔ kudaam makiyi, nkap wat nte gbɛrɛk.

³⁴A fɛ̀ ni ba, “Iyɛ min mi shining ni ibeseng iyɛ makiyi, ngmash ni wey ni imi. Sonong yin azeng, ni yɛrɛ yin yɛɛt.”

³⁵Ni izen fɛ́ a bang tseng ashon gyet, a sak akut aben, a kpa ra awon fok, ki kushim fi ku yet kusɛ, kɛ ba ku sok izen mgbang e yɔng.

³⁶A fɛ̀, “Ada, Ada hom, vit ikyɛng fi i da gaat. Di sok kitsɛ̀n mgbang kang. Ngma nɛ anɔng, nye ikyɛng fi ngɔn shim, da idɔng fi imi shim awo.”

³⁷Ama fɛ́ a bun, a bɛ́ sɛ bafi imɛɛs wu bataat e ni nda. A fɛ̀ na aBitrus, “ASiman, i se ni nda yɛ? Ngɔn da kyem i sot ni iyɛrɛ afi agyip azining awɛ?

³⁸Yɛrɛ yin ni ra yin awon, kɔn i bi kpa yin ni imara. Kabik shim, awɛt kurɔm se gbɛrɛk.”

³⁹A tɛ bun a tsɛ ra awon, kpaf na awon fɛ́ a mi tsang ra.

⁴⁰Ama tɛ bes wu, a tɛ a ka ba sɛ na ba se ni nda, nek ayisi bá mi shining ni nda. Ba kyɛm ba fɛ̀ ni wu ikyikak awo.

⁴¹Izen fɛ́ a tɛ bun, ibun ifɛ́ taat, a fɛ̀ ni ba, “Irēn resek yin ni nda ni fɔrɔng yin ɛ? I mi kyem anɔng! Di yin, izen mi nye fɛ́ ba da nabak Arim Anet ni mbɔk bafi inɛn.

⁴²Dorok yin, ni in tseng yit! Anet inabak hom me yong a wuruk!”

⁴³Na aYeso tsin rēn cɛɛt, aJudas, azining ayɛt bafi imɛɛs wu kusɔk abe afaa me, bɛ́ a ta gung ni kudyɛng banet fɛ́ ba berese áwal, ni íshɛn. Ayet bagbat áware, nɛ bafi itees ntsi aMusa, nɛ bashɔn e, iba ba, ba ka ba tom.

⁴⁴Anet nabak e, mi tsang ka ba tonong ikyɛng i te kyɛbɛt: “Ayɔng fi in ku te show ni ira na kanu, iwu me yɔng. Ku tekap yin, tseng yin ni wu, ku tosok yin yɛɛt.”

⁴⁵Na ba tsin ta narɔ me kyɛk, aJudas di berem tsik sak narɔ aYeso, a fɛ̀ ni wu, “Anet itees!” Na ma ku ra ashow e ni ira na kanu.

⁴⁶Wat banet e tekap aYeso, ba ku yit gak.

⁴⁷Wat azining ayɛt bayɔng fɛ́ ba se ni nyeseng azɔng, a kɔrɔk awal wu, a di tɛmɛng kuto asam agbat-agbat àware, a tɛn iko.

⁴⁸AYeso fɛ̀ ni ba, “Ma i bɛ́ yin na áwal, ni íshɛn nɔng i di yit yin mo, ti imi yet akɔk-ashon idoro nhwyɛ yɛ?

⁴⁹Kaakyi kunom, imi se gung ni yin ni itees banet ni itu iya Adakunom ntong, wat da i di tekap yin awo. Awɛt ite anɔng, nɔng ba di shining ikyɛng fɛ́ ba kin jɛk na afumung aJɛrɛ.”

⁵⁰Ama nɔng, ngma bafi imɛɛs wu ku won, ba teng.

⁵¹Acam akak se ni kuus aYeso ama, a se ni kukpin alinɛn kusɔp. Banet e shim ba ku tekap,

⁵²a hwyet, a ka ba won kukpin irɔm wu me, a teng hwyɛrɛm.

⁵³Ba ta aYeso ashon sak na agbat-agbat àware, azɔng wu ngma bagbat áware, nɛ bashɔn, nɛ bafi itees ntsi aMusa kana tusung mo.

⁵⁴ABitrus ka ba kuus mo ama yik-yik. A tsɛ nɔ na atasa ari agbat-agbat àware me. A tsɛ sonong ifoos kurong gung na bafi itot kari me.

⁵⁵Bagbat áware, nɛ ngma bafɛ́ azumung ishɔt e, ba teng ba tsɛt ikyɛng fi ida yet kanu ifɛ̀ ifi inɛn fɛ́ ba di ki bɔ aYeso ne, nɔng ba da ku fɛt mo, awɛt ba kyɛm ba sɛ awo.

⁵⁶Banet dot bɛ́s ba taas mbɔɔs naton wu, awɛt mbɔɔs bá me nyis awo.

⁵⁷Ama anɔng, banet bakak dorok tsik, ba taas mbɔɔs naton aYeso yɛ,

⁵⁸“In fok yit a fɛ̀, ‘In da fo kutu iya Adakunom ntong kang fɛ́ banet nok, ni in nok kukak ayɛt nkɔs ntaat, fɛ́ da banet ba ba nok awo.’ ”

⁵⁹Ngma na anɔng, ncɛɛt bá me nyis awo.

⁶⁰Wat agbat-agbat àware me, dorok tsik ashon ba, a fɛ̀ na aYeso yɛ, “Ngɔn bi ikyɛng ifɛ̀ naton kukun kang fɛ́ banet bang bene naton ngɔn awɛ? Akyɛ fi da fɛ́ naton ice ngɔn ɛ?”

⁶¹Awɛt aYeso te yuu, a bun ni ifɛ̀ awo. Agbat-agbat àware me tɛ a ku rip yɛ, “Kɛ ngɔn wu i yet aKristi, Arim afɛ́ Awɛng e yɛ?”

⁶²AYeso ku bun ni ifɛ̀ yɛ, “Ey, imi wu. I bi di yin Arim Anet ni sonong ni bɔk iyak Azɔk Bazɔk Adakunom, na tsin bɛ́s wu ayɛt anɔk aton azanɛn.”

⁶³Ni fok anɔng, agbat-agbat àware sarak kukpin wu, a fɛ̀, “Akyɛ kuri kanu icɛɛt ama ideng fi in ti tsɛt yit kong ɛ?”

⁶⁴“I mi fok yin, kuri ibyɛs fɛ́ a nye Adakunom e. Akyɛ fi i yet kuyiring yin ɛ?” Ngma banet e, moon ntɔ yɛ na ba fɛt aman.

⁶⁵Bakak ba ba kpa ku cish acicɛ, ba ku fam ayisi, na ba ku tsot, na ba ma ku risim yɛ, “Tak ibes, angan wu a da rus ɛ?” Bafi itosok kari me ku sok, ba ku tsot.

⁶⁶Na aBitrus rēn resek mo aben na atasa ri me, kanamang akak fɛ́ ka yet asam ari agbat-agbat àware me bɛ́.

⁶⁷Izen fɛ́ ka di aBitrus tsin fok kurong, ka di sak ayisi ni wu, ka fɛ̀ ni wu, “Ngɔn bà i se gung na aYeso, anet aNazaret yong!”

⁶⁸Awɛt aBitrus toon ne, a fɛ̀, “I mi rēn ikikak kɛ ikyɛng fi icɛɛt naton e ngma awo.” Ni fɛrɛng anɔng, a wuruk ni irèn inɔ atasa ari me sak ayet itu nyɛnɛng. Ba se nɛ anɔng, atsanyon wat a tɛp.

⁶⁹Izen fɛ́ kanamang fɛ́ ka yet asam e tɛ ka ku di azɔng, ka tak bayɔng fɛ́ ba se ni nyeseng azɔng yɛ, “Anet yong yet azining bá.”

⁷⁰ABitrus tɛ a toone. Ama kizen gyet, banet bakak fɛ́ ba se ni nyeseng bakat na aBitrus fɛ̀ ni wu, “Na atsak e, ngɔn yet azining bá nek ngɔn yet anet aGalili.”

⁷¹Wat a kpa yes kawɛy naton ice wu, na woso nyes kushi nanu shon ba yɛ, “Imi rēn anet e yong fi icɛɛt yin naton wu ngma awo.”

⁷²Izen izining atsanyon wat a tɛp ka fɛ́ afaa. Wat aBitrus yiring ni ikyɛng fɛ́ aYeso kin ku tak yɛ, “Dang atsanyon na tɛp ifɛ́ afaa, ngɔn di ki toon ite kataat.” A yiring ni kucɛɛt e, a tos makiyi.