Read icen AMarkus 15 Bible Online

AMarkus 15 - icen bible

AMarkus 15

¹Na abop adiding, agbat-agbat àware, nɛ bashɔn, nɛ bafi itees ntsi aMusa, nɛ ngma bafɛ́ azumung ishɔt e moon kanu. Ba rosom aYeso, ba ku ta ashon ba tsɛ ba nabak aBilatus ne.

²ABilatus ku nye irip yɛ, “Ngɔn wu i yet agwɔm baYahuda me yɛ?” AYeso ku bun ni ifɛ̀ yɛ, “Ngɔn tak kpaf.”

³Bagbat áware me te kukun wu naton nkyɔrɔk gaan.

⁴ABilatus tɛ a ku rip yɛ, “Ngɔn bi ikyɛng ifɛ̀ awɛ? Di bayɔng ba mi te kukun ngɔn naton nkyɔrɔk dot.”

⁵Awɛt aYeso sot yuu dang fɛrɛng ikyikak, ikyɛng e te aBilatus yɔɔt.

⁶Kaakyi izen amok aPasova, aBilatus mi di mɛɛ na te washak afɛ́ ari inyang azining fɛ́ banet e rip.

⁷Ni izen e yɔng anet akak kin di se fɛ́ ba ku yes aBarabas, a se ari inyang gung nɛ banet bakak fɛ ba kin fɛt anet ni izen fɛ́ ba kin dorok kuhwyɛ.

⁸Kudyɛng banet tsɛ ba ra awon na aBilatus fok, na ka ba nye nɛ ikyɛng fɛ́ a mi di mɛɛ na nyes.

⁹ABilatus ka ba rip yɛ, “Iyin shim yin in ki bisik yin agwɔm baYahuda yɛ?”

¹⁰Nek a rēn fok, a yet nek ifup de fi i sak bagbat áware nabak aYeso ni bɔk wu.

¹¹Awɛt bagbat áware me, tees kudyɛng banet e fok, na ba rip aBilatus, na ka ba te washak aBarabas aza aYeso.

¹²ABilatus tɛ a ka ba rip ye, “Yɔkɔnɔng, akyɛ fi in da nye na ayɔng fi iyin ku yes yin agwɔm baYahuda yɛ?”

¹³Ba ta nkun fok, “Ba ku tegak!”

¹⁴ABilatus ka ba rip yɛ, “Akyɛ sak ɛ? Akyɛ inɛn fɛ́ a ra yɛ?” Ba di ban itang nkun na agap yɛ, “Ba ku tegak!”

¹⁵ABilatus nek a shim a tɛrɛk kudyɛng banet e iyɛ, a ka ba bisik mo aBarabas. Ama me, a sak ba nye aYeso ahwyereng, ama ku nabak na ba ku tegak.

¹⁶Ama anɔng, batsom e ta aYeso ashon sak na katasa agwɔmna (fɛ́ ba yes ika fok aPiritoriyum) ba ma yes ngma ishɛrɛp batsom e.

¹⁷Ba te aYeso kugboo kukpin asiliki kuri kufɛ́ bágwɔm, ba ma bat abong itsitsan, ba ku te ne ni ice.

¹⁸Wat ba kpa ku nye ashow ifoos afa yɛ, “Kutset agwɔm baYahuda ni ku sot kusɔɔp!”

¹⁹Ba ku tsosok mo ice ni ishɛn, na ba ku cish mo acicɛ. Ba nye gururuk nanu ashon wu, tɛ ba tsin ku nesek mo iratek.

²⁰Ama fɛ́ ba mi gang i ku tonoso ibyɛs, ba tun kugboo kukpin asiliki me, ba ku te mo ku fuu. Ba ku ta ashon nɔng ba da tsɛ ba ku tegak.

²¹Na ba se ni irèn, ba nyim na anet akak fɛ́ ba ku yes aSiman, anet aSirin, ada Alekzanda nɛ aRufus, na tsin ne na ayit sak i tse na yet iwɔp, batsom e ku te mo gbing-gbing na a sok kukon itegak aYeso.

²²Ba ta aYeso ashon sak narɔ fɛ́ ba yes aGolgota fɛ́ a yet, karɔ akup ace banet.

²³Azɔng ba ku nɔk ashi anap fɛ́ ba moon ni ikan fɛ́ ba yes ide amur, awɛt a rawu dang sɔ.

²⁴Ama fɛ́ ba mi ku tegak, ba kabasa ares wu ni irèn ibara icang nɔng ba da di ikyɛng fɛ́ kaangan da sɛ.

²⁵Ni itsɔm bɔk agyɛng-ataat afɛ́ diding wu fɛ́ ba ku tegak.

²⁶Naton kukon e, ba kin di jɛk ikyɛng fɛ́ ba di te kukun wu me yɛ, “AGWƆM BAYAHUDA.”

²⁷Ba tegak bakpatang agap bafaa gung ni wu bà, azining ni bɔk iyak wu, na zining ni bɔk imen wu.[7]

²⁸

²⁹Banet fɛ́ ba se ni igorok, nye digit ice, na ba tosong aYeso, na ba nye ni wu, “Nya! Ngɔn fi i fɛ̀, da yirik kutu iya Adakunom ntong, ni ma nok iko ayɛt nkɔs ntaat.

³⁰Kɔ tik! Naton kukon itegak kang, da sheshek ice ngɔn.”

³¹Anɔng bà, bagbat áware, nɛ bafi itees ntsi aMusa ba tonong aYeso ibyɛs, na ba nye ni ice bá yɛ, “A sheshek bakak, awɛt isheshek ice wu ku gaat!

³²Won aKristi agwɔm aIsrela yong, na tik naton kukon itegak kang, nɔng in da di yit ni nɔɔk yit atsak!” Bakpatang agap yɔng fɛ́ ba ka ba tegak gung ni wu ku tonong ibyɛs bà.

³³Na tetenom, kurin te gip ngma mben e kusum, sak ni itsɔm bɔk itaat ifɛ́ ahwyɛ.

³⁴Ni itsɔm bɔk itaat, aYeso ta kutɔ gbɛrɛy, a fɛ̀, “Eloy, Eloy, lama sabaktani?” Fi itonong fok, “Adakunom hom, Adakunom hom, akyɛ sak fi ngɔn di wobok ɛ?”

³⁵Bakak fɛ́ ba se azɔng ni nyeseng fok anɔng, ba fɛ̀, “Fok yin, ayɔng a tsin yes atan aIliya.”

³⁶Wat azining ayɛt ba, a ta itsi, a tsɛ shumung asoso ayɛt ashi ajatang e, a tubuk ni kukon, a nabak aYeso ne na a sɔ. A ma fɛ̀ ni ba yɛ, “Won yin kyɔn ni in di yit, kɛ atan aIliya me da bɛ́ a ku tik naton kukon itegak kang.”

³⁷AYeso ta kutɔ na agap, a ma kɔrɔk nsong igang e.

³⁸Ama anɔng, kukpin fɛ́ ku tsang fam ni itu iya Adakunom ntong, wat ku sarak asa afaa, itumung naton sak aben.

³⁹Izen fɛ́ agbat afɛ́ batsom fɛ́ a se ni nyeseng bakat azɔng, a di irèn fɛ́ aYeso di ku, a fɛ̀, “Na atsak e, anet yong yet Arim Adakunom!”

⁴⁰Banyining bakak se ni nyeseng yik-yik na ba yɛrɛ. Ayɛt ba, a kin yet aMarya afɛ́ aMagadala, nɛ aMarya, nggɔ aYakubu a wosong aJoses, nɛ aSalomi.

⁴¹Neeme na aGalili, banyining bang kin ku kuus mo na ba ku gbinding kutomong wu. Banyining bakak dot fɛ́ ba kin ne gung ni wu na aRushelima kin se azɔng bà.

⁴²Izen fɛ́ kahwyɛ nye, fɛ́ ba nyes nkyɔrɔk gyam nek akatson e yet kunom aSabat.

⁴³Arum akak fɛ́ ba ku yes aYusufu afɛ́ Arimatiya, azining ayɛt bafɛ́ azumung bashɔn, azɔk, afi ite iyɛ kubɛ́ igwɔm Adakunom. A yit iyɛ, a tse na aBilatus, a ra awon ni wu na a ku nɔk kukom aYeso.

⁴⁴ABilatus te yɔɔt ni fok fok aYeso mi ku. A ma yes agbat afɛ́ batsom e, a ku rip kɛ a yet atsak e aYeso mi ku yɛ?

⁴⁵Fɛ́ a fok ifɛ̀ me yet atsak nanu agbat afɛ́ batsom e, a nɔɔk aYusufu me irèn na tsɛ a sok kukom e.

⁴⁶AYusufu me tsɛ a shan kúrú alinɛn, a bɛ́ tik ni kukom e, a ma kunung iko ni kúrú alinɛn, a tsɛ nɛt iko ni rɛk yɔng fɛ́ ba ta iko na asɔs kuta. A ma bingiring kunyin kuta, a di fam katisi irɛk e.

⁴⁷AMarya afɛ́ aMagadala, nɛ aMarya nggɔ aJoses, ba se ni yɛrɛ, ba di karɔ fɛ́ ba nɛt kukom aYeso me.