Read icen AMarkus 16 Bible Online

AMarkus 16 - icen bible

AMarkus 16

¹Ama fi kunom aSabat bi ku got, aMarya afɛ́ aMagadala, nɛ aMarya nggɔ aYakubu, nɛ aSalomi, ba shan name fɛ́ na bi nkɔn ntek, nɔng ba da bi tsɛ ba tes kukom aYeso ne.

²Na bop adiding, kunom imɛsɛng inyim nnom, ni kunom tsin wuru kyɛk, ba yit irèn sak ni rɛk e.

³Ni ba ren resek mo ni irèn, ba kpa tɔ wɔɔn bá, yɛ, “Angan wu, a da ki bingiring yit kuta ifam katisi irɛk e yɛ?”

⁴Awɛt izen fɛ́ ba ta yisi naton, ba di ba mi tsang bingiring kuta me sak ni fam. Kuta me kin yet kuratek.

⁵Izen fɛ́ ba nɔ ni irɛk e, ba di acam akak ni sonong ni bɔk iyak ayɛt ares akan, ba wat ba te beke.

⁶A fɛ̀ ni ba, “I bi fok yin nnyim awo. Imi rēn, i tsin tsɛt yit aYeso Anet aNazaret, ayɔng fɛ́ ba kin tegak. A se azeng awo, a mi dorok ni ifaben. Di yin, karɔ fɛ́ ba kin mes kukom e.

⁷Nek anɔng, tsɛng yin, i da tsi i tak yin bafi imɛɛs wu ngma na aBitrus, fok, ‘Ayɔng a tseng ashon yin sak na aGalili, azɔng wu ba da ku di, kyɔn tɛ a kin ka ba tak.’ ”

⁸Ayɛt nnyim nɛ ayɔɔt, banyining e, wuruk ni irɛk e ni itsi. Dang cɛɛt na bafidang nek nnyim.[8]

⁹Ama fɛ́ aYeso mi dorok ni irɛk bop nadiding ni kunom imɛsɛng nyim nnom, a tun tonong ice wu sak na aMarya afɛ́ aMagadala, iwu me yɔng fɛ́ aYeso kin mang ku tun ítseng kanakataat ni rɔm.

¹⁰A tsɛ a tak bayɔng fɛ́ ba kin se gung nɛ aYeso, fɛ́ ba se ayɛt kafa kawe, na kanak.

¹¹Ni izen fɛ́ ba fok, fok aYeso mi dorok ni kutset, iwu mi ku di, wat ba raba inɔɔk atsak.

¹²Ama nnang, aYeso tonong ice wu ni irèn ikak zɛɛt sak na bafi imɛɛs wu bafaa, ni izen fɛ́ ba se ni irèn i tse sak ayɛt kaban wɔp.

¹³Izen fɛ́ bafaa me bɛ́s ba, ba tak ishɛrɛp bafidang bá, awɛt ngma na anɔng, ba raba dang nɔɔk atsak ni ifɛ̀ me.

¹⁴Ama me, aYeso tonong ice wu sak na bafi imɛɛs kusɔk abe zining e, ni izen fɛ́ ba se ni kuyak. A kpa ka ba gyɔng naton avit inɔɔk atsak, nɛ ákashalang iyɛ bá, nek da ba nɔɔk atsak ni ifɛ́ bayɔng fɛ́ ba ku di ama iku awo.

¹⁵A fɛ̀ ni ba, “Tseng yin kaakyɛ ayɛt azatse, ni shara yin ifɛ̀ itek e sak na banet ngma.

¹⁶Ngma ayɔng fɛ́ a nɔɔk atsak, ba ku ra abatisma, a da sɛ isheshek. Awɛt ngma ayɔng fɛ́ da a nɔɔk atsak awo, ishɔt bi ku ya.

¹⁷Ntomong na fɛ́ bafi inɔɔk atsak ni imi bi nye: I bi turung yin ítseng ni iyerek hom, i bi cɛɛt yin ni ilem ikak zizɛɛt.

¹⁸Ba bi kok íhwyen ni mbɔk. Izen fɛ́ ba sɔ nadɔm fɛ́ na saas iku, awɛt na bi ka ba nye ikyikak awo jɛm-jɛm. Ba bi saas mbɔk naton bafi nrɔk, na ba sɛs kukyang.”

¹⁹Ama fɛ́ aTisa aYeso mi gang ncɛɛt ni ba, a dorok sak azanɛn, a sonong ni bɔk iyak Adakunom.

²⁰Bafi imɛɛs e wuruk, ba kat kaakyɛ na ba shara ifɛ̀ itek. ATisa ras kutomong ni iba, fi i tonong atsak Ifɛ̀ me naton nkyɔrɔk abes fɛ́ ba kin ras.