Read icen AMarkus 2 Bible Online

AMarkus 2 - icen bible

AMarkus 2

¹Ama nkɔs gyet, aYeso tɛ a bun sak na aKafarnahum, banet fok, fok a mi bɛ́s wu ari.

²Nek anɔng, kudyɛng banet ka na tusung, banet shining kutu me sak amatse vit kawat ngma kusum sak atisi itu me. AYeso ma ka ba shara ifɛ̀ itek.

³Banet bakak ne na anet akak fɛ́ a bɔrɔng nɛ aduru irɔm, ba ku sok iba banaas.

⁴Nek ba bit kawat fɛ́ ba di ki got ni wu sak narɔ aYeso, nek kudyɛng banet e, ba tsɛ ba ta ibong na agubuk itu me kpaf ni ice aYeso, ama fɛ́ ba mi ta ibong e, ba tik na kameneng e na afi irɔk e ni ka.

⁵Fɛ́ aYeso di inɔɔk atsak bà, a fɛ̀ nɛ anet irɔk aduru irɔm e, “Nggon, ba mi da fuut anɛn ngɔn.”

⁶Ni izen e yɔng, bafi itees ntsi aMusa bakak kin se ni sonong azɔng, ba se ni kuyiring wɔɔn ba fok,

⁷“Akyɛ sak fɛ́ anet yong cɛɛt anɔng ɛ? Di yin fɛ́ a tsin beseng iyerek Adakunom! Angan kyem na a fuut anɛn kɛ da Adakunom aziwu awɛ?”

⁸Ni izen izining aYeso wat a rēn ni iyɛ wu, ikyɛng fɛ́ ba se ni iyiring na ayɛ bá, a fɛ̀ ni iba, “Akyɛ sak fi i tsin nye yin kuri kuyiring yɔng ɛ?

⁹Ingan deng de fi idung se byɛrɛ yɛ? Na ba fɛ̀ na anet irɔk e, ‘Ba mi da fuut anɛn ngɔn,’ kɛ na ba fɛ̀ ni wu, ‘Dorok, sok kameneng ngɔn, da tseng ɛ’?

¹⁰Awɛt nek iyin di ki rēn yin fok Arim Anet bi ice azatse na fuut anɛn.” A fɛ̀ na anet irɔk aduru irɔm e,

¹¹“Imi fɛ̀ ni ngɔn, dorok tsik, sok kameneng ngɔn, tseng sak ari.”

¹²A dorok tsik, a sok kameneng wu, a wuruk amatse na ayisi banet ngma. Ikyɛng e te banet ngma kusum yɔɔt, ba tere Adakunom, na ba nye, “Iyit ki mang di yit ikikak ti ideng awo!”

¹³AYeso tɛ a wuruk sak abak izek aGalili. Kudyɛng banet nes, na ya kashon i ka ba tees.

¹⁴Na tsin se ni kutseet, a di aLawi arim Alfayus ni sonong ayɛt kubut ishashang itsɔm mben, aYeso fɛ̀ ni wu, “Di kuus mo,” aLawi dorok, a kpa ku kuus mo.

¹⁵Ni izen fɛ́ aYeso kin se ni iya kuyak atuk ari aLawi, banet ishashang itsɔm mben dot nɛ bafi inɛn kin se ni iyas gung ni wu nɛ bafi imɛɛs wu, nek banet kin se dot fɛ́ ba kin ku kuus mo.

¹⁶Ni izen fɛ́ bafi itees ntsi aMusa fɛ́ ba yet BaFarasi, ku di a tsin yas na bafi inɛn nɛ bafi ishashang itsɔm mben, ba rip bafi imɛɛs wu yɛ, “Akyɛ sak fɛ́ a yas nɛ bafi ishashang itsɔm mben nɛ bafi inɛn ɛ?”

¹⁷Ni fok anɔng, aYeso fɛ̀ ni ba, “Da ayet bafi kukyang ba fɛ̀ ba tsɛt abok awo, tit bafi irɔk. Da imi bɛ́ nek iyes bafi kusot kutabat awo, tit bayɔng fɛ́ ba yet bafi inɛn.”

¹⁸Ni izen e yɔng, bafi imɛɛs aYohana anet abatisma nɛ BaFarasi kin se ni itekap anu. Banet bakak tsɛ ba rip aYeso fok, “Akyɛ sak fɛ́ bafi imɛɛs aYohana nɛ bafi imɛɛs BaFarasi se ni itekap anu, awɛt bafɔɔn tsan anɛ ba ra awɛ?”

¹⁹AYeso ka ba bun ni ifɛ yɛ, “Ba da tsan anɛ ba sak bafidang amatek agwol na ba tekap nanu, ni iwu rēn resek gung ni iba yɛ? Ba da kyem ba nye anɔng ni iwu resek mo gung ni ba awo.

²⁰Awɛt izen bi nye fɛ́ ba bi sok amatek agwol e ni bá. Atuk e yɔng, ba bi tekap nanu.”

²¹“Vit anet fɛ́ a sok icɛk ikpin ifas na di toos ibong kugyɛt ikpin, nek kɛ a nye anɔng, ni icɛk ikpin ifas e, sam agyɛt ikpin e, ni ibong e ban sarak.

²²Vit anet fɛ́ a korok ashi anap afas ni itsung-kuruu kuzen, nek kɛ a nye anɔng, ashi anap e da fo kuruu me, na ba bit ashi anap e ni kuruu me. Da ba nye anɔng awo, ba korok ashi anap afas e ni kuruu kufas.”

²³Atuk aSabat akak, aYeso kin se ni igot nate akɔ alikama, na ba se ni kutseet, bafi imɛɛs wu hwyii ace alikama.

²⁴BaFarasi fɛ̀ na aYeso, “Di, akyɛ sak fɛ́ ba ras ikyɛng fi ntsi ro ni ira me atuk aSabat ɛ?”

²⁵AYeso ka ba bun ni ifɛ̀ yɛ, “Iyin ki mang fa yin ikyɛng fɛ́ Agbat agwɔm aDauda kin nye, ni izen fi iwu nɛ bafi itseet wu kin fok izong, ba tsɛt ikyɛng iya awɛ?

²⁶Ni izen fɛ́ Abiyatar kin yet agbat àware, agwɔm aDauda me, kin tsɛ a nɔ ni itɔmɔng Adakunom, a tsɛ a ya akpam ntsi Adakunom, a nɔɔk bafi itseet wu bà. Akpam me yɔng fi in ntsi fɛ̀ baware ba kyɛk fɛ́ ba ya.”

²⁷AYeso ma fɛ̀ ni ba, “Ba nye aSabat nek anet awe, da anet awe nek aSabat awo.

²⁸Nek anɔng, Arim Anet wu a yet aTisa ngma nɛ afɛ́ aSabat.”