Read icen AMarkus 3 Bible Online

AMarkus 3 - icen bible

AMarkus 3

¹AYeso tɛ a tsɛ a nɔ narɔ inyiis baYahuda. Anet akak fi kubɔk mi sɔrɔk, kin se azɔng.

²Bakak fɛ́ ba kin se azɔng, kin se ni itsɛt ikyɛng fɛ́ ba di ki sɛ aYeso ni inɛn, nek anɔng, ba di tup ayisi ni wu, nyɛn a da te anet e kyang atuk aSabat.

³AYeso fɛ̀ na anet fi kubɔk sɔrɔk e yɛ, “Dorok, ashon banet ngma.”

⁴AYeso ka ba rip yɛ, “Akyɛ de fi ntsi fɛ̀ na ba ra atuk aSabat ɛ? Na ba nye itek a, kɛ na ba nye imaan e yɛ? Na ba shan kutset a, kɛ na ba sok iko yɛ?” Awɛt iba di wey yuu.

⁵A tirik a ka ba yɛrɛk na kafa kawe, a beseng iyɛ makiyi nek ágbɔrɔk áyɛ bá. A fɛ̀ na anet e, “Nabak kubɔk ngɔn!” Anet e nabak iko, kubɔk e wat ku ti ku bun gyat.

⁶Ama anɔng, BaFarasi wuruk sak amatse, ba kpa tsɛt irèn iba nɛ banet-aHiridus, irèn fɛ́ ba da ki fɛt aYeso me.

⁷AYeso nɛ bafi imɛɛs wu, ka na kɔrɔk sak ni izek aGalili, kudyɛng banet fɛ́ ba ne na aGalili na aJudiya ka ba kuus mo.

⁸Ni izen fɛ́ ba fok ngma ikyɛng fɛ́ a se ne, banet dot nes na narɔ zizɛɛt, bakak nes ni mben aJudiya, bakak nes na aRushelima, bakak nes ni aIdumiya, nɛ bayɔng fɛ́ ba nes ni nyi kukyɛk aJodan, nɛ bafɛ́ aTiya, nɛ aSidon.

⁹Nek kudyɛng banet e, a sak bafi imɛɛs wu, na ba ku sak kukyɛ ashi kubaane gyam, kɔn banet bi ku nyɔ.

¹⁰Nek banet dot fɛ́ a tsang ka ba tes kyang, isak bayɔng fɛ́ ba se ni nrɔk, ka na nyɔ sak ashon nɔng ba da ku ra.

¹¹Ngma izen fɛ́ banet áduk ábik ku di, na ba kpas ashon wu, na ba tang nkun yɛ, “Ngɔn wu i yet Arim Adakunom.”

¹²Awɛt iwu ka ba kɔrɔk kuto, fok da na ba tak fok iwu yet angan awo.

¹³Ama anɔng, aYeso tsɛ a ngarak ni fam igung, a yes bayɔng fi iwu shim, ba tsɛ ba ku sɛ.

¹⁴A kasa kusɔk abe afaa, a ka ba te iyerek batom, nɔng ba da sot gung ni wu, nɔng iwu da ka ba tom, na ba shara ifɛ̀ itek,

¹⁵na ba sɛ ice iturung itseng.

¹⁶Banet kusɔk abe faa fɛ́ a kin kasa me ba; aSiman (yɔng fi iwu kin ku te iyerek aBitrus);

¹⁷AYakubu arim aZebedi nɛ arunyining aYohana (bayɔng fi iwu kin ka ba te iyerek aBuwanajis, fi i nyeseng naton Nnon Izá).

¹⁸Andarawus, nɛ aFilibus, nɛ aBatalomi, nɛ aMatiyu, nɛ aToma, nɛ aYakubu arim Alfayus, nɛ aTadiyus, nɛ aSiman anet afi ifup mben wu,

¹⁹nɛ aJudas aIskariyoti, ayɔng fɛ́ a kin ku rɛp.

²⁰Ama anɔng, aYeso nɔ ari kakak, kudyɛng banet e tɛ ba ka na tusung azɔng. Fi i sak iwu nɛ bafi imɛɛs wu kyem ba sɛ kawat iyak awo.

²¹Ni izen fɛ́ banet ari wu fok anɔng, ba tse nɔng ba da ku kɔrɔk, nek ba di fok, “Nhwyɛ mi wuruk ni rɔm wu.”

²²Wat bafi itees ntsi aMusa fɛ́ ba ne ne aRushelima, fɛ̀ yɛ, “ABɛɛlzɛbul mi ku nɔ! A tsin turung itseng e ni ice fɛ́ agwɔm itseng mi ku nɔɔk.”

²³Wat aYeso ka ba yes, a cɛɛt ni ba ayɛt igorok icɛɛt yɛ, “Na anɛ fɛ́ aShetan da turung aShetan ɛ?

²⁴Ki igwɔm mi kaba ice de, igwɔm e dɔng da nyeseng awo.

²⁵Kɛ kari mi kaba ice ka, kari me yɔng da nyeseng awo.

²⁶Kɛ aShetan kɔn ni ice wu, na kana kam, a da nyeseng awo; nkum wu mi bɛ̀.

²⁷Na tsak e, vit ayɔng fɛ́ a kyem a nɔ ari anet agap, na kok ares wu, tit ma a tun rosom anet agap e ninyɛn. Na nɛ na kok ares e.

²⁸Won in ki tak yin atsak, ngma anɛn, ni ibeseng iyerek fɛ́ banet nyes Adakunom e, ba bi ka ba fuut e.

²⁹Awɛt ngma ayɔng fɛ́ a beseng iyerek Kabik aJɛrɛ, jɛm-jɛm ba bi ku fuut e awo; inɛn e da nyeseng ni wu ayɛ vit igang.”

³⁰AYeso cɛɛt anɔng, nek iba fɛ̀ fok, “Aduk abik mi ku nɔ.”

³¹Ama anɔng, nggɔ nɛ barunyining aYeso tsɛ ba ta azɔng. Ba nyeseng amatse, ba tom akak ayɛt e na a ku yes.

³²Kudyɛng banet fɛ ba se ni sonong, ba mi ku te nate, ba fɛ̀ ni wu yɛ, “Nggɔ nɛ barunyining ngɔn yɔng amatse, ba tsin da tsɛt.”

³³AYeso ka ba rip fok, “Bangan ba, ba yet nggɔ nɛ baruneng hom ɛ?”

³⁴A ma yɛrɛk bayɔng fɛ́ ba sosok ba ku te nate, a fɛ̀, “Ba ba bà bá ba yet nggɔ nɛ baruneng!

³⁵Ngma ayɔng fɛ́ a nyes ikyɛng fɛ́ Adakunom shim, iwu fɛ́ a yet aruneng nɛ anganeng ni nggɔ hom.”