Read icen AMarkus 6 Bible Online

AMarkus 6 - icen bible

AMarkus 6

¹AYeso won azɔng, a bun sak ni wɔp wu, bafi imɛɛs wu tseng gung ni wu.

²Ni izen fi kunom aSabat nye, a kpa itees narɔ inyis baYahuda, banet dot fɛ́ ba fok ifɛ̀ wu, ayɔɔt ka ba yit, ba kpa kana risim fok, “Anet yong tsɛ a sɛ nkyɔrɔk nang akyɛ? A tsɛ a ne ni kuri kutsitsɛng kutsik ni kukyem kang akɛ fɛ́ a di ras ntomong abes ɛ!

³Iwu me yong fɛ́ a ras kutomong itosop ákon awɛ? Ayong wu a yet arim aMarya, arunyining ba aYakubu, nɛ aJoses, nɛ aJudas, nɛ aSiman, fɛ́ Banganyining se ni mbɔk yit awɛ?” Ikyɛng e wat i ka ba beseng iyɛ.

⁴AYeso fɛ̀ ni ba, “Kaangan a nesek atan iratek, tit bafi iwɔp wu, nɛ bafi izit wu, nɛ bafɛ́ ari wu kyɛk fɛ́ ba ku byɛs.”

⁵A kyem a ra ntomong abes azɔng awo, nkum bafi nrɔk gyet fɛ́ a di saas mbɔk ni ba, a ka ba tes kyang.

⁶A ku te kpɔrɔk, na vit inɔɔk atsak bà. Ama anɔng, aYeso teng a kat na naban nwɔp na tees banet ifɛ̀ Adakunom.

⁷A yes kusɔk abe faa me narɔ kazining, a ka ba tom bafifaa, bafifaa. A ka ba nɔɔk ice azaton áduk ábik.

⁸A fɛ̀ ni ba ane, “I bi bereng yin ikikak nek kutsɛt e awo, tit agbanding kyɛk. Da i bi bereng yin akpam, kɛ amala, kɛ itsɔm ayɛt agyɛm awit awo.

⁹Te yin akpatak, i bi te yin kukpin ayɛt awo.

¹⁰Ngma kari yɔng fi i di nɔ yin, sot yin azɔng sak atuk yɔng fi bi di won yin kuwɔp e.

¹¹Ngma karɔ yɔng fɛ́ ba raba dang ki shan yin ni mbɔk nfaa, kɛ ba raba ifok ifɛ̀ yin ayi, ka ba waat yin kabung atak yin ni izen fi i da wuruk yin, nɔng i da sot kanu icɛɛt naton ba.”

¹²Ba tseng, ba tsɛ ba shara fok, banet na ba wosong anɛn bá, na ba tirik sak na Adakunom.

¹³Ba turung itséng hwyɛt, ba di tes name na bafi nrɔk dot, ba ka ba tes kyang.

¹⁴Agbat agwɔm aHiridus fok ikyɛng fi i tsin tseng, nek ba mi rēn iyerek aYeso kaakyɛ. Bakak nye fok, “Ba mi tɛ ba donong nɛ aYohana anet abatisma ni irɛk, nek anɔng a bi kukyem iras ntomong abes nang.”

¹⁵Nek bakak nye fok, “Anet e yet aIliya.” Nɛ bakak nye bà fok yɛ, “Anet e yet atan, kpaf nɛ batan ashon yame.”

¹⁶Awɛt, izen fɛ́ aHiridus fok anɔng, a fɛ̀, “Ye kukuu! AYohana fi in mi tɛn ice me, ba mi tɛ ba ku donong ni rɛk!”

¹⁷Nek aHiridus ice wu, a ki mang nɔɔk ifɛ̀ fok na ba tsɛ ba tekap aYohana, a sak ba ku rosom, ba ku te kpaf ari inyang. A kin nye anɔng nek a di tɛrɛk aHirodiya iyɛ, abin arunyining aFilibus, fi iwu kin bɔ.

¹⁸Nek aYohana kin fɛ̀ na aHiridus yi, “I se gyat ngɔn ni ibɔ abin arunyining ngɔn awo!”

¹⁹Nek anɔng, aHirodiya di bɛ́ imung aYohana ni iyɛ wu, a tsɛt a ku fɛt mo. Awɛt a bit kawat e,

²⁰nek aHiridus foos nyim aYohana, awɛt a kin ku tɛnɛsɛ nek a rēn fok a yet afi kusot kutabat, anet ajɛrɛ. AHiridus shim ifoos kucɛɛt aYohana, ngma nɛ fɛ́ a ku nye zii makiyi ni izen ifoos kucɛɛt e.

²¹Ni igang e, aHirodiya kin sɛ kawat. Atuk iyiring kunom ites aHiridus nye, a nye nayak mok bagbat bafi itomong igwɔm wu, nɛ bagbat batsom wu, nɛ bayɔng fɛ́ ba foos ni iba ni mben aGalili.

²²Ni izen fɛ́ angas aHirodiya bɛ́ a nɔ, a ka ba to, ikyɛng e tɛrɛk aHiridus nɛ batsen wu iyɛ makiyi. AGwɔm e fɛ̀ na kanamang e yɛ, “Di rip ngma ikyɛng fi i shim, in da ka nɔk ide.”

²³A ka ka nye kucɛɛt e ni kushi, fok, “Ngma ikyɛng fi i rip, in da ka nɔk ide, kɛ ni i yet ibit igwɔm hom ayi.”

²⁴Wat ka wuruk amatse, ka tsɛ ka rip anyining fok, “Akyɛ fi in da rip ɛ?” Anyining e fɛ̀ ni ika, “Fɛ̀ na da nɔɔk ice aYohana anet abatisma.”

²⁵Ni izen izining, kanamang e di berem sak narɔ agwɔm ni irip ka, ka fɛ̀, “Imi shim ni di nɔɔk ice aYohana anet abatisma yɔkɔnɔng naton kube.”

²⁶Ikyɛng e te agwɔm ayɛt kudaam makiyi, awɛt nek kushii fɛ́ a mi nye, ashon batsen wu, a shim a tɛn kushii fɛ́ a mi ka ka nye ne awo.

²⁷Nek anɔng, agwɔm e sak anet ishinishi kutomong e, na a tsɛ a ku bɛ́ ni ice aYohana ziri ziri. Anet e, tsɛ a tɛn ice aYohana ari inyang e.

²⁸A bɛ́ ni ice wu me ni kube. A nabak kanamang e ne, ika nabak anyining e.

²⁹Ni ifok ikyɛng fi i te, bafi imɛɛs aYohana, tsɛ ba sok kukom e, ba tsɛ ba nɛt iko ni irɛk.

³⁰Ni izen fɛ́ batom aYeso bɛ́s ba, ba kana tusung narɔ wu, ba kpa ku taas ngma nkyɔrɔk fɛ́ ba ras, ni itees fɛ́ ba tees.

³¹Nek kudot banet fɛ́ ba nes, nɛ ba tsees, i sak ba kyem ba sɛ kawat iyak awo, aYeso fɛ̀ ni iba, “Bɛ yin in tse yit narɔ fɛ́ ka se wiin, nɔng in da tsin in fɔɔn yit.”

³²Nek anɔng, ba tseng aziba ayɛt kukyɛ ashi, sak narɔ fɛ́ ka se wiin e.

³³Awɛt banet dot fɛ́ ba ka ba di, na ba tsin tseng, ba rēn fok iba yɔng, ba teng na atak nɛ na naban nwɔp zizɛɛt, ba tsɛ ba ta azɔng ashon ba.

³⁴Ni izen fɛ́ aYeso wuruk ni kukyɛ ashi me, a di kudyɛng banet e, a fok angmishish ba, nek ba se ti itsamang fi i se vit anek. Nek anɔng, aYeso kpa ka ba tees nkyɔrɔk dot.

³⁵Ni izen e yɔng, kunom ngmash ni ku nɔ, nek anɔng, bafi imɛɛs wu tsɛ ba ku sɛ, ba fɛ̀ ni wu yɛ, “Di, karɔ kang se wiin, di, kunom mi tse sak ikpa.

³⁶Te banet e ni irèn, nɔng ba bin tsɛ ba shan ice bá ikyɛng iya na nasa nɛ naban wɔp na bakat nang.”

³⁷Awɛt aYeso ka bun ni ifɛ̀ yɛ, “Iyin ka ba nɔk yin ikyɛng iya.” Iba fɛ̀ ni wu, “Kuyak fɛ́ banet bang da ya, da sok itsɔm itarang anet nfi nfɛn nkara. Ngɔn shim in tsin in fɛt yit azikit itsɔm dɔng na akpam fi in di ki ya yit ni iba yɛ?”

³⁸AYeso ka ba rip yɛ, “Ágbang akpam amang fi i bɛ́ yin ɛ? Tsi di yin.” Ni izen fɛ́ ba tsɛ ba sɛ, ba fɛ̀ ni wu, “Ágbang akpam atoon, ni ìzos ifaa.”

³⁹AYeso ka ba sak, na ba saas banet e na ba sosok, zung zi zung, naton agam a shirim.

⁴⁰Nek anɔng, ba sosok bakak anakat azizining, bakak nsɔk nti-toon.

⁴¹A sok ágbang akpam atoon e, ni ìzos ifaa me, a sok ayisi sak azanɛn, a nɔɔk ifeng na Adakunom, a kpa bushung akpam e. A ma nɔɔk bafi imɛɛs wu ne, na ba kabasa banet e. A tɛ a ka ba kabasa ìzos ifaa me bà.

⁴²Ngma ba, ba ya, ba hwyas.

⁴³Ama anɔng, bafi imɛɛs e tusung akpam, ni ìzos fi ituk, ba sɛ nakɔmɔng kusɔk abe afaa.

⁴⁴Kudot batek fɛ́ ba kin ya nayak e, kin se agup atoon.

⁴⁵Ni izen izining, aYeso sak bafi imɛɛs wu nɔ ayɛt kukyɛ ashi, na ba tat sak na aBatseyida ni nyi kuya kufi izek e, ni iwu te kudyɛng banet e ni irèn ninyɛn.

⁴⁶Ama fɛ́ a mi ka ba won, a tse ni fam ihwyanang, nɔng a da ra awon.

⁴⁷Ni izen fɛ́ kawuwuri nye, kukyɛ ashi me se nate izek e, na aYeso ren resek aben.

⁴⁸A di bafi imɛɛs wu tsin bɔrɔng ni itsip kukyɛ ashi me sak ashon. Nek awun se ni ika ba yirik. Bakat itsɔm mbɔk itaat sak karataat ifɛ́ adiding, a kpa shesh azaton ashi sak narɔ ba. A shim a ka ba got,

⁴⁹awɛt fɛ́ ba ku di na tsin shesh azaton ashi, ba sok fok nyan afaben wu. Ba kpa tang nkun,

⁵⁰nek ngma ba, ba ku di, nnyim ka ba yit makiyi. Iwu wat a fɛrɛng ni ba, a fɛ̀, “Yit yin iyɛ! Imi wu. I bi fok yin nnyim awo!”

⁵¹A ma ngarak ayɛt kukyɛ ashi me gung ni ba, awun e wat a men yuu. Ngma ba ayɔɔt ka ba yit,

⁵²nek ba resek dang rēn ibes fi i sak akpam me woso di barasa, nek ayɛ bá se kashalang.

⁵³Ama fɛ́ ba mi tat sak ni nyi kuya, ba tik ni mben aJɛnɛsarɛt, ba rosom kukyɛ ashi me azɔng.

⁵⁴Ni izen fɛ́ ba tsin tisik ayɛt kukyɛ ashi me, banet e wat ba rēn fok aYeso yɔng.

⁵⁵Ba teng ba goroso ngma mben e, na ba kok bafi nrɔk e azaton na meneng, sak na narɔ fɛ́ ba fok fok a di se.

⁵⁶Ngma karɔ fɛ́ a di tse, ni nwɔp nban e, kɛ nwɔp nratek, kɛ na akɔ ayi, ba mees bafi nrɔk e na narɔ ijik. Ba di tsot akabɔk ni wu fok yɛ, na a wosong bafi nrɔk e, na ba raas kanu ikpin wu kyɛk, ngma bayɔng fɛ́ ba ku ra me, ba sɛs kukyang.