Read icen ALuka 1 Bible Online

ALuka 1 - icen bible

ALuka 1

¹Azɔk aTiyofulus, banet dot mang te nyɛk ba jɛk, ngma nkyɔrɔk fi in kin te nate yit.

²Ba kin jɛk ikyɛng fi iyit kin fok yit, na nu bafi icɛɛt. Iba kin di nkyɔrɔk e, na ayisi bá ni mɛsɛng e, iba kin tɛ ba shara ifɛ̀ Adakunom e.

³Nek anɔng wu, fi in di, i se gyat, in da jɛk ngma nkyɔrɔk fi in kin te, neme ni imɛsɛng e, nek imi mi kuus narɔk e.

⁴Imi tsin da jɛk e, nɔng ngɔn da rēn atsak ikyɛng fɛ́ ba mang da tees.

⁵Ni izen fɛ́ aHiridus kin yet agwɔm mben aJudiya, àware akak kin se, fɛ́ ba kin ku yes aZakariya, a kin yet azining ayɛt áware fɛ́ ba ras ntomong aware ni kukap Abija; abining wu aLizɛbɛtu kin ne ni izɔrɔk aHaruna.

⁶Ngma ba, ba kin yet batabat e ashon Adakunom, ba berese ntsi, ni itabak aTisa gyatgyat.

⁷Ba kin bɛ̀ nggon awo, nek aLizɛbɛtu kin yet akuma me; ama anɔng, ngma ba, ba kin tsang kop.

⁸Atuk akak, aZakariya kin se ni kutomong iware wu ni itu iya Adakunom ntong, nek izen itomong e yɔng kin yet ifubá,

⁹ntsi kutomong iware, yet ifi barak icang nek ikasa ayɔng fɛ́ a da nɔ narɔ iya aTisa mben, nek ashosh nkɔn ntek, icang kin di kpa ni wu, nek na a nɔ narɔ iya ntong e.

¹⁰Fi izen ashosh nkɔn ntek e nye, kudyɛng banet fɛ́ ba tse iya ntong e, kin se ni ira awon atasa.

¹¹AZakariya wat a di atomaza aTisa ku wuruk ashon, a nyeseng ni bɔk iyak kuta ashosh nkɔn ntek e.

¹²Ni izen fɛ́ aZakariya ku di, a ku te beke, nnyim wat in ku yit.

¹³Awɛt atomaza me fɛ̀ ni wu, “I bi fok nnyim awo aZakariya; Adakunom mi shan awon ngɔn. Abining ngɔn aLizɛbɛtu da ka tes nggon kamatek e, ngɔn da ka ka te iyerek aYohana.

¹⁴Ka bi ki bɛ́ yin ni itɛrɛk iyɛ, banet dot bi nye iyɛ ikan nek kutes ká,

¹⁵nek ka bi yet agbat anet ashon aTisa. Ashi anap kɛ ikyɛng ijatang ayi bi nɔ na nu ká awo, ba bi ka ka shining na Kabik aJɛrɛ, na ka ren resek mo nafa nggɔ ká.[1]

¹⁶Ka bi bɛ́ ka tirik nnon aIsrela dot sak na aTisa, Adakunom bá.

¹⁷A bi ra kutomong ashon aTisa ayɛt abik, nɛ agap kuri afi aIliya, ka bi tirik ayɛ badada sak ni nnon bá, ka bi tirik bayɔng fɛ́ ba raba ifok ifɛ̀ sak isot banet batek, na anɔng wu fɛ́ a bi nye banet gyat nek aTisa.”[2]

¹⁸AZakariya fɛ̀ nɛ atomaza me, “Na anɛ fi in di ki rēn fok ikyɛng fi ngɔn fɛ̀ deng da shining ɛ? Nek imi yɔng in mi kop, nɛ abining hom.”

¹⁹Atomaza me fɛ̀ ni iwu, “Imi wu in yet aGebirel, ayɔng fɛ́ a nyeseng ashon Adakunom, ba di tom sak ni ngɔn, ni in da tak ifɛ̀ itek deng.

²⁰Di! Kanu ngɔn di ki wey gbik, i da kyem i ti cɛɛt awo, ma atuk fi ikyɛng deng shining, nek ngɔn rangɔn dang nɔɔk atsak ni kucɛɛt hom kang, fi ku da shining ni izen fɛ́ ba mi sak.”

²¹Ni izen e yɔng, kudyɛng banet ren resek amatse, ba tsin tot aZakariya na a wuruk, ba nɔ kudaam fok akyɛ fi i tsi i ku yit gbɔɔt ni itu iya ntong ɛ?

²²Ni izen fɛ́ a nɛ wuruk amatse, a kyem a cɛɛt ni iba awo, ba wat ba rēn fok ba mi ku tarak ayisi ni itu iya ntong e, nek iwu woso cɛɛt ni iba ni mbɔk kyɛk, a kyem a tɛ a fɛrɛng awo.

²³Ni izen fi izen itomong wu bi igang, a bun ari.

²⁴Ama kizen gyeet, abining wu aLizɛbɛtu sok kafa, a nye nfɛn ntoon na woso nɛsɛk ice wu.

²⁵ALizɛbɛtu fɛ̀, “ATisa mi fok angmishish hom, ni izen ti iyeng, a di tun nsum ayɛt banet.”

²⁶Nɛ aLizɛbɛtu se ayɛt kufɛn kufɛ́ karataat ni isok kafa, Adakunom tom atomaza aGebirel sak na aNazaret, ni mben aGalili,

²⁷sak ni ica anamang kakak fɛ́ ba yes ika aMarya, acam akak fɛ́ ba ku yes aYusufu afi izɔrɔk agwɔm aDauda se ni isam ka.

²⁸Atomaza me tse narɔ aMarya, a fɛ̀ ni iwu, “In da te show, aTisa se gung ni ngɔn, ngɔn fi i mi sɛ awɛng narɔ wu.”[3]

²⁹AMarya nɔ kudaam makiyi, nek ifɛ̀ me dɔng, a woso yiring, “Akyɛ kuri ashow yɔng a yet ayɔng ɛ?”

³⁰Nek anɔng, atomaza me fɛ̀ ni wu, “I bi fok nnyim awo aMarya, nek ngɔn mi sɛ awɛng ashon Adakunom.

³¹Ngɔn da sok kafa, i da tes nggon kamatek e, i da ka ka nɔɔk iyerek aYeso.

³²Iwu bi yet aratek, ba bi ku yes Arim Azɔk-Bazɔk. ATisa Adakunom bi ku nɔk kuta isonong ada wu agwɔm aDauda,

³³a bi ya igwɔm ni izɔrɔk aYakub ayɛ nɛ ayɛ, igwɔm wu, bi sot vit nkum e.”

³⁴AMarya nye atomaza me irip yɛ, “Na anɛ fi ikyɛng deng da sot ɛ, ni imi tsin ren resek mo ica anamang ɛ?”

³⁵Atomaza me fɛ̀ ni wu, “Kabik aJɛrɛ da bɛ́ naton ngɔn, nawu Azɔk Bazɔk da ka te gip. Nek anɔng, aJɛrɛ me yɔng fɛ́ ba bi tes e, ba bi ku yes Arim Adakunom.

³⁶Di, afi izit ngɔn aLizɛbɛtu yɔng a da tes nggon ayɛt ikop wu, iwu yɔng fɛ́ ba tsang nye fok da a bi tes awo, a yɔng a mi nɔ ni fɛn wu kufɛ́ karataat.

³⁷Nek vit ikyɛng fi i gaat Adakunom.”

³⁸AMarya fɛ̀ ni wu, “mi yet asam aTisa, won ikyɛng fi ngɔn fɛ̀, ni i sot anɔng ni imi.” Atomaza me ma tseng.

³⁹Ayɛt nnom e yɔng, aMarya kana nye, a yit irèn ziri ziri sak ni wɔp ice ihwyanang aJudiya,

⁴⁰na tsin nɔ ari aZakariya, a te show aLizɛbɛtu.

⁴¹Ni izen fɛ́ alizɛbɛtu fok ite ashow aMarya, nggon afaa wu te nyamang, aLizɛbɛtu sɛ ishining na Kabik aJɛrɛ.

⁴²A ta kutɔ! A kpa cɛɛt yɛ, “Awɛng se gung ni ngɔn ayɛt banyining ngma, awɛng se gung ni nggon fi i da tes!

⁴³Akyɛ de i di bɛ́ na awɛng yong anɔng ɛ, fi nggɔ aTisa hom di ki bɛ́ itsen ɛ?

⁴⁴Ni izen fi in fok ashow ngɔn, kaban nggon fɛ́ ka se nafa min te nyamang nek iyɛ ikan.

⁴⁵Awɛng se gung nɛ abining yɔng, fɛ́ a mi nɔɔk atsak, fok ngma ikyɛng fɛ́ aTisa mi fɛ̀ ni wu da shining!”

⁴⁶Ama anɔng, aMarya fɛ̀, “In tsin tere aTisa ayɛt iyɛ hom,

⁴⁷in bi iyɛ ikan sak na Adakunom Anet-Isheshek hom,

⁴⁸nek iwu mi yiring ni imi ngma ni kurat fi in bɛ̀ tɛ asam wu. Di nkum yɔkɔnɔng sak ashon, ngma nzam azatse di ki yes anet awɛng.

⁴⁹Nek Azɔk-Bazɔk mi di nye agbat ikyɛng iyerek wu se jɛrɛ.

⁵⁰Angmishish wu, se sak na bayɔng fɛ́ ba foos nnyim wu, nkum kuzam ku kà sak ni ku yá.

⁵¹A mi ras agbat-agbat ntomong ni kubɔk wu, a sharatat bayɔng fɛ́ ba foos ni ice, ni ikyɛng fɛ́ ba bɛ̀.

⁵²A mi tisik bágwɔm na ata igwɔm bá, a mi sok garang bayɔng fɛ́ ba ka ba byɛs.

⁵³A mi shining bafi nzong ni ihwya, a mi ro barum ba tseng, ni mbɔk nkot.

⁵⁴A mi gbinding asam wu aIsrela, a mi yiring ni wu, a tonong angmishish wu sak na banet wu.

⁵⁵Nek ikyɛng fɛ́ a ki mang fɛ̀ na badakop yit, sak ne aIbrahim, ni izit wu ayɛ vit igang e.”

⁵⁶AMarya nye nfɛn ntaat azɔng na aLizɛbɛtu, a da nɛ bun ari.

⁵⁷Ni izen, fi izen nye fɛ́ aLizɛbɛtu da nɔ wu, a tes nggon kamatek e.

⁵⁸Bayɔng fɛ́ ba se bakat ni wu, na bafi izit wu, nye iyɛ ikan makiyi, fɛ́ ba fok yɛ a mi nɔ wu, ba ku sɛ mo ifeng nek ikyɛng itek fɛ́ aTisa ku nye ne.

⁵⁹Ama fi nggon e shining nkɔs nkara, ba nyim, nɔng ba da ka ka nye katse, ba bin ka ka bɔ mo iyerek kpaf ti ifɛ́ ada ka aZakariya.

⁶⁰Awɛt nggɔ nggon e, fɛ̀ ni iba awey, “Ba da ka ka yes aYohana.”

⁶¹Ba fɛ̀ ni wu, “Vit afi izit yin akak fɛ́ a bɛ̀ kuri iyerek deng.”

⁶²Ba kpa risim ada me ni mbɔk, yɛ na a tak kuri iyerek fi iwu shim a nɔɔk nggon e.

⁶³Ada me fɛ̀, na ba ku nɔk kukon ijɛk, a di jɛk ide yɛ, “Iyerek ka yet aYohana.” Ikyɛng e te kaangan yɔɔt.

⁶⁴Ayɛt izen izining, kanu wu tarak, ilem wu bisik, a kpa cɛɛt, na tere Adakunom.

⁶⁵Anyim yit kaangan fɛ́ a se azɔng, banet tseng ni kucɛɛt e, ngma ni mben fi in se ni ice ihwyanang aJudiya.

⁶⁶Ngma ayɔng fɛ́ a fok ifɛ̀ me, na ku te yɔɔt, na nye, “Nggon e kang da yet akyɛ kuri nggon ɛ?” Nek kubɔk aTisa se naton ka.

⁶⁷Ba se na anɔng, Kabik aJɛrɛ wat ka shining aZakariya, a kpa taas ibes,

⁶⁸“Iratek ni isot ifɛ́ aTisa Adakunom afi aIsrela, nek a mi bɛ́ a sheshek banet wu.”

⁶⁹A mi tun Anet-Isheshek yit, ni izɔrɔk asam wu agwɔm aDauda

⁷⁰(tɛ fɛ́ a kin di cɛɛt na batan aJɛrɛ wu, bafɛ́ yame),

⁷¹a bi ki sheshek yit, ni mbɔk bafi ifup ni yit, nɛ ni bɔk ngma bayɔng fɛ́ ba ki ra yit.

⁷²Na anɔng wu fɛ́ a di ki tonong angmishish fɛ́ a bɛ́ sak na badakop yit. A di yiring ni kushi aJɛrɛ fɛ́ a ki mang nye,

⁷³kushi fɛ́ a kin nye adakop yit aIbrahim ne,

⁷⁴fok iwu bi ki shan yit ni bɔk bafi ifup ni yit, nɔng in da ku ya yit ntong vit nnyim,

⁷⁵nɔng in da sot yit Jɛrɛ ashon wu, nkum kutset yit.

⁷⁶“Wɛt ngɔn, nggon in, ba da ka yes atan afɛ́ Azɔk-Bazɔk; nek ngɔn da tseng ashon aTisa, i da nye irèn nek iwu,

⁷⁷ngɔn bi taas banet wu fok, Adakunom bi ka ba fuut anɛn bá, na ma ka ba shan. Fi ines ni irèn ifuut anɛn bá.

⁷⁸Nek anɔng wu, kudot angmishish fɛ́ Adakunom yit bɛ̀, fi i sak mgbey kunom adiding, fi in bi ne azanɛn.

⁷⁹In bi ron sak naton bayɔng fɛ́ ba se ayɛt nhwyi, na naton bayɔng fɛ́ nawu iku mi ka ba te gyip, a bi ki tonoso yit irèn sak isɛs kukyang.”

⁸⁰Nggon e rasak, ka te agap ayɛt abik; ka sot ayɛt ayit, sak izen fɛ́ a nɛ tonong ice wu ni dɛt sak nɛ banet aIsrela.