Read icen ALuka 10 Bible Online

ALuka 10 - icen bible

ALuka 10

¹Ama anɔng, aTisa tɛ a kasa bafi imɛɛs wu nsɔk kanakataat ina afaa, a ka ba tom, bafifaa-bafifaa, yɛ na ba tun tseng sak na naban wɔp, fi iwu ice wu bi di tsɛ.

²Wat a fɛ̀ ni ba, “Ikɔɔn nayak e se dot, awɛt banet itomong e se hyihyit. Nek anɔng, tsi rip yin aTisa akɔ me, nɔng a bin di barang kudot banet fɛ́ ba da kɔɔn kuyak e.

³Fok yin! Tseng yin, Imi tsin ki tom yin tɛ naban-itsamang ayɛt agbayɔrɔ.

⁴Akak kin bi bereng itsɔm kɛ amala, kɛ akpatak awo; i bi teng i nyeseng yin ashow ni irèn awo.

⁵“Kaakyɛ kari fi i di tik yin, ni tun fɛ̀ yin, ‘Won kusonong kukyang ni ku se ari kang.’

⁶Kɛ anet fɛ́ a shim kusonong kukyang di se ari me yɔng, won ite ashow kusonong kukyang e ni i sot naton wu; kɛ da i se anɔng awo, ni ite ashow ti ni bun narɔ yin.

⁷Sonong yin azɔng ari me yɔng, ya yin, sɔ yin ngma kuri ikyɛng fɛ́ ba ki nɔɔk yin, nek i se kpaf na ba tarang anet itomong izang wu. I bi teng ni kuus yin nasa-nasa awo.

⁸“Kaakyɛ kuwɔp fi i di nɔ yin, kɛ ba ki shan yin, ni ya yin ngma ikyɛng fɛ́ ba ki nɔɔk yin.

⁹Tes yin banet nrɔk fɛ́ ba se ni wɔp e kyang, ni fɛ̀ yin na banet e yɛ, ‘Igwɔm Adakunom mi bɛ́ bakat ni yin.’

¹⁰Awɛt, kaakyɛ kuwɔp fi i di nɔ yin, kɛ ba raba dang ki shan yin, gosok yin ni irén ba ni nye yin,

¹¹‘Ngma kabung iwɔp yin fɛ́ ka di tesheng na akpatak yit, in mi ki waat yin ne; ngma nɛ anɔng in shim yit ni rēn yin fok, igwɔm Adakunom mi bɛ́ bakat ni iyin!’

¹²Won in ki tak yin, atuk igang azatse, Adakunom bi ra tonong angmishish naton aSodom aza kuwɔp e yɔng.

¹³“Kawɛy ngɔn, aKorazin! Kawɛy ngɔn, aBatseyida! Nek a fɛ́ yet ntomong abes yɔng fɛ́ ba ras ni yin, ba kin fɛ́ ba ra na aTiya nɛ aSidon, kɛ banet nwɔp e mang tes acɛk akpin, na ba sosok, na ba korok ntong irong na ce bá, kɛ ba mang wosong anɛn bá!

¹⁴Atuk igang azatse, Adakunom bi fok angmishish aTiya nɛ aSidon aza yin.

¹⁵Awɛt iyin banet aKafarnahum! Iyin di yin tɛ ba da ki sok yin sak azanɛn ɛ? Awey, ba bi ki barak yin ni ibong ari-irong!”

¹⁶AYeso fɛ̀ na bafi imɛɛs wu, “Ngma ayɔng fɛ́ a ki fok yin, imi wu fɛ́ a di fok; ngma ayɔng fɛ́ a ki rayin, imi wu fɛ́ a di ramin, ngma ayɔng fɛ́ a di ramin, a tsin rawu ayɔng fɛ́ a di tom.”

¹⁷Banet nsɔk kanakataat ina afaa me bɛ́s ba ni iyɛ ikan, ba fɛ̀, “ATisa, itséng ni ice de i ki foos yit, ki in fɛrɛng yit ni ide ni iyerek ngɔn!”

¹⁸AYeso fɛ̀ ni ba, “Imi di aShetan kpa sak aben ti ite adɛbɛt izá.

¹⁹Di yin! In mi ki nɔɔk yin ice, fi i di ki shesh yin íhwyen, ni inyáng, ni iya yin agap azaton ngma bamaane, vit ikyɛng fi i da ki man yin.

²⁰Ngma nɛ anɔng, iyɛ ikan yin bi yet fok nek itséng foos ifɛ̀ yin kyɛk awo; tit iyɛ ikan yin ni i sot nek ayerek yin se ni ijɛk azanɛn.”

²¹Ni izen e yɔng, aYeso ayɛt ishining ni iyɛ ikan fi ine na Kabik aJɛrɛ, a fɛ̀ yɛ, “Ada, ngɔn fi i yet aTisa azanɛn, na kazatse! Imi bɛ̀ iyɛ ikan ni ngɔn, nek ngɔn nɛt nkyɔrɔk nang sak na bayɔng fɛ́ ba yet batsitsɛng nɛ bafi irēn. I da ma tarak ina sak na bayɔng fɛ́ ba se vit irēn. I se kpaf anɔng Ada, ikyɛng fi ngɔn shim yɔng.

²²“Ada hom mang di nabak kaakyɛ ni bɔk in. Vit anet fɛ́ a rēn ki Arim e yet angan ɛ, tit Ada me aziwu, vit anet fɛ́ a rēn Ada me, tit Arim e kyɛk, na bayɔng fɛ́ Arim e shim a ka ba tonong.”

²³AYeso tirik sak na bafi imɛɛs wu, a ka ba tak ni nɛt yɛ, “Awɛng se naton ayisi yɔng fɛ́ a tsin yɛrɛ ikyɛng fi iyin tsin yɛrɛ yin!

²⁴Fok yin! In tsin ki tak yin, batan dot, na bágwɔm dot, tsɛt ba di ikyɛng fi iyin tsin yɛrɛ yin, ba kyem ba di awo, ba shim ba fok ikyɛng fi iyin tsin foos yin, ba kyem ba fok awo.”

²⁵Atuk akak, agwɔm irēn ntsi akak, dorok fok a shim a mara aYeso. A ku nye irip yɛ, “Anet itees, akyɛ fi imi da nye, nɔng in di ki sɛ kutset vit igang ɛ?”

²⁶AYeso ku bun ni ifɛ̀ yɛ, “Akyɛ fi i se ni ijɛk ni ntsi fɛ́ Adakunom kin nɔɔk aMusa yɛ? Ngɔn fok ba fɛ̀ anɛ azɔng ɛ?”

²⁷Anet e fɛ̀ ye, “Ngɔn da shim Adakunom aTisa ngɔn ni iyɛ ngɔn kusum, ni kutset ngɔn kusum, na agap ngɔn kusum, ni kuyiring ngɔn kusum; ni i shim afidang isot ngɔn ti ice ngɔn.”

²⁸AYeso fɛ̀ ni wu, “Ngɔn tak kpaf. Tsi nye anɔng, i da sɛ kutset.”

²⁹Wat anet e shim a tonong fok vit iwu ni inɛn, nek anɔng, a tɛ rip aYeso yɛ, “Angan wu fɛ́ a yet afidang isot hom yɛ?”

³⁰AYeso ku bun ni ifɛ̀ ye, “Anet akak kin ne ni aRushelima, a se ni itisik sak na aJeriko, wat bakpatang agap ku tɛnɛng ni irèn, ba ku te kpiip, ba ku tsot, ba ku won na nu iku.

³¹“Ayɛt anɔng, àware akak se ni itisik ni irèn e yɔng. Fɛ́ a di anet e, a tabak ni ifam, a di berem akɔng wu.

³²“Kpaf anɔng bà, afi izit aLawi akak, bɛ́ a ta azɔng narɔ me bà, fɛ́ a di anet e, a tabak ni bɔk kuya, a di berem akɔn wu bà.

³³“Awɛt anet aSamariya[6] akak fɛ́ a kin tsin tseng ni irèn izining e yɔng, a bɛ́ a di te tuk na anet e, fɛ́ a di anet e, angmishish ku yit.

³⁴A tse narɔ wu, a ku kusu nfot e, a di te ikan na ashi anap, a ma ku rosom ina. Ama anɔng, a sok anet e na tarakey wu, a tseng ni wu sak narɔ itisik batsen, a tsɛ a ku fiis azɔng.

³⁵Akatson, a tun ábɔk[7] afaa, a nɔɔk anet iyɛrɛ kutu itisik batsen e, a fɛ̀ ni wu, ‘Ban di yɛrɛ anet yong, ki i wey ni ikyɛng fi i wat anɔng, in bi bin in da tarang ngma ikyɛng fi ifɛt.’ ”

³⁶AYeso ku rip yɛ, “Ni ku di ngɔn, angan ayɛt banet bataat e yɔng fɛ́ a yet afidang isot anet fɛ́ bakpatang agap e ku tɛnɛng ɛ?”

³⁷Agwɔm irēn ntsi aMusa me fɛ̀ ni wu, “Ayɔng fɛ́ a fok angmishish wu.” AYeso fɛ̀ ni wu, “Ngɔn, tsi nye kpaf anɔng.”

³⁸Fɛ́ ba se ni kutseet, aYeso nɛ bafi imɛɛs wu, ba bɛ́ naban wɔp kakak, fɛ́ abining akak fi iyerek wu yet aMata ka ba shan sak ari wu.

³⁹A bɛ̀ anganyining fɛ́ ba ku yes aMarya, fɛ́ a kin sonong bakat na atak aTisa, na foos ifɛ̀ wu.

⁴⁰Awɛt kutomong a nyes tsi ku mak aMata, nek anɔng, a tsɛ narɔ aYeso, a fɛ̀ ni wu yɛ, “ATisa, vit ikyɛng fi i da daam fɛ́ anganeng di won in nye zere na a nyes azimin ɛ? Fɛ̀ ni wu na a bɛ́, a di sɛ mo!”

⁴¹ATisa me, fɛ̀ ni wu, “Ka! AMata! Ngɔn won nkyɔrɔk dot in da daam,

⁴²ikyɛng izining de kyɛk fɛ́ ba tsɛt. AMarya mi kasa ikyɛng fi wat itek, idɔng fɛ́ vit ayɔng fɛ́ a da kyem a shan ide ni wu.”