Read icen ALuka 17 Bible Online

ALuka 17 - icen bible

ALuka 17

¹AYeso fɛ̀ na bafi imɛɛs wu, “I se gbing-gbing ikyɛng fi i saas banet ira inɛn ni i bɛ́; awɛt kawɛy se naton ayɔng fi ikyɛng e ne ni wu!

²Aza yɔng fɛ́ akak da sak azining ayɛt naban e na, na a kpa ni inɛn, kaduk kɛ ba ku rosom kuta-ikɔɔ ni tɔ, na ba ku barak ni izek.

³Nek anɔng, nɔ yin ni kuhwyɛ yin. “Kɛ arunyining nye inɛn, ku gyɔng; kɛ a wosong anɛn wu, ni ku fok.

⁴Kɛ a da nye inɛn ite kanakataat atuk azining, a tɛ a bɛ́ atak kanakataat na tsot akabɔk yɛ, i mi wosong anɛn hom, ni fok kanak wu.”

⁵Batom aYeso fɛ̀, “ATisa, di barang inɔɔk atsak yit!”

⁶ATisa ka ba bun ni ifɛ̀, “Ki i inɔɔk atsak yin se ti kica amastat, i da kyem i fɛ̀ yin na kakon agbɛk ka, ‘Kana ngaat azeng, tsi tup ice ngɔn ni izek,’ ka da nye ikyɛng fi iyin fɛ̀ yin.

⁷“Won in fɛ̀ yit azining ayɛt yin bɛ̀ asam fɛ́ a se ni kutomong ni kɔ, ke a tsin tot íbon ayi. Fɛ́ kɛ asam e bɛ́s wu natse, na atekari me fɛ̀ ni wu, ‘Bɛ́ ziri da sonong nɔng i da ya kuyak’ ɛ?

⁸Ikyɛng de fɛ́ atekari me da fɛ̀ ni wu, ‘Tsi di nye nayak atuk, ka na nye, da tsi di bɛ́ na nayak nɔng in da ya ni in sɔ, i da ni i tsi i ya na fɔɔn’ awɛ?

⁹Atekari me da feng asam e nek kutomong fɛ́ a ra yɛ?

¹⁰I se anɔng ni yin bà, ama fi i mi ra yin ngma ikyɛng fɛ́ Adakunom fɛ̀ ni yin, ni i nye yin, ni fɛ̀ yin, ‘Iyit yet yit basam fi da in kyem yit ikikak awo; in mi nye yit ikyɛng fi i se kpaf ni in nye yit.’ ”

¹¹Ni izen fɛ́ aYeso se ni tseng sak nɛ aRushelima, a got ni nkum mben aSamariya nɛ aGalili.

¹²Na tsin nɔɔs naban wɔp kakak, bakpatɔn bakak kusɔk nyim ni wu. Ba nyeseng yik-yik

¹³ba tarak ntɔ gbɛrɛy ba fɛ̀ ni wu, “Ada aYeso, fok angmishish yit.”

¹⁴Izen fɛ́ a ka ba di, a fɛ̀ ni ba, “Tseng yin, tsi tonong yin na áware.” Fɛ́ ba se ni irèn sak azɔng, a ka ba te kyang.

¹⁵Fɛ́ azining ayɛt bá di a mi ku te kyang, a tɛ bun, na tere Adakunom ni kutɔ kuratek.

¹⁶A tsɛ a kpa pak ashon atak aYeso, na ku feng. Ayɔng e kin yet anet aSamariya.

¹⁷AYeso ku rip yɛ, “Iyin se yin banet kusɔk fɛ́ ba ki te yin kyang awɛ? Wat nshɛrɛp banet agyɛng azining e si kɛ?

¹⁸Vit anet fɛ́ a kyem a tɛ bun, na tere Adakunom tit atsen e yong kyɛk ɛ?”

¹⁹AYeso ma fɛ̀ ni wu, “Dorok, tseng; inɔɔk atsak ngɔn mi da te kyang.”

²⁰BaFarasi bakak bɛ́ ba nye aYeso irip fok, “Ni izik ɛ fi igwɔm Adakunom bi bɛ́ yɛ?” AYeso fɛ̀ ni ba, “Igwɔm Adakunom da i bɛ́ ni ikyɛng fi iyin da di yin, i di rēn yin awo,

²¹kɛ na ba fɛ̀ ni yin, ‘I de aze,’ ke ‘I da aza,’ awo, nek igwɔm Adakunom se azeng nate yin.”

²²A ma fɛ̀ na bafi imɛɛs wu, “Izen bi nye fi i bi tsɛt yin ku di ku bun Arim Anet, i bi sɛ yin awo.

²³Banet bi nye ni yin, ‘A yo!’ kɛ ‘A ya!’ I bi teng ni ka ba kuus yin mo awo.

²⁴Nek kunom Arim Anet bi se tɛ adɛbɛt kaza, fɛ́ a ta, na kaza wat ka te wɛshɛk nkum aze sak aza.

²⁵I se gbing-gbing na a tun sɔ izot ni irén dot, banet kuzam kang bi ku raba.

²⁶“Kpaf ti fi i kin se ni izen aNuhu, i bi se anɔng ni izen Arim Anet.

²⁷Banet kin yas, na ba sɔs, na ba ras nweneng, na ba nesek bangas ni nweneng, ba se na anɔng, sak izeng fɛ́ aNuhu di nɔ ni kukyɛ ashi. Ama anɔng, ashi bɛ́ a ka ba ya.

²⁸“I kin se kpaf anɔng ni izen aLotu. Banet kin yas, na ba sɔs, ba shashang na ba rɛs, ba tuus na ba nos nasa.

²⁹Awɛt atuk fɛ́ aLotu kin won aSodom, kurong ni iza árong kin ne azanɛn, ku ka ba hɛlɛm ngma kusum.

³⁰“Idɔng i bi se kpaf anɔng atuk fɛ́ Arim Anet bi tonong ice wu.

³¹Atuk ke yɔng, ayɔng fɛ́ a bi se naton itu, a bi fɛ̀ iwu tsɛ sok ares wu ayɛt itu awo. Kpaf anɔng, ayɔng fɛ́ a bi se ni ikɔ, da na tɛ a bun ari wu awo.

³²“Yiring yin na abin aLotu!

³³Ngma ayɔng fɛ́ a tsɛt a bereng kutset wu, a da bit iko, ngma ayɔng fɛ́ a nɔɔk nwaa kutset wu, a bi sɛ iko.

³⁴Won in ki tak yin, natuk e yɔng, banet bafaa bi se na meneng kazining, ba bi sok azining, na ba won azining.

³⁵Banyining bafaa bi se ni ku kɔɔ narɔ kazining; ba bi sok azining, na ba won azining.”[10]

³⁷Ba ku rip yɛ, “ATisa, akɛ?” AYeso fɛ̀ ni iba, “Karɔ fi kukom di se, azɔng fɛ ájɛrɛwɛsh da ka na tusung mo.”