Read icen ALuka 19 Bible Online

ALuka 19 - icen bible

ALuka 19

²Anet akak se azɔng fɛ́ ba ku yes aZaka; a kin yet akɔk-ashon bafi-ishashang itsɔm-mben, a kin yet arum.

³A tsɛt irèn idi angan wu fɛ́ a yet aYeso me yɛ, a kyem a ku di awo nek kudot banet, ama anɔng, iwu yet akum.

⁴Nek anɔng, a ta i tsi sak ashon, a tsɛ a ngarak kakon agbɛk, nɔng a da ku di mo, nek aYeso da got ni irèn e yɔng.

⁵Ni izen fɛ́ aYeso tsɛ a ta kpaf narɔ me yɔng, a ta ayisi naton, a fɛ̀ ni wu, “AZaka, tik ziri, nek in da tik ari ngɔn atut.”

⁶Wat a tik ziri, a shan aYeso ni iyɛ ikan.

⁷Ni izen fɛ́ banet di anɔng, ba kpa teng ba cɛɛt kyuk-kyuk, “Ayɔng a tse itsen ari anet inɛn.”

⁸Awɛt aZaka dorok tsik, a fɛ̀ na aYeso, “Di, aTisa! Azeng, yɔkɔnɔng, in tsin nɔɔk ibit kurúm hom sak na bakan, ama anɔng, ngma ayɔng fi in mang ku mɔɔt, in da ku tarang ite kanaas kudot ikyɛng fi in ki mang shan ni wu.”

⁹AYeso fɛ̀ ni wu, “Atut, isheshek mi nɔ ari kang, nek anet yong, iwu yet afi izɔrɔk aIbrahim bà.

¹⁰Nek Arim Anet bɛ́ nek itsɛt, ni isheshek ikyɛng fi i wey.”

¹¹Ni izen fɛ́ ba se ni ifoos ifɛ̀ me dɔng, a ya kashon a ka ba tak igorok icɛɛt. A ka ba nye kucɛɛt kang, nek a bɛ́ bakat ni inɔ ni aRushelima, banet yes gyan izen mi nye fi igwɔm Adakunom da wat i bɛ́.

¹²A fɛ̀ ni ba, “Anet ari igwɔm akak kin nye kutseet sak ni wɔp kuyikyik, a tsɛ a tsɛt ba ku te na a sot agwɔm, a da nɛ a bɛ́s wu.

¹³Wɛt a yes basam wu kusɔk, a ka ba nɔɔk áney kusɔk[11], a fɛ̀ ni ba, ‘Tsi tirisi yin itsɔm de ma kubɛ́ hom.’

¹⁴“Banet iwɔp wu me, ku raba, nek anɔng, ba yirik banet sak narɔ wu, yɛ na ba fɛ̀ ni wu, ‘Iyit shim yit anet yong na a sot agwɔm yit awo.’

¹⁵“Ngma nɛ anɔng, ba ku nɔk igwɔm e, a tɛ bun sak ari. Ni izen fɛ́ a bɛ́s wu, a sak ba ku yes basam fɛ́ a kin ka ba nɔɔk itsɔm e, nɔng a da bin di ijik fɛ́ ba nye.

¹⁶“Asam afi imɛsɛng e bɛ́ a fɛ̀ ni wu, ‘Atekari, ánɛy e mi tes, ánɛy akak kusɔk.’

¹⁷“Atekari me fɛ̀ ni wu, ‘Show, asam hom atek! Nek ngɔn tonong atsak ayɛt ikyɛng ibaane, ya igwɔm azaton nwɔp kusɔk.’

¹⁸“Afɛ́ afaa bɛ́ a fɛ̀ ni wu, ‘Atekari, ánɛy e mi tes akak atoon.’

¹⁹“Atekari me fɛ̀ ni wu, ‘Ya igwɔm azaton nwɔp ntoon.’

²⁰“Asam me akak tɛ a bɛ́, a fɛ̀ ni wu, ‘Atekari, ànɛy ngɔn yo, in da rosom iwu ni icɛk ikpin, in da nɛt e.

²¹Imi fok nnyim ngɔn, nek ngɔn yet kuri anet akak fɛ́ a se gadiring. Wɔɔn kushim atashak ni ngɔn makiyi, itusung narɔ fi da ngɔn di tuus awo.’

²²“Atekari me fɛ̀ ni wu, ‘Ngɔn aduk asam! Won imi da ka tsɛɛt ishɔt ni ikyɛng fi ngɔn fɛ̀, ayet ngɔn rēn fok imi se gadiring, in se tashak, in tusung narɔ fɛ́ da in di tuus awo.

²³Wɛt akyɛ sak fi da ngɔn tsi i di sak itsɔm min ni imyɛ itsɔm awɛ? Nɔng ki in bɛ́s in, ki in shan itsɔm in ni ibarang awɛ?’

²⁴“Nek anɔng, a fɛ̀ na bayɔng fɛ́ ba se ni inyeseng azɔng yɛ, ‘Shan yin ànɛy fɛ́ a se ni bɔk wu, nɔɔk yin anet fɛ́ a bɛ̀ ánɛy kusɔk.’

²⁵“Ba fɛ̀ ni wu, ‘Atekari, iwu bɛ̀ áney kusɔk!’

²⁶“A ka ba bun ni ifɛ̀, ‘Won in ki tak yin, ngma ayɔng fɛ́ a bɛ̀ ikyɛng, ba bi ku barang mo, awɛt ayɔng fɛ́ a se dang ikyɛng, ka gyeet e yɔng fɛ́ a bɛ̀ me, ba bi shan ika.

²⁷Di bɛ́ yin na bafi ifa ni imi me, bayɔng fɛ́ ba raba ni in sot agwɔm bá, fɛɛs yin iba azeng ashon in.’ ”

²⁸Ama fɛ́ aYeso mi fɛrɛng anɔng, a ya kashon ni kutseet sak na aRushelima.

²⁹Ni izen fɛ́ a bɛ́ bakat inɔ naban nwɔp aBetafaji nɛ aBetani ni Ihwyanang Ifat, a tom bafi imɛɛs wu bafaa, a fɛ̀ ni ba,

³⁰“Tsi nɔ yin naban wɔp ya fɛ́ ka se ashon, ni tsin nɔ yin, i da sɛ yin ki tarakey ni rosom azɔng, fɛ́ vit anet fɛ́ a mang teyak ika. Bisik in ika, da bɛ́ yin ni ika azeng.

³¹Kɛ akak ki rip yin fok yɛ, ‘Akyɛ sak fi i tsin bisik in e yɛ?’ Ni fɛ̀ yin ni wu, ‘ATisa shim ika.’ ”

³²Bayɔng fɛ́ a ka ba tom e, tsɛ ba sɛ ikyɛng e kpaf anɔng.

³³Fɛ́ ba se ni ibisik ki tarakey e, atek e, ka ba rip yɛ, “Akyɛ sak fi i tsin bisik yin ki tarakey e yɛ?”

³⁴Ba fɛ̀ ni wu, “ATisa shim ika.”

³⁵Wɛt iba sok ika sak narɔ aYeso, ba di tárà nkpin bà naton e, ba di ngarak na aYeso azaton ka.

³⁶A se ni kutseet, banet tárà ares bà naton irèn.

³⁷Ni izen fɛ́ aYeso ngmash nɛ a nɔ nɛ aRushelima, bakat nɛ karɔ fi irèn tisik sak ni Ihwyanang Ifat, kudyɛng bafi ikuus e kusum, kpa tere Adakunom gbɛrɛy nek iyɛ ikan, nek ngma ntomong abes fɛ́ ba mi yɛrɛ,

³⁸Ba nye, “Awɛng se naton agwɔm fɛ́ a bɛ́s ayɛt iyerek aTisa! Kusonong kukyang azanɛn, na ba nɔɔk Adakunom ízɔk!”

³⁹Bakak ayɛt BaFarasi fɛ́ ba se ayɛt kudyɛng banet e, ba fɛ̀ na aYeso, “Anet itees, gyɔng bafi imɛɛs ngɔn na ba te yuu!”

⁴⁰AYeso tɛ a ka ba bun ni ifɛ̀, “Won in ki tak in, ke ba te yuu, ata ikyɛng na da kpa kukun.”

⁴¹Na tsin nɔɔs nɛ aRushelima, fɛ́ a di kuwɔp e, a tos nek iko,

⁴²a fɛ̀, “Ki ngɔn fi rēn atut ikyɛng fi i da bɛ́ ni kusonong kukyang nɛ banet ngɔn! Awɛt ba mi ki fam yin ayisi.

⁴³Izen bi nye fɛ́ banet ifa ni ngɔn, bi nok kubat ba da te nate, vit kawat.

⁴⁴Ba bi da barak aben, ngma na banet ngɔn fɛ́ ba se ayɛt iwɔp. Vit kuta fɛ́ ba bi wosong azaton kufidang, nek iyin kyem i di yin izen kubɛ́ Adakunom awo.”

⁴⁵Ama anɔng, aYeso tsɛ a nɔ atasa karɔ iya Adakunom ntong, a kpa ro bayɔng fɛ́ ba se ni irɛɛs nkyɔrɔk azɔng.

⁴⁶A fɛ̀ ni ba, “I se ni ijɛk, kari hom bi sot karɔ awon. “Wɛt iyin mi tirik yin ika ‘Kusɔs bakpatang agap.’ ”

⁴⁷Kaakyi kunom, aYeso ya kashon ni itees banet ifɛ̀ Adakunom ni itu iya Adakunom ntong. Wɛt agbat àware, nɛ bafi itees ntsi aMusa, nɛ bashɔn iwɔp nye nyɛk ba da sok kutset wu.

⁴⁸Ngma nɛ anɔng, ba kyem ba sɛ kawat awo, nek ngma banet kusum di te nhwyɛ ni ifɛ̀ wu.