Read icen ALuka 5 Bible Online

ALuka 5 - icen bible

ALuka 5

¹Atuk akak, aYeso kin se ni nyeseng, ni ice ibanang kudúng aJɛnɛsarɛt, banet teng ba kana nyɔ, ba shim ba fok ifɛ̀ Adakunom,

²A di akyɛ-ashi afaa bakat ni kuce ibanang, fɛ́ banet iyisik ízos mi te tsik ina azɔng, iba kin se ni ikusu águnung iyisik ízos bá.

³A tsɛ a nɔ ni kukyɛ ashi me kuzining, kuyɔng e kin yet kufɛ́ aSiman, aYeso fɛ̀ ni wu na bang serek iko sak ayɛt ashi gyeet.

⁴Ama fɛ́ a mi gang kucɛɛt wu, a fɛ̀ na aSiman, “Ti ban nɔ ni kukyɛ ashi ngɔn narɔ katsik, nɔng i da bin barak águnung ngɔn ayɛt e, i da yit ízos dot.”

⁵ASiman fɛ̀ ni wu, “Akɔk-ashon, iyit bang in kɔsɔ yit azeng, in bɔrɔng yit, vit ikyɛng fi in kyem in yit yit. Awɛt nek ikyɛng fi ngɔn fɛ̀, in da ti in barak águnung e.”

⁶Ni izen fɛ́ ba barak agunung e, ba yit ízos yɔk-yɔk fɛ́ ngmash agunung e na a tɛsɛng.

⁷Nek anɔng, ba yes bafidang fɛ́ ba se ni kukyɛ ashi kukak, na ba bɛ́, ba ka ba sɛ mo. Ba tsɛ ba shining ngma akyɛ-ashi afaa me ni ízos, fi kunanang de sak ba kpa tsɛt ke ba te rep na ashi.

⁸Ama fɛ́ aSiman Bitrus di ikyɛng fi ite, a te gururuk ashon aYeso, a fɛ̀, “Tseng di won aTisa, nek imi yet afi inɛn!”

⁹Nek iwu na bayɔng fɛ́ ba se gung ni wu, ayɔɔt ka ba yit nek kuri ízos fɛ́ ba yisik,

¹⁰kpaf anɔng fɛ́ ba aYakubu nɛ aYohana, nnon aZebedi bafidang itomong aBitrus fok. AYeso ma fɛ̀ na aSiman, “Da i bi fok inyim awo; nkum atut sak ashon, i da yisik banet.”

¹¹Nek anɔng, ba turung akyɛ-ashi bá sak amatse, ba won kaakyɛ, ba ku kuus mo.

¹²Izen fɛ́ aYeso kin se ni wɔp kukak, anet akak fi ikparong mi ku ya makiyi. Ni izen fɛ́ a di aYeso, a kpa gururuk ashon wu, a kpa ra awon sak ni wu, yɛ, “ATisa, ki ngɔn fi i shim, ki i di te kyang.”

¹³AYeso nabak kubɔk wu, a di ra anet e, a fɛ̀ ni wu, “Ey, imi shim; ni i sot cɛ́l!” Ni izen izining, ikparong e wat i ku won.

¹⁴AYeso fɛ̀ ni wu, yɛ, “Da i bi tak akak awo, tseng tsi tonong ice ngɔn sak na àware, ni ma nabak kunang ngɔn kpaf ti ikyɛng fi ntsi aMusa fɛ̀ na ba nye nek ite cɛ́l. Nɔng banet kusum bin rēn.”

¹⁵Ngma nɛ anɔng, kucɛɛt naton aYeso, ya kashon ni ibarasa, fi i sak kudyɛng banet tsees nek ifoos wu, ni iwu ka ba tes kyang, ni nrɔk bá.

¹⁶AYeso mi di mɛɛ na kana nye kyɛw, na ras awon.

¹⁷Atuk akak, aYeso kin se ni itees banet, BaFarasi nɛ bafi itees ntsi bakak kin se ni isonong azɔng, ba nes ni nwɔp zizɛɛt nfɛ́ aGalili, ni nfɛ́ aJudiya, nɛ bayɔng fɛ́ ba nes na aRushelima, kukyem aTisa kin se naton wu, mok a di te banet kyang.

¹⁸Banet bakak tsɛ ba ne, na anet akak fɛ́ aduru azining mi ku, ba ku mees naton ameneng. Banet e teng ba tsɛt irèn fɛ́ ba di ki nɔ ni wu ni itu yɔng fɛ́ aYeso di se, nɔng ba bin ku mees ashon wu.

¹⁹Fɛ́ ba bit irèn inɔ nek kudyɛng banet, ba tsɛ ba ngarak ni iwu na gubuk, ba da nɛ ba ku tik aben ni ndun nɛ a te banet, kpaf ashon aYeso.

²⁰Ni izen fɛ́ aYeso di inɔɔk atsak bá, a fɛ̀, yɛ, “Àrɔɔ, ba mi da fuut anɛn ngɔn.”

²¹Bafi itees ntsi aMusa me, nɛ BaFarasi me, kpa cɛɛt wɔɔn bá ye, “Angan yong, a yet a yong fɛ́ a beseng iyerek Adakunom anɔng ɛ? Angan kyem fɛ́ a da fuut anɛn akak ke da Adakunom aziwu awɛ.”

²²AYeso rēn kuyiring fɛ́ ba se ne, a ka ba nye irip, “Akyɛ sak fi i nye yin kuyiring anɔng na ayɛ yin ɛ?

²³Ingan de fi idung se byɛrɛ yɛ, na ba fɛ̀ ‘Ba mi da fuut anɛn ngɔn a,’ ke na ba fɛ̀, ‘Dorok da tseng ɛ’?

²⁴Imi shim fok ni i rēn yin yɛ, Arim Anet bi ice azeng azatse, fɛ́ a da fuut anɛn.” A fɛ̀ na anet fɛ́ a bɔrɔng na aduru irɔm e, “Dorok tsik, sok kameneng ngɔn, tseng sak ari.”

²⁵Ni izen izining, anet e dorok azɔng na ayisi bá, a sok kameneng wu, a tseng sak ari, na woso tere Adakunom.

²⁶Ikyɛng e te kaangan yɔɔt, inyim ka ba yit, ba kpa tere Adakunom, na ba nye, “In mi di yit ikyɛng ayɔɔt atut.”

²⁷Ama anɔng, aYeso wuruk amatse, a tsɛ a sɛ anet ishashang itsɔm mben akak, fɛ́ ba ku yes aLawi, ni sonong ayɛt kubut ishashang itsɔm mben. AYeso fɛ̀ ni wu, “Di kuus mo,”

²⁸aLawi dorok a won kaakyɛ azɔng, a kpa ku kuus mo.

²⁹ALawi tsɛ sak ba nye kuyak bazɔk ari wu nek aYeso, kudyɛng bafi ishashang itsɔm mben, ni ishɛrɛp banet ba kin se ni iyas gung ni iba.

³⁰Awɛt BaFarasi nɛ bafi itees ntsi aMusa, tsɛ ba tonong bafi imɛɛs wu, kafa kawe bá, yɛ, “Akyɛ sak fi iyin yas yin, ni sɔ yin nɛ bafi ishashang itsɔm mben, nɛ ‘bafi inɛn’ ɛ?”

³¹AYeso fɛ̀ ni ba, “Da bayɔng fɛ́ ba se cere ba fɛ̀ ba tsɛt abok awo, tit bafi irɔk.

³²Da imi bɛ́, nek iyes banet batek awo, tit bafi inɛn sak ishan atsak.”

³³Ba fɛ̀ ni wu, “Bafi imɛɛs aYohana mi di mɛɛ na ba nye mak nanu, na ba ras awon, bafi imɛɛs BaFarasi yɔng ba nye kpaf anɔng bà, awɛt ba fɔɔn nkum kuyak, ni isɔs kyɛk.”

³⁴AYeso fɛ̀ ni ba, “Iyin da kyem iroyin na bafidang amatek agwel kuyak, ni iwu rēn resek mo gung ni iba ɛ?

³⁵Izen bi nye fɛ́ ba bi sok amatek agwel e ni ba; ni izen e yɔng wu, fɛ́ ba bi nɛ ba kpa nye mak nanu.”

³⁶A ka ba nye igorok ifɛ̀ yɛ: “Vit anet fɛ́ a sarak icɛk ikpin ifas, na tsɛ na di basak kukpin kuzen. Kɛ akak nye anɔng, i sot a mi beseng kukpin kufas wu, icɛk ikpin ifas e da bang sarak kuzen e, icɛk ikpin ifas e da kyem i nyim ni izen e awo.

³⁷Vit anet fɛ́ a korok ashi anap afas ayɛt itsung-kuruu kuzen. Kɛ akak nye anɔng, ashi anap afas e, da tasak itsung-kuruu me, na ashi anap e, nosong, ni itsung-akpa me beseng.

³⁸Ba nye anɔng awo, ane wu fɛ́ ba nye, ashi anap afas, ba korok ina ayɛt átsung-kuruu afas.

³⁹Vit anet fɛ́ a da shim ama fɛ́ a mi sɔ ashi anap azen, na nɛ na te na shim afas, nek a da fɛ̀, ‘Azen e ta awaat.’ ”