Read icen AYohana 11 Bible Online

AYohana 11 - icen bible

AYohana 11

¹Anet akak fɛ́ ba ku yes aLazarus kin se ni irɔk. A yet aBetani, kaban wɔp fɛ́ aMarya nɛ anganyining aMata di se.

²AMarya me wu fɛ́ arunyining aLazarus ku rɔ, iwu me yɔng fɛ́ a kin korok aYeso name nkɔn ntek nɛ atak, yɛs atak e nɛ akwoy ice wu.

³Nek anɔng, banganyining te itom sak narɔ aYeso, “ATisa, icɛk iyɛ ngɔn se ni irɔk.”

⁴Ni izen fɛ́ aYeso fok anɔng, a fɛ̀, “Kurɔk e kang yet kufi iku awo. Awɛy, ku yet kuyɔng fɛ́ Adakunom di ki sɛ iratek, nɔng Arim Adakunom di ki sɛ iratek ayɛt e.”

⁵AYeso shim aMata nɛ anganyining nɛ aLazarus.

⁶Ngma nɛ anɔng, izen fɛ́ a fok, yɛ aLazarus ku rɔ, a ban nye nkɔs nfaa azɔng narɔ fɛ́ a di se.

⁷Ama anɔng, a nɛ a fɛ̀ nɛ bafi mɛɛs wu, “Won in bun yit sak na aJudiya.”

⁸Wɛt bafi imɛɛs wu fɛ̀ ni wu, “Ka! Anet Itees, ni nkɔs nang, fɛ́ bakɔk-ashon baYahuda tsɛt ba da bara nɛ ata, ngma nɛ anɔng i shim in bun yit azɔng ɛ?”

⁹AYeso fɛ̀ ni ba, “Kaakyɛ kunom bɛ́ mgbɛy nfɛ́ agyip kusɔk abe afaa awɛ? Ngma ayɔng fɛ́ a tsees ni mgbɛy, a turuk kutak awo, nek a yɛrɛ mgbɛy azatse nang.

¹⁰Ngma ayɔng fɛ́ a tsees ni irèn, vit mgbang nɛ a turuk kutak nek vit iwu ni mgbɛy.”

¹¹Ama fɛ́ a mi gang ifɛ̀ me dɔng, a fɛ̀ ni ba, “Afidang yit aLazarus mi men nda; Imi shim in tsin ku shemeng.”

¹²Bafi imɛɛs wu fɛ̀ ni wu, “ATisa, kɛ a se ni nda, a da te kyang kɔ.”

¹³AYeso se ni cɛɛt naton iku aLazarus, nɛ bafi mɛɛs wu sok fok a se ni nda.

¹⁴Nek anɔng aYeso kaba tak wɛshɛk fok, “aLazarus mi ku,

¹⁵imi bi iyɛ ikan nek ikyɛng e te imi vit azɔng, nɔng i da nɔɔk yin atsak. Dorok yin in tseng yit narɔ wu.”

¹⁶AToma, fɛ́ ba ku yes aDidimus[18], fɛ̀ ni ishɛrɛp bafi kuus e, “Dorok yin, in tseng yit, in da tsin kus yit gung ni iwu.”

¹⁷Izen fɛ́ a tsɛ ta azɔng, aYeso tsɛ sɛ aLazarus mi nye nkɔs nnaas ni rɛk.

¹⁸ABetani se bakat amɛl afaa[19] sak nɛ aRushelima,

¹⁹nek anɔng, baYahuda dot tse akɔk ba aMata nɛ aMarya nek iku arunyining bá.

²⁰Nizen fɛ́ aMata fok fok aYeso wuruk, a dorok a tsɛ a ku shan ni irèn. AMarya di wey ari.

²¹AMata fɛ̀ nɛ aYeso, “ATisa, ngɔn fi i se azeng, kɛ arunyining yit ku awo.

²²Awɛt in rēn yɔkɔnɔng ana, Adakunom da ka nɔɔk ngma ikyɛng fi i rip.”

²³AYeso fɛ̀ ni wu, “Arunyining da tɛ dorok.”

²⁴AMata fɛ̀ ni wu, “Imi rēn fok a bi tɛ dorok ni izen idoro bafaben atuk igang azatse.”

²⁵AYeso fɛ̀ ni wu, “Imi wu in yet idoro bafaben, imi wu in yet kutset. Ngma ayɔng fɛ́ a nɔɔk atsak ni mi, kɛ a ku a bi sɛ kutset;

²⁶ngma ayɔng fɛ́ a se ni kutset, fɛ́ a nɔɔk atsak ni mi, a bi ku awo. Ngɔn nɔɔk atsak nɛ anɔng ɛ?”

²⁷AMata fɛ̀ ni wu, “Ey, aTisa, imi nɔɔk atsak fok ngɔn wu i yet Anet-Isheshek, Arim Adakunom e, yɔng fɛ́ ba fɛ̀ a bi bɛ́ na azatse.”

²⁸Ama fɛ́ a fɛ̀ anɔng, a bun a yes anganyining aMarya ni fam, a ku tak fok, “Anet Itees e mi bɛ́, a tsin da risim.”

²⁹Izen fɛ́ aMarya fok anɔng, a wat a dorok ziri sak narɔ wu.

³⁰Na aYeso resek mo dan nɔ ayɛt kaban wɔp e, ni wu resek narɔ fɛ́ aMata di nyim ni wu.

³¹Nizen fɛ́ baYahuda fɛ́ ba se gung nɛ aMarya nek akɔk, di fɛ́ a wuruk amatse ziri, ba ku kuus mo, ba yes fok nyan, a tse tos ni irɛk e.

³²Ni izen fɛ́ aMarya tsɛ ta narɔ fɛ́ aYeso di se, fɛ́ a ku di, a kpa natak wu, a fɛ̀, “ATisa, ki ngɔn fi i se azeng, kɛ arunyining hom ku awo.”

³³Nizen fɛ́ aYeso ku di a tsin tos, gung nɛ baYahuda fɛ́ ba tse gung ni wu, ikyɛng e ku ra iyɛ makiyi.

³⁴A ka ba rip, “I ku nɛt in akɛ?” Ba fɛ̀ ni wu, “ATisa, bɛ́ i da tsi di.”

³⁵AYeso tos.

³⁶BaYahuda fɛ́ ba se azɔng fɛ̀, “Di yin fɛ́ a kushim!”

³⁷Wɛt bakak ayɛt ba fɛ̀, “Iwu fɛ́ a kin tarak ayisi akpatɔn yame, akyɛ ku rone, inye ikyɛng fi i da rone iku anet yɔng ɛ?”

³⁸Ikyɛng e ban ra aYeso iyɛ, a serek bakat ni kurɛk e. Kurɛk e kin yet kusɔs fɛ́ ba fam kanu me ni kuta.

³⁹AYeso fɛ̀ ni ba, “Bingiring in kuta me sak ni fam.” AMata, anganyining akaku me, fɛ̀ ni wu, “Ka, aTisa! Yɔkɔnɔng a mi te nkɔn, nek a mi nye nkɔs nnaas atut.”

⁴⁰AYeso tɛ fɛ̀ ni wu, “Imi mi fɛ̀ ni ngɔn, ki i nɔɔk atsak, i da di ízɔk Adakunom awɛ?”

⁴¹Nek anɔng, ba bingiring kuta me. AYeso ma yɛrɛk sak naton, a fɛ̀, “Ada, imi da tere fi i mi di fok.

⁴²Imi rēn fok ngɔn di foos kaaki izen, wɛt in tsin fɛrɛng anɔng mok banet bang fɛ́ ba se ni nyeseng azeng, da nɔɔk atsak fok ngɔn wu i di tom.”

⁴³Ama fɛ́ a mi fɛrɛng anɔng, aYeso yes ni kutɔ kuratek, “aLazarus, wuruk amatse!”

⁴⁴Akaku me wuruk amatse, ni mbɔk nɛ atak ni karam nɛ alinɛn, nɛ ayisi ni karam ni kudun ikpin. AYeso fɛ̀ ni ba, “Ku bisik in ares irɛk e, nɔng a da tseng!”

⁴⁵Nek anɔng, baYahuda hwyɛt fɛ́ ba tse ite ashow aMarya, fɛ́ ba di ikyɛng fɛ́ aYeso nye, ba di nɔɔk atsak ni wu.

⁴⁶Awɛt bakak ayɛt ba, tsɛ ba tak BaFarasi ikyɛng fɛ́ aYeso ra.

⁴⁷Nek anɔng, agbat àware, nɛ BaFarasi, yes inyim kazumung karatek. Ba kpa tɔ wɔɔn ba yɛ, “Akyɛ fi in se yit ayɛt e yɛ? Di yin fɛ́ anet yɔng tsin raas ntomong ajingjing.

⁴⁸Ki in ku won yit na a ya kashon anɔng, banet kusum da nɔɔk atsak ni wu, nɛ banet aRoma bɛ́ ba shan mben yit nɛ Karɔ Iya Adakunom Ntong yit.”

⁴⁹Wɛt azining ayɛt ba, fɛ́ ba ku yes aKayafas, fi iwu wu ayɛt agbat àware afi iyɛ me dɔng, fɛ̀ ni ba, “Vit ikyɛng fi iyin rēn yin!

⁵⁰Iyin rēn yin fok I wat fɛ́ anet azining da ku nek banet, aza fi mben ngma da wey awɛ?”

⁵¹Kucɛɛt kang fɛ́ aKayafas fɛrɛng da ayet kuyiring ice wu awo, tit tɛ agbat àware afi iyɛ me dɔng, a se ni taas ibes fok aYeso da ku nek mben baYahuda kusum,

⁵²iku wu yet nek mben baYahuda kyɛk awo, iyet ifi nnon Adakunom fɛ́ na se kaakɛ, bin di sot bazining.

⁵³Nkum atuk e yɔng, ba kpa tsɛt irèn isok kutset aYeso.

⁵⁴Nek anɔng, aYeso da a tɛ tsees ni dɛt ayɛt baYahuda awo. Nek anɔng, a tsɛ te myak ice wu nɛ kaban wɔp fɛ́ ba yes ika yɛ aIfrayim karɔ me yet katse, a tsɛ a sonong azɔng nɛ bafi imɛɛs wu.

⁵⁵Fi izen amok baYahuda fɛ́ ba yes aPasova bɛ́ bakat, banet dot wosong nɛ ban wɔp bá, sak nɛ aRushelima ba tsɛ ba kana kusu gyam nek amok aPasova me.

⁵⁶Ba woso itsɛt aYeso, fɛ́ ba nyeseng narɔ iya Adakunom ntong, ba woso risim banet, “Iyin di yin tɛ a da bɛ́ amok e nang ɛ?”

⁵⁷Wɛt agbat àware nɛ BaFarasi, mi tsang tak banet fok ngma ayɔng fɛ́ a di karɔ fɛ́ aYeso di se, na tsɛ tak ziri, nɔng ba da tsɛ ba ku tekap.