Read icen AYohana 14 Bible Online

AYohana 14 - icen bible

AYohana 14

¹“Da iyɛ yin bi beseng awo. Nɔk yin atsak nɛ Adakunom, ni nɔk yin atsak ni mi bà.

²Ari Ada min, narɔ isosok di se dot; ki da anɔng awo, ki in man ki tak yin. Imi yɔng, in tsin nye karɔ azɔng nek iyin.

³Ama fi in tsin nye karɔ nek iyin, in bi tun bun, in ki sok yin nɔng i da sonong yin ni mi, nɔng iyin da se yin gung ni mi bà.

⁴Iyin rēn yin irèn sak karɔ fi in tsin di tseng.”

⁵AToma fɛ̀ ni wu, “ATisa, iyit da in rēn yit karɔ fi ngɔn shim i di tse awo, nɛ anɛ fi in da rēn yit irèn e yɛ?”

⁶AYeso fɛ̀ ni ba, “Imi yet irèn, atsak, ni kutset. Vit anet fɛ́ a tse narɔ Ada, ma a got ni mi.

⁷Ki i fi di rēn yin, ki i rēn yin Ada hom bá. Nkum atut, iyin mi ku rēn yin, i mi ku di yin.”

⁸AFilibus fɛ̀ yɛ, “ATisa, ki tonong yit Ada me nɔng kudaam yit da gang.”

⁹AYeso fɛ̀ yɛ, “AFilibus, ngma nizen fi in mi nye ni yin, ngɔn di rēn awɛ? Ngma anet fɛ́ a mi di di, a mi di Ada hom yɔng. Akyɛ sak fi ngɔn da fɛ̀, ‘Ki tonong yit Ada me yɛ’?

¹⁰Ngɔn nɔɔk atsak fok imi se ayɛt Ada me, nɛ Ada me se ayɛt hom awɛ? Kucɛɛt fi in ki nyes yin e, da in cɛɛt iko nɛ agap ice min awo, ayet Ada fɛ́ a se ayɛt hom, fɛ́ a se ni kutomong wu.

¹¹Nɔk yin atsak kin fɛ̀, imi se ayɛt Ada, nɛ Ada se ayɛt hom; Kɛ ni nɔɔk yin atsak nek ntomong abes fi iyere yin ayi.

¹²“Won in ki tak yin atsak, ngma anet fɛ́ a nɔɔk atsak ni imi, a da ra kuri ntomong fi in raas. A da raas ntomong fi in wat in nang, nek imi yɔng in bun sak narɔ Ada hom.

¹³Kaakyi ikyɛng fi i rip yin ni iyerek hom, in da ki nye yin e, na anɔng fɛ́ banet da ki di iratek Ada hom.

¹⁴Kaakyi ikyɛng fi i rip yin ayɛt iyerek hom, in da nye ide.

¹⁵“Ki i di shim yin, i da nye yin ifɛ̀ hom.

¹⁶Imi da ra awon sak na Ada hom, a da ki tom yin nɛ Afi itabak, fɛ́ a bi sot gung ni yin, ayɛ nɛ ayɛ.

¹⁷Afi itabak e, yet Kabik fɛ́ ka tees banet atsak. Banet azatse da kyem ba ku shan na ayɛ ba awo, nek iba ki mang ku di awo, ba ku rēn awo. Iyin ku rēn yin, nek a se gung ni yin, a da ya kashon ni isot ayɛt yin.

¹⁸Imi da ki won yin tɛ nakpin awo; in bi ti in bɛ́, in ki se yin.

¹⁹Izen kyɛk hyiit, kazatse da tɛ ka di di awo, iyin bi ti i di di yin. Imi yet atset, nek anɔng, iyin bi sɛ yin kutset bà.

²⁰Atuk e yɔng, i bi rēn yin, fok Imi se ayɛt Ada min, iyin se yin ayɛt in, ni imi ayɛt yin.

²¹Kaakyɛ anet fɛ́ a rēn ntsi hom, na nyes ina, ayɔng wu fɛ́ a foos ifɛ̀ hom. Ayɔng fɛ́ a foos ifɛ̀ hom, Ada, da ku tonong ishim, imi di ki te iyɛ ni wu, in da ku tonong ice min wɛshɛk.”

²²AJudas (Ayong yet aYahuda aIskariyoti awo) a fɛ̀ ni wu, “ATisa, akyɛ sak fi ngɔn shim i ki tonong ice ngɔn aziyit kyɛk, da nɛ bafɛ́ azatse awɛ?”

²³AYeso fɛ̀ ni wu, “Ngma ayɔng fɛ́ a di shim, a da fok ifɛ̀ hom. Ada min da kushim, in da sonong yit gung ni wu.

²⁴Ngma ayɔng fɛ́ a rawu dang di shim, da fok itees in awo. Kucɛɛt kang fi i tsin foos yin, yet kunaan awo; ku yet kufɛ́ Ada fɛ́ a di tom.

²⁵In ki tak yin kucɛɛt kang, ni imi ren resek ni iyin.

²⁶Awɛt kɛ Afidang Itseet e, Kabik aJɛrɛ me, ayɔng fɛ́ Ada bi ki tom yin e, ni iyerek hom, iwu bi ki tees yin kaakyɛ, na ki yiring yin ngma ikyɛng fi in ki mang ki tak yin.

²⁷Kukyang fi in tsin ki won yin e, kukyang kunaan fi ki nɔɔk yin. Da in ki nɔɔk in kuyɔng fɛ́ kazatse nesek awo. I bi won yin iyɛ yin ni kudaam awo, i bi fok yin nnyim awo.

²⁸“I mi fok yin, fi in fɛ̀ ni yin, ‘Imi yɔng in tseng, in bi tin bi in ki se yin.’ Ki ifi i di shim yin, ki i bɛ̀ yin iyɛ ikan, fi in shim in bun narɔ Ada hom, nek Ada di wat ni iratek.

²⁹In ki tak yin gyam dan ni ite, nɔng ki i bi ite, i bi nɔɔk yin atsak.

³⁰In da ti in bang cɛɛt dot awo; nek igwɔm azatse kang yɔ́ng a wuruk. Da iwu bɛ̀ agap naton hom awo,

³¹Awɛt kazatse da rēn fok imi shim Ada, fok imi nyes kpaf ikyɛng fɛ́ Ada fɛ́ ni mi. “Dorok yin; in won yit azeng.”