Read icen AYohana 2 Bible Online

AYohana 2 - icen bible

AYohana 2

¹Ni kunom kufɛ́ ataat, ba kin ra kuweneng ne kaban wɔp aKana nɛ aGalili, nggɔ aYeso kin se azɔng.

²Ba kin rini aYeso nɛ bafi imɛɛs wu, sak narɔ iweneng e bà.

³Ni izen fɛ́ ashi anap bɛ́ a gang, nggɔ aYeso tsɛ fɛ̀ ni wu, “Ashi anap ba mi gang.”

⁴AYeso fɛ̀ ni wu, “Aneng, inaan yet akyɛ ayet e yɛ, Izen hom resek.”

⁵Nggɔ wu fɛ̀ nɛ banet itomong e, “Nye yin ngma ikyɛng fɛ́ a fɛ̀ ni yin.”

⁶Ányin ábush karataat afɛ ata kin se bakat azɔng; fɛ́ baYahuda di kus nkap kpaf ti nggɔn ba di se, kaakyi kubush kuzining ya ítsɛ́n-imaas nsɔk nfaa sak ntaat.

⁷AYeso fɛ̀ ne bafi itomong e, “Shining yin ábush e nɛ ashi.” Ama fɛ́ ba shining ábush e nɛ ashi me nyif,

⁸a fɛ̀ ni ba, “Bɔ yin gyeet, tsi nɔɔk yin akɔk-ashon kuro iweneng e.” Ba nye kpaf anɔng.

⁹Izen fɛ́ akɔk-ashon kuro iweneng e fubuk ashi fɛ́ a mi sot ashi anap e, ni wu dan rēn karɔ fɛ́ ba di ne ni ina. Nkum basam e kyɛk fɛ́ ba irēn, nek anɔng, a yes amatek agwol e.

¹⁰A fɛ̀ ni wu, “Amatek agwol tin nesek ashi anap atek ni imɛsɛng e, ama fɛ́ kaangan mi sɔ a ku kyem, na nɛ na bene nɛ ayɔng fɛ́ da amak ta awo ni gang e anɛ, wɛt ngɔn tsi sak atek e, ni turung ina yɔkɔnɔng ɛ!”

¹¹Kutomong abes kang fɛ́ aYeso kin ra nɛ aKana afɛ́ aGalili, iko ko ku yet kutomong abes imɛsɛng wu, bafi imɛɛs wu nɔɔk atsak ni iwu.

¹²Ama kuweneng e, a tseng sak nɛ aKafarnahum a tse nye nkɔs nfa nɛ nggɔ wu, nɛ barunyining, nɛ bafi imɛɛs wu.

¹³Ni izen fi kunom amok iyiring na aPasova baYahuda (kunom fɛ́ atomaza kin shorosho nasa nnon aIsrela na aMasat) bɛ́ bakat, aYeso tseng sak nɛ aRushelima.

¹⁴A tsɛ sɛ bafi ijik atasa arɔ iya Adakunom ntong, na ba tsin rɛɛs inyak, ni ibon, nɛ abɔp, nɛ bakak ni sosok na ákon ishesheng itsɔm bá.

¹⁵Nek anɔng, aYeso bat ahwyereng itsam, a kpa ka ba zim mo pet sak amatse katasa arɔ iya Adakunom ntong e, pet ni inyak ni ibon, a shik ica itsɔm bafi ishesheng e, nɛ nye gup ákon bá me.

¹⁶A fɛ̀ na bafi irɛɛs abɔp, “Turung yin nkyɔrɔk nang azeng! Akyɛ sak fi i da tirik yin kari Ada min na ka sot karɔ ijik ɛ!”

¹⁷Bafi imɛɛs wu wat ba yiring fok i se ni jɛk: “Ifup ari ngɔn bi di ya iyɛ.”

¹⁸Bágwɔm ntsi baYahuda ku nye irip yɛ, “Akyɛ kuri kutomong abes fi ngɔn da ki nye yit ɛ fi ku da ki tonong yit fok ngɔn kyem ni inye ikyɛng deng ɛ?”

¹⁹AYeso fɛ̀ ni ba, “Fo yin Kutu iya Adakunom Ntong kang, imi da ti in donong iko ayɛt nnom ntaat.”

²⁰BaYahuda shim, “Akyɛ! Ba sok ayɛ nsɔk nnaas ne karataat ba di nok Kutu iya Adakunom Ntong kang, ngɔn da bi fɛ̀ fok i da donong iko ayɛt nnom ntaat a?”

²¹Kutu iya Adakunom ntong fɛ́ aYeso tsin cɛɛt naton ko yet kurɔm wu.

²²Ama fɛ́ ba ku donong ni irɛk, bafi imɛɛs wu nɛ ba yiring fok a kin mang fɛrɛng anɔng. Ba di nɔɔk atsak na aYeso ni Ifɛ̀ Adakunom.

²³Ni wu mo azɔng nɛ aRushelima nek amok aPasova, banet dot di ntomong abes fɛ́ a ras, ba di nɔɔk atsak ni iyerek wu.

²⁴Ngma nɛ anɔng, aYeso di te iyɛ ni ba awo, nek iwu rēn nse ba ngma.

²⁵Da iwu tsɛt akak fɛ́ a da ku tak nse anet awo, nek iwu rēn nse banet.