Read icen AYohana 21 Bible Online

AYohana 21 - icen bible

AYohana 21

¹Ama anɔng, aYeso bang tɛ tonong ice wu, sak ne bafi imɛɛs wu, ni ice ibanang izek aTibariyas. Ikyɛng e kin se ane:

²ASiman aBitrus, nɛ aToma (fɛ́ ba ku yes aDidimus), nɛ aNataniyel fɛ́ a ne na aKana afi mben aGalili, ni nnon aZebedi nafaa, nɛ bafi imɛɛs aYeso bakak bafaa, ba kin se gung azɔng.

³ASiman aBitrus fɛ̀ ni iba, “Imi yɔng in tsin yisik ízos,” Wat ishɛrɛp bafi imɛɛs e fɛ̀ ni iwu, “Iyit da tse yit ngma ni ngɔn.” Ba wuruk, ba tse ba nɔ ayɛt kukyɛ ashi, wat katuk e yɔng kusum, ba yit ikikak awo.

⁴Ne bop adiding, aYeso bɛ́ a nyeseng ni ibanang. Bafi imɛɛs wu vit irēn fok iwu yɔng.

⁵AYeso ka ba rip ye, “Bacam, i mi kyem iyit yin ízos ikak ɛ?” Ba fɛ̀ ni iwu, “Awey yo!”

⁶AYeso fɛ̀ ni ba, “Ta yin agunung yin abak kubɔk iyak kukyɛ ashi me, i da yit yin ide.” Nek anɔng, ba ta agunung ba kpaf te aYeso di fɛ̀, ba bɔ ízos dot makiyi, ba kyem ba kɔrɔk agunung e awo, nek kunanang.

⁷Wat afi-imɛɛs e yɔng, fɛ́ aYeso di te iyɛ ni wu, a fɛ̀ ne aBitrus, “Ye aTisa yit yɔng!” Izen fɛ́ aSiman Bitrus fok fɛ́ a fɛ̀ ni wu, “Ye aTisa yit yɔng,” a sok kukpin wu a te iko, nek a kin tsang tun iko, a wat a furuk sak ayɛt ashi.

⁸Ishɛrɛp bafi imɛɛs e, ku kuus mo sak ayɛt kukyɛ ashi me, nɛ ba kɔk agunung e, ni ízos ngmef. Nek kuyikyik ba kin se bakat atak anakat ataat sak ni ice ibanang.

⁹Izen fɛ́ ba mi wuruk sak ni ice ibanang, ba di ica irong, ni ízos naton e, nɛ akpam.

¹⁰AYeso fɛ̀ ni ba, “Bɛ́ yin ni ízos ikak, ayɛt idɔng fi i tsin meseng yit yin.”

¹¹Wat aSiman Bitrus tse a ngarak kukyɛ ashi me, a ka ba se mo ikɔrɔk agunung ízos e sak amatse. Agbat azós fɛ́ a se ayɛt agunung e, se anakat azining ni nsɔk ntoon, ni ide itaat (153). Ngma ni kudot de, agunung e sarak awo.

¹²AYeso fɛ̀ ni ba, “Bɛ́ te yin awɛng.” Vit akak ayɛt bafi imɛɛs wu me, fɛ́ a kyem a bi iyɛ a ku rip, “Ngɔn yet angan ɛ?” Nek iba rēn fok a aTisa yɔng.

¹³AYeso tse a sok akpam e, a ka ba nɔɔk, a tɛ sok ízos e, a ka ba nɔɔk.

¹⁴Izen iyeng yet ifɛ́ ataat, fɛ́ aYeso tonong ice wu, sak ne bafi imɛɛs wu, ama fɛ́ ba mi dorok kukom wu.

¹⁵Ama fɛ́ ba mi gang iya kuyak, aYeso fɛ̀ ne aSiman Bitrus, “ASiman, arim aYohana, ne atsak ngɔn di shim iwat ba ba yɛ?” ABitrus fɛ̀ ni wu, “Ey, aTisa ngɔn rēn, fok imi da shim.” AYeso fɛ̀ ni wu, “Yɛrɛ naban ítsamang hom.”

¹⁶AYeso tɛ ban ku rip, irip ifɛ́ afaa, “ASiman, arim aYohana, ne atsak ngɔn di shim ɛ?” ABitrus fɛ̀ ni wu, “Ey, aTisa ngɔn rēn fok imi da shim.” AYeso fɛ̀ ni wu, “Tot ítsamang hom.”

¹⁷A tɛ bang ku rip, irip ifɛ́ ataat, “ASiman, arim aYohana, ngɔn di shim ɛ?” Iyɛ aBitrus beseng, nek aYeso ku rip, a te kataat ye, “Ngɔn di shim ɛ?” ABitrus fɛ̀ ni wu, “ATisa, ngɔn rēn kaakyi ikyɛng; ngɔn rēn fok imi da shim.” AYeso fɛ̀ ni wu, “Yɛrɛ nabin ítsamang hom.

¹⁸Won in da tak atsak, ni izen fi ngɔn kin yet acam, ngɔn ma ni tes ares ikyɛng ngɔn, ni tsees kaakɛ fi i shim; Wat ama fi, i bi kop, i bi nabak mbɔk ngɔn, nɛ kak da tes ares, nɛ tsees ni ngɔn narɔ fi i shim.”

¹⁹AYeso fɛ̀ anɔng, nek a di tonong kuri iku fɛ́ aBitrus bi ku, fi i bi bɛ́ ni iratek sak ne Adakunom. Ama ifɛ̀ me dɔng, aYeso fɛ̀ ni wu, “Di kuus mo.”

²⁰ABitrus tirik, a di afi-imɛɛs e yɔng, fɛ́ aYeso di te iyɛ ni wu, a tsin ka ba kuus mo. (Iwu me yɔng, fɛ́ a kin di te yendeng, ni agwɔm aYeso, ni izen fɛ́ ba kin tsin ya kuyak atuk, fɛ́ a kin rip aYeso ye, “ATisa, angan wu fɛ́ a da ka rɛp ɛ?”)

²¹Ni izen fɛ́ aBitrus ku di, a rip aYeso, “ATisa, a yo anɛ?”

²²AYeso fɛ̀ ni wu, “Ki imi shim ne di wey ni kutset, sak izen fi in bi tin di bun, kudaam ngɔn yet akyɛ? Ifɔɔn yet di kuus mo.”

²³Nek anɔng, ifɛ̀ me teng i tseng ayɛt bafi ikuus aYeso fok, afi-imɛɛs yɔng bi ku awo. Da kucɛɛt fɛ́ aYeso fɛ̀ yet fok da a bi ku awo; ikyɛng fɛ́ a fɛ̀ yet, “Ki imi shim, ne di wey ni kutset sak izen fi in bi tin di bun, kudaam ngɔn yet akyɛ?”

²⁴Afi-imɛɛs e yɔng, wu fɛ́ a tsin taas nkyɔrɔk e nang, fɛ́ a tɛ, a te iko ni ijɛk. Iyit rēn yit fok kucɛɛt wu yet atsak.

²⁵Nkyɔrɔk di se dot fɛ́ aYeso kin nye. Ki ba kin fɛ́ ba jɛk ina ngma ni nzizining, imi di te ke ngma kazatse, bɛ̀ kawat fɛ́ ka di ki sok afumung e awo.