Read icen Ntomong Batom 12 Bible Online

Ntomong Batom 12 - icen bible

Ntomong Batom 12

¹Ni izen e yɔng wu, agbat agwɔm aHiridus yisik bakak ayɛt bafi ikuus aYeso, a ka ba nesek izot.

²A te na ba fɛt aYakubu arunyining aYohana na awal.

³Fɛ́ aHiridus di fok ikyɛng fɛ́ a nye itɛrɛk baYahuda iyɛ, a sak ba ku tekap aBitrus. Ikyɛng e deng kin te ni izen Amok Akpam Vit aYiis.

⁴Ama fɛ́ ba ku tekap, a ku te kpaf ari inyang, a ku sak ni bɔk batsom baninaas, baninaas, asa anaas na ba kuyɛrɛ. Kuyiring aHiridus kin yet fok a bi ne a tun aBitrus ni bang na a ku tsɛɛt ishɔt ama amok e.

⁵Awɛt na aBitrus resek mo ari inyang e, bafi ikuus ra awon makiyi nek iwu.

⁶Natuk akatson fɛ́ aHiridus bi tsɛɛt aBitrus ishɔt, a se ni nda, ba mi ku rosom na anyang afaa nate batsom bafaa. Na batsom e bakak se ni itot katisi kari inyang e.

⁷Ni izen izining, kari inyang e wat ka ron gbey, atomaza bɛ́ a nyeseng ashon aBitrus. Atomaza me ku bamang mok na a shemeng, a fɛ̀ ni iwu, “Dorok, ziri ziri!” Anyang e wat a tik jerek ni mbɔk wu.

⁸Wat atomaza me fɛ̀ ni wu, “Te ares ngɔn, te akpatak ngɔn” Ama fɛ́ a nye anɔng, atomaza me fɛ̀ ni wu, “Te kukpin amatse ngɔn, di kuus mo.”

⁹ABitrus dorok a di rosok atomaza me ba won kari inyang e. Iwu yes gyan a tsin rasak nabos. A kyem a rēn fok ikyɛng fi i tsin te yet atsak awo.

¹⁰Ba bɛ́ ba got bafi itosok imɛsɛng e, ne bafɛ́ afaa me, izen fɛ́ ba bɛ́ ba ta na katisi ari inyang kafi igang e sak ayɛt iwɔp fɛ́ ba nye ika na atsom, katisi me wat ka tarak ikyɛng ka. Nek anɔng ba di tatɔk, ba kpa tseng na agbat irèn iwɔp e. Izen fɛ́ ba se na anɔng, wat aBitrus fɛ́ di atomaza me mi te bit, a ku won aziwu.

¹¹Ni izen e yɔng wu aBitrus bun ni nhwyɛ wu, a fɛ̀, “Ikyɛng e yet atsak, aTisa tom atomaza wu, na a di sheshek ni bɔk aHiridus, na a di tun ni ikyɛng fɛ́ baYahuda tsɛt na ba nye ni imi!”

¹²Ama fɛ́ a di anɔng, a yit irèn sak ari aMarya, nggɔ aYohana fɛ́ ba ku yes aMarkus, karɔ fɛ́ banet mi kana tusung dot ba se na awon.

¹³Ni izen nɔng fɛ́ aBitrus rus katitu amatse, kanamang yɔng fɛ́ ka ra kutomong ari me fɛ́ ba ka ka yes aRuda, ka tse nɔng ka da ku tarak e.

¹⁴Nkum fɛ́ ka fok kutɔ aBitrus, nek kudot ifeng, ka wat ka won itarak katitu me, ka tɛ bun sak ayɛt e, ka tse ka tak banet ngma kusum ye, “ABitrus yɔng ni nyeseng atitu!”

¹⁵Ba fɛ̀ ni ika, “Ice ngɔn yet izining awo!” Fɛ́ kago me di ban, ba fɛ̀, “A da yet atomaza wu wu!”

¹⁶Ni izen e yɔng, aBitrus woso tsot katitu me. Ama fɛ́ ba ne ba tarak katitu me, ba ku di, ikyɛng e ka ba te kpɔrɔk.

¹⁷A ka ba tonong ni itsambɔk fok na ba te yuu, a ma ka ba tak irèn fɛ́ Adakunom ku tun mo ari inyang. A fɛ̀ ni iba, “Tak yin aYakubu ni nshɛrɛp baruneng ikyɛng fi ite.” Ama anɔng, a yit irèn sak narɔ kakak.

¹⁸Fɛ́ kadiding nye, kudaam hwyɛ awo nɔ nate batsom e, naton ikyɛng fi ite na aBitrus.

¹⁹Agbat agwɔm aHiridus sak na ba tse ba ku bɛ́ na aBitrus. Fɛ́ ba ku bit, aHiridus risim batsom e, a nɔɔk ifɛ̀ na ba fɛɛs iba. Ama anɔng, aHiridus won mben aJudiya, a tseng sak na aKaisariya a tse sonong azɔng nfi ki izen.

²⁰Ni izen e yɔng, aHiridus beseng iyɛ ne banet aTiya nɛ aSidon. Nek anɔng, ba tun banet fɛ́ ba da tsɛt inosong-ashi ni wu, nek banet mben e tes iyɛ naton mben aHiridus nek isɛs kuyak iya. Banet fɛ́ ba tun e, ba sɛ irun ama aBilastus agbat asam fɛ́ a ra kutomong inyes igwɔm kameneng,

²¹ba ka ba te izen inyim na aHiridus. Atuk fi kunom inyim e nye, aHiridus nɔ ayɛt ares igwɔm wu, a sonong ni kuta igwɔm wu, a kpa cɛɛt ni iba.

²²Fɛ́ a se ni kucɛɛt, banet e tang nkun, na ba ku tere ye, “Kutɔ kang yet kufɛ́ kaba adakunom, da kufɛ́ anet awe awo!”

²³Ni izen izining, nek aHiridus rawu dang nɔɔk Adakunom iratek, atomaza aTisa wat a ku tɛmɛng sak aben, itsusuk ku ya, a ku.

²⁴Ngma na anɔng, ifɛ̀ Adakunom ya kashon ni i di barasa ni ifush.

²⁵Ni izen fɛ́ ba aBarnabas nɛ aShawulu gang ikyɛng fi i tse ni iba, ba tɛ ba won aRushelima, ba sok aYohana, fɛ́ ba ku yes aMarkus gung ni iba.