Read icen Ntomong Batom 14 Bible Online

Ntomong Batom 14 - icen bible

Ntomong Batom 14

¹Fɛ́ ba aBulus nɛ aBarnabas tse ba ta na aIkoniyum, ba tse ba nɔ narɔ inyis baYahuda. Ba shara ifɛ̀ azɔng e me ni irèn fɛ́ banet hwyɛt di nɔɔk atsak, baYahuda nɛ bafi ilem aGirik.

²Awɛt baYahuda yɔng fɛ́ ba raba dang nɔɔk atsak, ba di te Ícɛn-iduk idorok nhwyɛ, ba di tes nadɔm na ayɛ bá nɔng imaan e bin se nate bafi ikuus e ni iba.

³Wat ba aBulus nɛ aBarnabas ban nye nkɔs gaan azɔng, ba woso ishara ifɛ̀ aTisa ni iyɛ izining. ATisa run kama kutomong bá ni itek fi i sak ba ras ibes ni nkyɔrɔk ajingjing.

⁴Kuhwyɛ banet iwɔp e, kana ikaas; bakak run kama baYahuda, ne bakak run kama batom aYeso.

⁵Bafi Ícɛn-iduk e, nɛ baYahuda tse ba moon kutɔ gung ne bakɔk-ashon bá, nɔng ba da bin nesek ba aBulus nɛ aBarnabas mgbang, ba da ka ba woro ne ata.

⁶Fɛ́ batom e fok ikyɛng fi i tsin tseng, ba teng sak ni nwɔp aLikoniya, na aListira ne aDerbe, ni nwɔp in bakat,

⁷ba ya kashon ni ishara ifɛ̀ itek e azɔng.

⁸Azɔng na aListira, ba sɛ anet akak, fɛ́ a yet amerek e, neme ni tes wu, atak yɔng merek anɔng, a kin man mara kutseet awo.

⁹Anet e di sak kuto ni ishara ifɛ̀ fɛ́ aBulus se ne. ABulus di sak ayisi gbit na anet e, a di fok anet e bɛ̀ inɔɔk atsak fɛ́ ba da kyem ba ku te mo kyang,

¹⁰aBulus ta kutɔ gbɛrɛy ye, “Dorok tsik na atak ngɔn!” Ni ifok anɔng, anet e furuk lot, a kpa shesh.

¹¹Ni izen fi kudyɛng banet e di ikyɛng fɛ́ aBulus nye, ba ta nkun ni icɛn bá ifɛ́ aLikoniya, “Nabannom mi tik nate yit ni nrɔm banet awe atut!”

¹²Ba te aBarnabas iyerek aZayus, na ba te aBulus iyerek aHarmis nek iwu wu a kin yet anet icɛɛt.

¹³Wat àware atsi aZayus, fi kutu atsi wu se bakat azɔng ama iwɔp e, a tse a ne na amung ashoy, a te tsik wu atisi iwɔp. Àware atsi me nɛ banet iwɔp e, tsɛt ba inabak nabak-akuce bá sak na ba aBulus.

¹⁴Ni izen fɛ́ ba aBarnabas nɛ aBulus, batom aYeso rēn anɔng, ba sarák ares irɔm bá, ba nɔ nate banet ni i tsi ni nkun,

¹⁵“Ka! Ábaruneng, akyɛ sak fi i nye yin anɔng ɛ? Iyit yet yit banet inam na nasok nagbɔng ti yin. Iyit tsin ki shara yin ifɛ̀ itek ye, ni i wosong yin ntomong abap nang sak na Adakunom atset, ayɔng fɛ́ a nye kazanɛn, nɛ kazatse, ni izek, ngma ni nkyɔrɔk fi in se ayɛɛt na.

¹⁶A kin se ayame, Adakunom wosong banet ne ba nye ikyɛng fɛ́ ba shim.

¹⁷Ngma na anɔng, a ki mang won banet vit ikyɛng idi awo: A ki tonoso yin itek wu ni iza fi ines azanɛn, a saas nayak akɔ yin nyes ni izen ye; a ki nesek yin ihwya, na ki shinishi yin ni iyɛ ikan.”

¹⁸Ngma kucɛɛt fɛ́ ba aBulus nɛ aBarnabas nye, a ka ba se gbang na ba ro na banet e inabak nabak-akuce e sak ni ba.

¹⁹Wat baYahuda bakak tse ba ne na Antakiya nɛ aIkoniyum, ba bɛ́ ba sɔ nafa banet e, ba woro aBulus na ata, ba ku kɔk sak ama iwɔp, ba yes fok a mi ku.

²⁰Ama fɛ́ bafi ikuus ku te nate, a dorok tsik, a tɛ bun sak ayit iwɔp e. Akatson, iwu na aBarnabas won kuwɔp e sak na aDerbe.

²¹Ba tse ba shara ifɛ̀ itek ni wɔp e yɔng, ba sɛ bafi ikuus dot. Ba tseng sak na aListira nɛ aIkoniyum nɛ Antakiya,

²²ba ban gbingding bafi ikuus, ba ka ba barang mo agap ye na ba ya kashon iyit inɔɔk atsak. Ba fɛ̀ ye, “I se gbing-gbing ni in nyiis yit ni mgbang in da ni nɔ yit ari igwɔm Adakunom.”

²³ABulus nɛ aBarnabas, di saas bashɔn na kaakye karɔ inyis bafi ikuus, ayɛt awon ni itekap anu, ba ka ba nabak sak na aTisa, ayɔng fi iba di te iyɛ.

²⁴Ama fɛ́ ba got ni mben aPisidiya ni mben aPamfiliya,

²⁵ba tse ba shara ifɛ̀ me ni wɔp aPaga, ba da ne ba tisik sak ni wɔp Ataliya.

²⁶Izen fɛ́ ba won Ataliya, ba wɔk ayɛt kukyɛ ashi sak na Antakiya, narɔ fɛ́ ba di te itek Adakunom ayɛt kutomong fɛ́ ba mi gang.

²⁷Ni izen fɛ́ ba tse ba ta azɔng, ba tusung bafi ikuus narɔ kazining, ba kpa ka ba taas ngma kutomong fɛ́ Adakunom ra ni iba, ne irèn fɛ́ Adakunom mi tarak katitu fi Ícɛn-iduk di shashan atsak.

²⁸Ba sot azɔng na bafi ikuus e sak izen gyet awo.