Read icen Ntomong Batom 15 Bible Online

Ntomong Batom 15 - icen bible

Ntomong Batom 15

¹Banet bakak ne na aJudiya, ba bɛ́ ba kpa tees bafi ikuus fɛ́ ba se na Antakiya ye fok, “I se gbing-gbing ba ki ya yin katse, kpaf ti nggɔn fɛ́ aMusa tees banet e, ke da anɔng awo, vit iyin ni i sɛ isheshek.”

²Ikyɛng e dɔng bɛ́ ne nanan gyet awo nate banet e nɛ ba aBulus nɛ aBarnabas. Nek anɔng, ba kasa ba aBulus nɛ aBarnabas nɛ bafi ikuus bakak, ba ka ba sak na ba ngarak sak na aRushelima, na ba tse ba di batom aYeso nɛ bashɔn nɔng ba bin fok ice icɛɛt e.

³Itusung bafi ikuus e, ka ba te ni irèn. Wat fɛ́ ba se ni kutseet, ba got ni mben aFinikiya nɛ aSamariya, na ba teng ba taas bafi nwɔp e fok, bafi Ícɛn-iduk mi sot bafi ikuus bà. Ikyɛng e nɔɔk ngma bafi ikuus iyɛ ikan makiyi.

⁴Ni izen fɛ́ ba tse ba ta na aRushelima, itusung bafi ikuus e nɛ batom aYeso nɛ bashɔn ka ba shan ni mbɔk nfaa. Wat ba aBulus kpa ka ba taas ikyɛng fɛ́ Adakunom ra ni mbɔk bá.

⁵Awɛt bakak ayɛt bafi ikuus e yɔng fɛ́ ba moon ice na BaFarasi, ba dorok tsik, ba fɛ̀, “I se gbing-gbing Ícɛn-iduk na ba ka ba ya katse, na ba ka ba te na ba nye ikyɛng fi itees ntsi aMusa fɛ̀.”

⁶Batom aYeso nɛ bashɔn bafi ikuus nyim, nɔng ba bin tɔrɔng naton ifɛ̀ me deng.

⁷Ama fɛ́ ba mi tɔrɔng ifɛ̀ me tsik-tsik, aBitrus dorok tsik, a fɛ̀ ni iba, “Ábaruneng, iyin rēn yin ni nkɔs ama, Adakunom kin di kasa ayɛt yin, fok ni in sot ayɔng fi Ícɛn-iduk da fok ifɛ̀ itek na nu hom, nɔng ba di shan atsak.

⁸Adakunom fɛ́ a rēn kuyiring akaangan, a tonong ishan ba ne Kabik aJɛrɛ fɛ́ a ka ba nɔk, kpaf tɛ fɛ́ a kin ki nɔɔk yit mo.

⁹Vit ishim ice fɛ́ Adakunom tonong nate yit ni iba, nek iwu mi sak ayɛ bá sot cɛ́l nek inɔɔk atsak bá.

¹⁰Nek anɔng, akyɛ sak fi iyin shim imara yin Adakunom, ni tes yin bafi imɛɛs bang kunanang fi da iyit ke badakop yit kyem ba ceshek awo yɛ?

¹¹Awɛt iyit bɛ̀ yit inɔɔk atsak fok, a yet nek itek fi i ne na aTisa yit aYeso wu fi in di sɛ yit isheshek, kpaf ti iba di sɛ bà.”

¹²Ngma banet azumung e di wey yuu ni izen fɛ́ ba aBarnabas nɛ aBulus se ni itaas ntomong abes ni nkyɔrɔk ajingjing fɛ́ Adakunom nye ni bɔk ba nate Ícɛn-iduk.

¹³Ama fɛ́ ba gang kucɛɛt e, aYakubu fɛrɛng ye, “Ábaruneng, wes yin ato ni imi.

¹⁴ASiman Bitrus tsin mɛsɛng ki tonong yit kuri irèn fɛ́ Adakunom kin tung di tonong ishim wu sak ni Ícɛn-iduk, na anɔng wu fɛ́ a di sɛ bayɔng fɛ́ ba bi iyerek wu ayɛt ba.

¹⁵Ifɛ̀ me deng tseng kpaf ni ifɛ̀ fɛ́ atan kin jɛk ye,

¹⁶‘Ama anɔng, in bi ti in bun, in bin nok kubut aDauda yɔng fi ku kin kpa. In bi ti in nok abát e yɔng, na a bun gyat,

¹⁷in bi nye anɔng, nɔng ishɛrɛp banet e bin di tsɛt aTisa, na anɔng wu fi in di ki sɛ bayɔng fɛ́ ba bi iyerek hom ayɛt Ícɛn-iduk,

¹⁸aTisa fɛ̀, bayɔng fɛ́ ba ras nkyɔrɔk nang fɛ́ ba mi rēn ina gbang-gbang yame.’

¹⁹“Nek anɔng, imi nyeseng naton, da iyit bi te yit kunanang naton Ícɛn-iduk fi i tsin tiri sak ishan Adakunom awo.

²⁰Awɛt, won in ka ba jɛk yit kufumung, ni in fɛ̀ yit ni iba, da na ba ya nayak fɛ́ ba mi beseng ina ni nabak sak na nabannom awo, da ba bi ra kubi awo, da ba bi ya ikyɛng fɛ́ ba firik kutɔ me awo, da ba bi ya nasok awo.

²¹Nek neme na ayɛ ama bafi ishara ijɛk aMusa na kaakyi iwɔp di se, nek ba fa iye na narɔ inyiis baYahuda kaakye aSabat.”

²²Ama anɔng, batom aYeso nɛ bashɔn e ni itusung bafi ikuus ngma kusum, ba kasa bakak ayɛt banet bá, ba ka ba tom sak na Antakiya gung na aBulus nɛ aBarnabas. Ba kasa aJudas (fɛ́ ba ku yes aBarsabas), nɛ aSilas, banet bafaa me yet bakɔk-ashon bafi ikuus.

²³Ba ka ba yirik ni kufumung fɛ́ ba di jɛk ane: Kufumung e kang ne na baruneng yin, iyit batom aYeso nɛ bashɔn bafi ikuus. Sak ni yin ábaruneng, bafi Ícɛn-iduk fi ikuus yin aYeso fi i se yin na Antakiya, nɛ aSiriya, nɛ aKilikiya. In ki te show yin.

²⁴In mi fok yit fok bakak ne azeng narɔ yit, ba bɛ́ ba te kudaam azɔng nate yin ni in ncɛɛt bá, ba ki te yin kudaam na ayɛ. Da iyit ba fi in ka ba tom yit na ba nye anɔng awo.

²⁵Nek anɔng, ama fi in mi tɔrɔng yit, in di yit i se gyat ni in kasa yit banet, fi in da ka ba tom yit azɔng ni yin gung na bacɛk iyɛ yit, ba aBarnabas nɛ aBulus,

²⁶banet fɛ́ ba mi nɔɔk nwaa kutset bá nek kutomong aTisa yit aYeso Kristi.

²⁷Nek anɔng wu fi in di tun yit ba aJudas nɛ aSilas, ba ki tak yin ne kanu bá ikyɛng fi in jɛk yit.

²⁸Nek i se na Kabik aJɛrɛ ni yit gyat da in ki barang yin mo kunanang fi ku wat nkyɔrɔk nà awo:

²⁹I bi ya yin ikyɛng fɛ́ ba mi nabak-akuce sak na nabannom e awo, da i bi ya yin nasok awo, i bi ya yin ikyɛng fɛ́ ba firik kutɔ me awo, da ba bi ra kubi awo. Ki iyin bereng yin ace yin ni nkyɔrɔk nang, i nye yin yɛɛt. Sot yin kyang.

³⁰Wat ama fɛ́ ba mi ka ba te ni irèn, ba yit irèn sak na Antakiya, ama fɛ́ ba mi tusung bafi ikuus e, ba ka ba nɔk kufumung e.

³¹Ni izen fɛ́ bafi ikuus e fa kufumung e, ba nye iyɛ ikan nek agap fi ku ka ba barang mo.

³²Wat ba aJudas nɛ aSilas, fɛ́ ba yet batan, ba bang ka ba barang mo agap ni inɔɔk atsak bá ni kucɛɛt fɛ́ ba nye barunyining e.

³³Ama izen fɛ́ ba nye azɔng, bafi ikuus e ka ba te ni irèn, na ba tse ba tik kyang. Ba bun sak na bayɔng fɛ́ ba ka ba tom e.[26]

³⁵Awɛt ba aBulus nɛ aBarnabas di wey na Antakiya, iba nɛ bakak gaan ya kashon ni itees ni ishara ifɛ̀ aTisa.

³⁶Ama nnom nkak, aBulus fɛ̀ ne aBarnabas, “Won in ti in bun yit, in tsin te gang yit baruneng ni nwɔp yɔng fi in kin di shara yit ifɛ̀ aTisa, in di yit iya kashon bá.”

³⁷ABarnabas shim ke aYohana fɛ́ ku yes aMarkus tseng gung ni iba.

³⁸Awɛt aBulus run kama na ba tseng na anet fɛ́ a kin teng a ka ba won na aPamfiliya, na nu kutomong awo.

³⁹Ba kpa nanan makiyi, nek anɔng, ba ka na kam. ABarnabas sok aMarkus gung ni iwu ba nɔ ayɛt kukyɛ ashi sak na aSayipurus,

⁴⁰awɛt aBulus a sok aSilas ba yit irèn ama fɛ́ bafi ikuus mi di te acicɛ aTisa ni ba.

⁴¹Ba aBulus e got ni mben aSiriya nɛ aKilikiya, ba teng na ba di barasa itusung bafi ikuus agap.