Read icen Ntomong Batom 24 Bible Online

Ntomong Batom 24 - icen bible

Ntomong Batom 24

¹Ama nkɔs ntoon, agbat-agbat àware Ananiyas tisik sak na aKaisariya gung nɛ bashɔn nɛ anet icɛɛt fɛ́ ba ku yes aTatulus nek ite kukun aBulus ashon agwɔmna.

²Ni izen fɛ́ ba nɔ na aBulus, aTatulus kpa nɔɔs ni kukun wu ashon aFeliks, fok: “Neme fi ngɔn di kpa igwɔm ngɔn, in mi sɛ yit kusot kukyang, kutsik iyɛrɛ ngɔn mi tes nkyɔrɔk zizɛɛt ni mben yit.

³Na kaakye arɔ, na kaakyi irèn azɔk aFeliks, in tonoso yit kafa kakan yit ni ngɔn makiyi.

⁴Awɛt nek in bi da ya izen awo, In tsin ra awon ni ngɔn, nye akabɔk ki nang yit kuto ngɔn gyeet.

⁵“Iyit mi di yit anet yɔng yet anet ifa, a teng na a tuus idoro nhwyɛ baYahuda kaakyɛ azatse. Iwu fɛ́ a yet akɔk-ashon bafi ikuus anet aNazaret

⁶a shim a tse a beseng karɔ iya Adakunom ntong, nek anɔng in ku tekap yit.[31]

⁸Ki ngɔn bang ku risim ice ngɔn, i da sɛ kpaf fok kukun fi in tsin te yit yet atsak.”

⁹BaYahuda me wat ba moon nanu fok, kucɛɛt aTatulus yet atsak.

¹⁰Ni izen fɛ́ agwɔmna nɔk aBulus irèn icɛɛt, aBulus kpa cɛɛt ye: “Imi rēn fok ngɔn mi bɔ ayɛ dot ni tsin ras ishɔt ni mben nang, nek anɔng in bi iyɛ ikan icɛɛt itɛnɛng ice hom.

¹¹Ngɔn da kyem i rip ikyɛng ngɔn, da nnom mi wat kusɔk abe afaa fi imi ne iya Adakunom ntong na aRushelima awo.

¹²Vit akak ayɛt bafi nkun in fɛ́ a di sɛ ni in tsin ra nanan na akak ke ni in tsin tees banet idoro nhwyɛ narɔ iya Adakunom ntong ke narɔ inyiis baYahuda ke ayɛt iwɔp awo.

¹³Vit akak ba fɛ̀ a da kyem a da tonong atsak kukun kang fɛ́ ba tsin te naton in.

¹⁴Ngma na anɔng, imi tsin fɛ́ ey, imi kuus Adakunom ba badakop yit tɛ afi Irèn e yɔng fi iba yes iye ifi mbɔɔs. Imi nɔk atsak ni ikyɛng fi Ntsi run kama me ni idɔng fɛ́ batan Adakunom jɛk,

¹⁵in bi ite iyɛ na Adakunom tɛ banet bang fok ba bi dorok bafaben bafɛ́ atsak nɛ bafɛ́ vit atsak.

¹⁶Nek anɔng, in nye nyɛk kaakyi izen kayɛt iyɛ hom na ka sot cɛ́l ashon Adakunom nɛ ashon banet.

¹⁷“Ama in mi sok ayɛ dot wɛrɛng, in be na aRushelima in bi in nɔɔk banet in kunang fɛ́ ba tusung mok bakan, nin nabak kunang hom na Adakunom.

¹⁸In mi gang nasos ajɛrɛ hom, ba bɛ ba di sɛ atasa karɔ iya Adakunom ntong, vit kudyɛng banet ni fam in, vit idorok nhwyɛ ikak fi in se ne.

¹⁹Awɛt baYahuda bakak fɛ́ ba ne ni mben Asiya, fi ki i se yɛɛt ke ba se azeng, na ba da tak ke ba bi ikikak naton in.

²⁰Ke da anɔng awo, won ba bang fɛ́ ba se azeng na ba fɛrɛng na nanu bá inɛn fɛ́ ba di sɛ ni ide ni izen fi in ki nyeseng nazumung karatek,

²¹ke nyɛn nek ikyɛng izining de fi in kin fɛrɛng fi in kin nyeseng ashon ba ye, ‘Ayet nek kucɛɛt idoro bafaben wu fɛ́ ba tsin di ra mo ishɔt atut.’ ”

²²Ama anɔng, nek kutsik irēn fɛ́ aFeliks bɛ azaton Irèn aYeso, a serek ishɔt e sak ashon, aFeliks fɛ̀ ni ba, “Ma aLisiyas agbat-agbat batsom bɛ ninyɛn, in bi ni in tsɛɛt ishɔt e.”

²³A sak akɔk-ashon batsom e na a tsin di sak aBulus ari inyang, na a won kuwun ku fɛp, na a nɔɔk bafidang irèn ba ku gbinding ni ikyɛng fɛ́ a tsɛt.

²⁴Ama nnom nkak, aFeliks bɛ nɛ abining wu aDursila, anap baYahuda. A sak ba ku yes aBulus, ba di wes ato ni wu na tsin shara ifɛ̀ Anet-Isheshek aYeso.

²⁵Ni izen fɛ́ aBulus kpa cɛɛt naton kusot kutabat, ni iyit kurɔm, ni ishɔt Adakunom fi i bi bɛ̀, nnyim yit aFeliks, a fɛ̀ na aBulus, “Tsing di won kucɛɛt e anɔng ninyen. I da kyem idorok. Izen fi in ti in sɛ kawat, in bi sak ba tɛ ba da yes.”

²⁶A yes nyɛn aBulus da ku nɔk itsɔm, nek anɔng, a woso sas na ba ku yes aBulus atut na katson na ba tɔ amok.

²⁷Ama ayɛ afaa mi bɛ̀ a got, aPɔshius aFestus bɛ̀ a shan aFeliks kubɔk, awɛt nek aFeliks shim a nye baYahuda iyɛ́, a won aBulus ari inyang.