Read icen Ntomong Batom 4 Bible Online

Ntomong Batom 4 - icen bible

Ntomong Batom 4

¹Ni izen fɛ́ aBitrus nɛ aYohana se ni icɛɛt na banet, áware nɛ akɔk-ashon bafi itosok karɔ iya Adakunom ntong nɛ BaSadusi, bɛ́ ba ka ba sɛ.

²Ikyɛng e ka ba daam makiyi, nek ba sɛ batom aYeso na ba tsin tees, nɛ ba shara banet ifɛ̀ naton idorok ifaben aYeso.

³Ba tekap, aBitrus nɛ aYohana, awɛt nek kahwyɛ tsang nye, ba ka ba te ari inyang ma akatson.

⁴Ngma na anɔng, banet dot fɛ́ ba fok ifɛ̀ me di nɔɔk atsak, wat kudot bamatek di barang sak agup atoon.

⁵Akatson, bágwɔm nɛ bashɔn iwɔp, nɛ bágwɔm irēn ntsi, ba te kazumung ni aRushelima.

⁶Agbat-agbat àware Anas kin se azɔng nɛ aKayafas nɛ aYohana nɛ Alekzanda ni nshɛrɛp bafi izít agbat-agbat àware.

⁷Ba sak na ba ka ba bɛ́ na ba aBitrus nɛ aYohana ashon bá, ba kpa ka ba nyes nrisim: “Ngan wu a ki nɔɔk yin kukyem ite anet yong kyang ɛ? Ke ni iyerek angan wu i di nye yin anɔng ɛ?”

⁸Awɛt aBitrus ayɛt ishining ne Kabik aJɛrɛ, fɛ̀ ni ba: “Bágwɔm nɛ bashɔn iwɔp.

⁹Ki iyin tsin ki nyes yit nrisim atut naton ikyɛng itek deng fi in ra yit amerek anet yong ne, ni ki risim yit kukyem fi in ku te yit mo kyang,

¹⁰in shim yit ni i rēn yin ana. Iyin ne banet aIsrela ngma kusum: Ayet ni iyerek aYeso Kristi anet aNazaret, ayɔng fi iyin tekak yin, awɛt Adakunom kudorok ni iku fɛ́ anet yong di sɛ kukyang ashon yin.

¹¹Iwu yet ‘kuta fɛ́ bafi inok kin raba iko, ku mi sot kuta itsok itu kutek.’[9]

¹²“Vit iyerek ikak fɛ́ ba di sɛs isheshek, nek vit iyerek ikak fɛ́ ba mi nɔɔk banet azatse fi i se gbing-gbing in di sɛ yit isheshek.”

¹³Ni izen fɛ́ ba di agap iyɛ ba aBitrus ne aYohana, ba rēn gyat fok ye da ba mang sɛ ifa ni itees awo. Ba tɛ ba yiring fok ba aBitrus e yet bafi ikuus aYeso.

¹⁴Awɛt ayet anet fɛ́ ba ku te kyang e, se ni nyeseng azɔng ni iba, vit ikyɛng fɛ́ ba da kyem ba fɛ̀.

¹⁵Nek anɔng, ba sak batom aYeso me na ba ka ba nɔɔk kawat, ama anɔng, ba kpa tɔ wɔɔn ba.

¹⁶Ba fɛ̀, “Akyɛ fi in da nye yit na banet bang ɛ? Kaangan ne aRushelima rēn fok ikyɛng abes iratek mi te, in da kyem in ton yit ne awo.

¹⁷Nek in di te yin nkum ni kurasak ikyɛng deng ayɛt banet yit, in da kɔrɔk yit banet bang kuto ye, ba bi tɛ ba ya kashon ni kucɛɛt naton iyerek deng awo.”

¹⁸Ba ma tɛ ba ka ba yes sak ayɛt e, ba ka ba nye agbat-ifɛ̀ ye, ba bi tɛ ba cɛɛt ke na ba tees ikikak ni iyerek aYeso awo.

¹⁹Awɛt aBitrus nɛ aYohana fɛ̀ ni iba, “Iyin tsɛɛt yin ishɔt e ikyɛng yin i da di yin, ke i da se yɛɛt nanu ashon Adakunom, ni in ki fok yin iyin aza Adakunom ɛ?

²⁰Nek iyit da kyem ni in won yit dang cɛɛt yit naton ikyɛng fi iyit mi di yit, ni ikyɛng fi in mi fok yit awo.”

²¹Ama fɛ́ ba bang ka ba te nnyim, ba ka ba wosong ba tseng. Ba kyem ba rēn ikyɛng fɛ́ ba da nye ni iba awo, nek banet ngma kusum se ni itere Adakunom nek ikyɛng fi ite.

²²Nek ayɔng fɛ́ ba ku te kyang e, a wat ayɛ nsɔk nnaas ni kutes.

²³Ama fɛ́ ba ka ba wosong, aBitrus nɛ aYohana, ba bun, ba tse ba sɛ banet bá, ba ka ba tak ngma ikyɛng fɛ́ agbat àware nɛ bashɔn iwɔp fɛ̀ ni iba.

²⁴Ni izen fɛ́ ba fok anɔng, ba sok ntɔ ba ngma ayɛt awon sak na Adakunom, ba fɛ̀, “ATisa, ngɔn fi i bi ízɔk naton akaangan, ngɔn fi i nye kazanɛn nɛ kazatse, ni izek, ni nkyɔrɔk fi in se ayɛt ashi ngma kusum.

²⁵Ngɔn kin cɛɛt ayɛt Abik aJɛrɛ nanu asam ngɔn adakop yit agwɔm aDauda, ‘Akyɛ sak fi Ícɛn-iduk, fes anɔng ɛ, nɛ banet e yiring ni dun anɔng ɛ?

²⁶Bágwɔm azatse mi kana nye, nek itsom. Bakɔk-ashon mi moon ace bá, nek ifa na aTisa, na ayɔng fɛ ba mi ku korok name.[10]’

²⁷“Na tsak e agwɔm aHiridus nɛ aPontiyus aBilatus, ba kin nyim gung ni Ícɛn-iduk na bafi aIsrela, ba moon ice bá ni wɔp kang, nɔng ba bin te gup asam ajɛrɛ ngɔn aYeso, ayɔng fi ngɔn mi di korok name.

²⁸Ba nye ikyɛng fi ngɔn ayɛt kukyem ngɔn, ni ishim ngɔn, imang fɛ̀ ey, i bi sot anɔng.

²⁹Ada aTisa, di yɔkɔnɔng kuri nnyim fɛ́ ba ki tes yit ne! Nɔk basam ngɔn, iyɛ ting fi in di ki shara yit ifɛ̀ ngɔn, vit nnyim.

³⁰Nabak kubɔk ngɔn nek ites banet kyang, nyes ntomong abes ni nkyɔrɔk ajingjing ni iyerek asam ajɛrɛ ngɔn aYeso.”

³¹Ama fɛ́ ba ra awon anɔng, karɔ fɛ́ ba di se me, ka zuut. Kabik aJɛrɛ wat ka ka ba shining ngma ba, ba kpa shara ifɛ̀ Adakunom kaakye ni iyɛ ting.

³²Ngma bafi ikuus e, kuyiring bá, ni nse bá, yet nzining. Vit azining bá, fɛ́ a sok ikyɛng fɛ́ a bɛ̀ ti ifuu, ba kas ngma ikyɛng fɛ́ ba bɛ̀.

³³Batom aYeso me ya kashon ni ishara ifɛ̀ naton idorok ifaben aYeso ne kukyem makiyi. Itek Adakunom se naton ba makiyi.

³⁴Vit azining ba fɛ̀ a bit ikikak. Nek izén-izén bayɔng fɛ́ ba bɛ̀ akɔ nɛ nasa, ba rɛs ina, ne ba bɛ́s ni itsɔm e

³⁵ashon batom aYeso. Ba kabasa banet ne, kpaf ni ndaam fɛ́ ba bɛ̀.

³⁶Ni izen e yɔng akak kin di se ayet bafi ikuus e, fi iyerek wu yet aYusufu. A kin yet anet izit aLawi fɛ́ a ne ni izek aSayipurus. Batom aYeso me kin ku yes aBarnabas nek a kin yet ayɔng fɛ́ a di barasa banet agap.

³⁷A kin rɛp ikɔ wu, a sok itsɔm e, a tse ne ashon batom aYeso.