Read icen Ntomong Batom 7 Bible Online

Ntomong Batom 7 - icen bible

Ntomong Batom 7

¹Wat agbat-agbat àware me rip aIstifanus e ye, “Kukun kang fɛ́ ba mi nye naton ngɔn, ku yet atsak ɛ?”

²AIstifanus e ka ba bun ni ifɛ̀ ye, “Ábaruneng nɛ bada, fok yin ikyɛng fi in da fɛ̀. Adakunom Azɔk-Bazɔk, kin tonong ice wu sak na adakop yit aIbrahim ni iwu rēn resek mo ni mben aMesopotamiya, dang na a bun ni kusot na aHaran.

³Adakunom fɛ̀ ni wu, ‘Won mben ngɔn, na banet ngɔn, tseng sak ni mben fi in da ka tonong.’[12]

⁴“Nek anɔng, adakop yit e, a won mben aKaldiya, a tse a sonong na aHaran. Ama iku ada wu, Adakunom ku tom sak ni mben nang fi iyin di se yin yɔkɔnɔng.

⁵Ngma na anɔng, Adakunom tsang ku nɔɔk iya itekari mben e awo, ko kutak kuzining ngma awo. Awɛt Adakunom kin ku nye kushii fok, iwu ni nnon wu fɛ́ na bi ne ama wu, mben e bi sot nfuba. Ngma ni fi i yet, aIbrahim kin se dang nggon ni izen e yɔng.

⁶Adakunom fɛ̀ ni wu ane: ‘Izít ngɔn, bi sot batsen ni mben fi da ku yet kufuba awo, ba bi sot basam, ba bi sɔ izot nfɛ́ ayɛ anakat anaas.

⁷Awɛt in bi tabak banet fɛ́ ba ka ba nesek izot e, ama anɔng, ba bi wuruk ni mben e yɔng, ba bi di ya ntong azeng narɔ kang.’[13]

⁸“Ama anɔng, Adakunom nɔɔk aIbrahim amok iya katse fi i da sot ikyɛng iyiring irosom kushi me. Na anɔng aIbrahim di sot ada aIshaku, a ku ya katse ni kunom kufi nkara ama kutes wu. Ama anɔng, aIshaku bɛ́ a sot ada aYakub, aYakub bɛ́ a sot ada badakop yit kusɔk abe afaa.

⁹“Nek naman fɛ́ badakop yit kin bɛ̀ sak na aYusufu, ba ku rɛp tɛ asam sak na aMasat. Awɛt Adakunom kin se gung ni iwu,

¹⁰a ku sheshek naton ngma ndaam wu. Adakunom kin nɔɔk aYusufu kutsitsɛng kutsik, fi ku sak a di sɛ itek ashon aFirauna agbat agwɔm aMasat. AFirauna sak aYusufu sot agwɔm mben aMasat, a ya igwɔm naton banet ari aFirauna ngma kusum.

¹¹“Ama anɔng, aduk izong ikak kpa ni mben aMasat nɛ aKanan, nzong e bɛ́ ni izot makiyi, badakop yit kyem ba sɛ nayak awo.

¹²Ni izen fɛ́ aYakub fok fok nayak di se na aMasat, a tom badakop yit ni kutseet kufi imɛsɛng.

¹³Ni ku tse bá kufɛ́ afaa, aYusufu tonong ice wu sak barunyining, na anɔng wu aFirauna di rēn izit aYusufu.

¹⁴Ama anɔng, aYusufu sak na ba tse ba bɛ́ na ada wu aYakub ni nshɛrɛp banet ari wu ngma kusum, ba kin se nsɔk kanakataat ina ntoon.

¹⁵Ne anɔng wu aYakub dorok sak ni mben aMasat, azɔng fi iwu nɛ badakop yit di ku.

¹⁶Ba kin kok nkom bá, ba tse na ba nɛsɛk na aShekem, ni irɛk fi aIbrahim kin shan ni itsɔm ni bɔk nnon aHamor na aShekem.

¹⁷“Fi izen bɛ́ bakat fɛ́ Adakunom da shining kushi fɛ́ a kin nye ne aIbrahim, kudot banet yit na aMasat di barasa makiyi.

¹⁸Ba bɛ́ ba nye agbat agwɔm akak fɛ́ da a rēn ikikak naton aYusufu awo, a kpa ya igwɔm na aMasat.

¹⁹A kpa nyes banet yit anyas makiyi, a di nyeseng na badakop yit, a ka ba te mo gbing-gbing na ba bara nabin nnon fɛ́ ba tes nɔng na da bin kus.

²⁰“Kpaf izen e yɔng wu fɛ́ ba kin di tes aMusa, aMusa kin yet abɛrɛ nggon awo. Ba sok nfɛn ntaat na ba tsin ku nɛsɛk ari ada wu.

²¹Ama fɛ́ ba ku tun amatse, angas aFirauna tse a di tetuk ni wu, a rasak narɔ wu ti nggon wu.

²²Ba kin tees aMusa kutsitsɛng bafɛ́ aMasat. A dorok na agap ni irēn icɛɛt makiyi.

²³“Ni izen fɛ́ aMusa shining ayɛ nsɔk nnaas, a nye kuyiring a tse di bafi izit wu nnon aIsrela.

²⁴Fɛ́ a tse a ta azɔng, a sɛ anet aMasat akak na tsin nesek afi aIsrela mgbang, fɛ́ a tse a ku shan mo, a fɛt anet aMasat e.

²⁵AMusa nye gyan, banet wu bafi aIsrela da rēn fok Adakunom tsin ra kutomong a ka ba tun ayit isam. Awɛt banet e kyem ba di anɔng awo.

²⁶Akatson, aMusa bɛ́ a sɛ bafi aIsrela ba tsin kɔn wɔɔn ba. A tsɛt inye kusot ba, a fɛ̀ ni iba, ‘Ábaruneng, iyin yet yin baruneng! Akyɛ sak fi i tsin ra yin imaane wɔɔn yin ɛ?’

²⁷“Awɛt ayɔng fɛ́ a se ni inyɔ afidang e, a wobok aMusa ni ifam, a fɛ̀ ni wu, ‘Angan da te ni isot agwɔm, fi i da ki tsɛɛt yit ishɔt ɛ?

²⁸Ngɔn shim i di fɛt imi, ti fi i di fɛt anet aMasat yɔng nire yɛ?’[14]

²⁹Ni izen fɛ́ aMusa fok anɔng, a teng sak ni mben aMidiyan, a tse a sonong azɔng tɛ atsen. Abining wu ku tes nnon namatek e nafaa na aMidiyan e.

³⁰“Ama ayɛ nsɔk nnaas, atomaza tonong ice wu sak na aMusa ti kurong fi ku tsin ya kuci natse bakat ni Ihwyanang aSinai.

³¹Ni izen fɛ́ aMusa di anɔng, a ku te yɔɔt ni ikyɛng fɛ́ a tsin yɛrɛ. A serek bakat, a da ban di, a fok kutɔ aTisa:

³²‘Imi yet Adakunom badakop ngɔn, Adakunom afɛ́ aIbrahim, ni aIshaku, nɛ aYakub.’[15] Nkum fi kurɔm aMusa ka tiim, a kyem a sɛ iyɛ ting a di ya kashon ni iyɛrɛ me awo.

³³“Adakunom ma fɛ̀ ni wu, ‘Tun akpatak ngɔn; nek karɔ fi i di nyeseng se jɛrɛ.

³⁴Di! In mi di mgbang banet hom na aMasat. In mi fok irus bá, nek anɔng in tik, in bi in ka ba bisik. Bɛ́ in da tom sak na aMasat e.’

³⁵“Iwu aMusa me yong fɛ́ ba mang ku raba ni ifɛ̀ anu ye, ‘Angan da te agwɔm, fi i da ki tsɛɛt yit ishɔt ɛ?’ Adakunom ice wu fɛ́ a ku tom na a sot agwɔm bà nɛ anet itun bà, itom ne nanu atomaza fɛ́ a tonong ice wu tɛ kayit fɛ́ ka tsin ya kurong.

³⁶AMusa wu a kin ka ba tun na aMasat ama fɛ́ a mi nye nkyɔrɔk ajingjing ni ntomong abes na aMasat, ni ikyɛng fɛ́ a nye ni Kugbat Kukyɛk Kuseng, a tseng ni iba nate ayit ayɛ nsɔk nnaas.

³⁷“Iwu aMusa me yong fɛ́ a kin fɛ̀ ni nnon aIsrela yɛ, ‘Adakunom bi ki tom yin atan akak ti imi fɛ́ a bi ne nate yin.’[16]

³⁸Iwu kin tusung ngma banet aIsrela ayɛt ayit. A kin se azɔng gung na badakop yit ni izen fɛ́ atomaza kin cɛɛt ni wu ni Ihwyanang aSinai; iwu fɛ́ a kin shan ifɛ̀ fi inesek kutset fɛ́ a ki nabak yit ne.

³⁹“Awɛt badakop yit raba dan wes ato ni wu, ba raba dan ku fok ifɛ̀. Ba shim ba tɛ ba bun na aMasat.

⁴⁰Ba fɛ̀ na aHaruna ye, ‘Ki nye yit nabannom fɛ́ na da ki kɔk yit kashon. AMusa yɔng fɛ́ a ka ka tse a ki tun yit na aMasat, iyit rēn yit ikyɛng fi ite ni wu awo!’[17]

⁴¹Ni izen e yɔng wu fɛ́ ba nye nabannom ti ki nyak. Ba bɛ́s ni nabak-akuce bá sak ni ka, ba woso ira amok sak ni ikyɛng fi iba nye ni mbɔk bá.

⁴²Nek anɔng, Adakunom ka ba tirik kama, a ka ba wosong na ba ya ntong sak na ádat. Anɔng e se kpaf ni ikyɛng fɛ́ batan Adakunom ki mang jɛk ni fumung yɛ, ‘Iyin nnon aIsrela, ni izen fi i kin se yin natse ayɛ nsɔk nnaas, iyin kin di bes yin ni nabak-akuce, ni inesek yin ɛ?

⁴³Iyin kin kok yin kubut ntsi aMolek, nɛ àdat kaban-nnom yin na fɛ́ aRifan, nabannom fi iyin kin nye yin, nek i ka na ya yin ntong. Nek anɔng, imi bi ki tsa yin ni isam sak ashon aBabila.’

⁴⁴“Ni izen fɛ́ badakop yit kin se natse, ba kin bɛ̀ Kubut fi ku tonong kusɛ Adakunom nate ba. Ba kin nye iko kpaf tɛ Adakunom di tak aMusa, a nye iko kpaf ni ikyɛng fɛ́ ba ku tonong.

⁴⁵Ama fɛ́ badakop yit shan kubut e, ba bereng iko gung ni iba sak ni mben nang fɛ́ Adakunom ro Ícɛn-iduk na yisi bá, a ka ba nɔk mo iko ni izen fɛ́ aJoshuwa tsin ka ba kɔk. Kubut e ya kashon ni isot azɔng sak izen aDauda.

⁴⁶ADauda sɛ awɛng ashon Adakunom, a ra awon nɔng a da nok karɔ isot Adakunom, adakop yit aYakub ntong.

⁴⁷Awɛt arim wu aSolomon wu a kin ne a nok Adakunom kari me.

⁴⁸“Ngma na anɔng, Azɔk-Bazɔk da a sosok na nasa fɛ́ banet nos awo. Kpaf tɛ atan di fɛ̀,

⁴⁹‘Adakunom fɛ̀, “Kazanɛn kaa ka yet kuta igwɔm hom, kazatse yet karɔ isaas atak hom. Akyɛ kuri kari fi iyin di ki nok yin ne yɛ? Akɛ wu a yet karɔ ifɔn min ɛ?

⁵⁰Imi wu in nye ngma nkyɔrɔk yɔng ni mbɔk yin awɛ?” ’

⁵¹“Iyin ágbarak ánet, bafɛ́ kɔnggɔt ayɛ, ánet fɛ́ da a foos ifɛ̀ awo! I se yin kpaf tɛ badakop yin: I rayin dan nesek yin Kabik aJɛrɛ kawat kaaki izen!

⁵²Akyɛ atan fɛ́ badakop yin kin won dan ku nesek iyɔm ɛ? Ba kin fɛɛs gung na bayɔng fɛ́ ba tak ibes kubɛ́ Anet Atsak e. Awɛt iyin ba i yet yin bafi irɛp e ni ifɛt e.

⁵³Iyin fɛ́ ba kin ki nɔk yin ntsi fi in ne ni bɔk batomaza, awɛt i di ra yin kutomong ni ina awo.”

⁵⁴Fɛ́ bashɔn azumung e fok anɔng, a ka ba te fuu ni ibeseng iyɛ makiyi, ba ros anyi nek iyɛ beseng sak ni wu.

⁵⁵Awɛt aIstifanus ayɛt ishining Kabik aJɛrɛ, a cet ayisi sak azanɛn, a di ízɔk Adakunom, na aYeso ni inyeseng ni bɔk iyak Adakunom.

⁵⁶A ma fɛ̀, “Di yin, in tsin yɛrɛ kazanɛn piyot nɛ Arim Anet ni inyeseng ni bɔk iyak Adakunom.”

⁵⁷Ni ifok anɔng, ba famasa ato, ba kpa tang nkun na agap, ba di ngarak naton wu,

⁵⁸ba kpa ku sam sak ama iwɔp, ba kpa ku bara na ata. Kpaf izen e yɔng, bafi inɔɔk anu me, tusung ares bà ashon acam akak fɛ́ ba ku yes ye aShawulu.

⁵⁹Ni izen fɛ́ ba se ni i ku bara na ata, aIstifanus e ra awon ye, “ATisa AYeso! Shan kutset hom.”

⁶⁰A te akuut aben, a fɛrɛng ne agap ye, “ATisa Adakunom, i bi sak inɛn deng naton ice bá awo.” Ama fɛ́ a fɛrɛng anɔng, a men nda.