Read icen Ntomong Batom 9 Bible Online

Ntomong Batom 9 - icen bible

Ntomong Batom 9

¹Ni izen e yɔng, na aShawulu tsin rēn ya kashon ni ishiri bafi ikuus aYeso kaakɛ fok, iwu da ka ba fɛɛs. A tsɛ a sɛ agbat-agbat àware

²a tsɛt kufumung ni wu fɛ́ a di ki tseng sak na karɔ inyis baYahuda fɛ́ ka se na aDamaskos, nɔng ke a tsɛ a sɛ akak azɔng fɛ́ a se ni irèn ikuus e[20], kɛ na a yet amatek e kɛ abining e ayi, a da ka ba kok ni irosom sak ni aRushelima.

³Ni wu mo ni irèn, a mi bɛ́ bakat na aDamaskos, ni izen izining mgbey nkak ne azanɛn in ku te nate.

⁴A kpa aben, a fok kutɔ fɛ̀ ni wu, “AShawulu, aShawulu, akyɛ sak fi ngɔn di nesek izot ɛ?”

⁵AShawulu rip ye, “ATisa, ngɔn yet angan ɛ?” A fɛ̀ ni wu, “Imi wu in yet aYeso fi ngɔn tsin zoot.

⁶“Dorok yɔkɔnɔng, tseng sak ayit iwɔp, ba da ka tak ikyɛng fi i se gbing-gbing ni i nye.”

⁷Banet fɛ́ ba se ni itseet gung ne aShawulu di wey yɔɔt; ba fok kutɔ me akabɛs, awɛt ba di anet awo.

⁸AShawulu dorok aben, a tarak ayisi vit ikyɛng fɛ́ a kyem a di. Nek anɔng, ba ku kɔk kubɔk sak ayit iwɔp aDamaskos.

⁹A sok nkɔs ntaat, ayisi vit iyɛrɛ, vit iya, vit isɔ ikikak.

¹⁰Anet ikuus akak kin se azɔng na aDamaskos fɛ́ ba ku yes Ananiyas. Adakunom cɛɛt ni iwu na nabos abik, a fɛ̀ ni wu, “Ananiyas!” Ananiyas shim ye, “Imi yo, aTisa.”

¹¹ATisa fɛ̀ ni wu, “Dorok sak ari aJudas ni irèn fɛ́ ba yes iye aTsik. Rip anet fɛ́ ba ku yes ye aShawulu afi iwɔp aTarsus, nek a se ni ira awon.

¹²A mi di ayɛt nabos abik fok, anet fɛ́ ba ku yes Ananiyas bɛ́, a di sak mbɔk natoon wu, ayisi wu tarak.”

¹³Ananiyas fɛ̀, “ATisa, imi mi fok ncɛɛt dot naton anet yɔng, ni kuri anyas fɛ́ a mi nye banet ikuus fɛ́ ba se ni aRushelima ne.

¹⁴Ku bɛ́ wu kang, agbat-agbat áware mi ku nɔk ice na a yisik ngma bayɔng fɛ́ ba yes iyerek dɔng.”

¹⁵Awɛt aTisa fɛ̀ na Ananiyas, “Ngɔn tse kyɛk, iwu mi sot anet fi imi mi kasa tɛ ares itomong hom, a da tse sak ni Ícɛn-iduk, nɛ bágwɔm bá, a da tɛ a tse na bafi aIsrela.

¹⁶Imi da ku tonong azikit mgbang fɛ́ a da sɔ nek iyerek hom.”

¹⁷Ananiyas ma tse ari me, a nɔ ayɛt e. Ama fɛ́ a di sak mbɔk ni wu, a fɛ̀ ni wu, “Aruneng aShawulu, aTisa aYeso fɛ́ a nyim ni ngɔn ni irèn ibɛ́ azeng, iwu fɛ́ a di tom ni in bi in da tarak ayisi, nɔng ba bin da shining na Kabik aJɛrɛ.”

¹⁸Ni izen izining, ikyɛng ikak tɛ kukpɛrɛ ne ni yisi me sak aben, a wat a kpa yɛrɛ. A dorok, ba tse ba ku ra abatisma,

¹⁹ama fɛ́ a yas, agap wu bun ni irɔm wu. AShawulu nye nnom gaan ne bafi ikuus azɔng na aDamaskos.

²⁰Vit ibeseng izen, a kpa shara ifɛ̀ narɔ inyis baYahuda fok aYeso yet Arim Adakunom.

²¹Ngma bayɔng fɛ́ ba ku fok, ayɔɔt ka ba yisik, na ba nye, “Anet e yong fɛ́ a fɛs banet na aRushelima nek iyerek e deng awɛ? Akyɛ me fok a bɛ́ azeng nek iyisik bafi ikuus fɛ́ a da tse ni iba ashon agbat-agbat áware anɛ?”

²²Ngma ne anɔng, aShawulu ban rasak ne agap, a ya kashon ni ites baYahuda fɛ́ ba se na aDamaskos kpɔrɔk, a ka ba tonoso wɛshɛk fok aYeso yet Anet-Isheshek.

²³Ama nkɔs gaan bin igot, baYahuda tɔ wɔɔn ba fok ba da sok kutset wu,

²⁴aShawulu fok ikyɛng fɛ́ ba shim ba nye. Kunom nɛ katuk ba woso tang ayisi atisi inɔ iwɔp nɔng ba da ku fɛt.

²⁵Awɛt nnon imɛɛs wu, ku sok natuk, ba ku tik ayɛt na akɔmɔng na ahyot akak fɛ́ a se ni bat.

²⁶Ni izen fɛ́ a tsɛ a ta na aRushelima, a shim a moon ice ne bafi ikuus, awɛt ngma ba ba ku teng wu, vit ayɔng fɛ́ a nɔɔk atsak fok a yet atitup afi ikuus.

²⁷Awɛt aBarnabas wu fɛ́ a ku sok, a tse ni iwu ashon batom aYeso. A ka ba tak irèn fɛ́ aShawulu ni irèn wu sak na aDamaskos, di nyim na aTisa, fɛ́ a di fok kutɔ aTisa. A tɛ a ka ba tak irèn fɛ́ aShawulu shara banet ifɛ̀ Adakunom ayɛt iyerek aYeso na aDamaskos, vit inyim.

²⁸Nek anɔng, aShawulu sot gung ni iba, a tsees washak akɔn wu, na nyes kucɛɛt vit inyim ni iyerek aYeso ayɛt aRushelima.

²⁹A cɛɛt, na ba kɔk nanan ne baYahuda fɛ́ ba cɛɛt ilem BaGirik, ba tsɛt irèn ifɛt wu.

³⁰Ni izen fɛ́ baruneng bafi ikuus fok anɔng, ba ku sok, ba tseng ni iwu sak na aKaisariya, ba ku te ni irèn sak na aTarsus.

³¹Ne anɔng wu fɛ́ bafi ikuus fɛ́ ba se na aJudiya nɛ aGalili nɛ aSamariya, di sɛ kusonong kukyang. Bafi ikuus di sɛ agap, Kabik aJɛrɛ ka ba sɛ mo, kudot bá di barasa kutseet ayɛt nnyim aTisa.

³²Fɛ́ aBitrus teng a tsees na narɔ zizɛɛt-zizɛɛt, a tse narɔ bafi ikuus fɛ́ ba se ni iwɔp aLida.

³³A tsɛ a di te tuk na anet akak azɔng fɛ́ ba ku yes Aniyas, ayɔng fɛ́ a se na meneng ayɛ nkara nek aduru irɔm wu mi ku.

³⁴ABitrus fɛ̀ ni wu, “Aniyas, aYeso Kristi mi da te kyang. Dorok, nye kameneng ngɔn.” Ni izen izining, Aniyas wat a dorok tsik.

³⁵Ngma banet fɛ́ ba se na aLida nɛ bafi iwɔp aSharon fɛ́ ba ku di a mi te kyang, ba tirik sak na aTisa.

³⁶Abin ikuus akak kin se ni wɔp aJopa, fɛ́ ba ku yes aTabita, fi i ti i yet aDokas, kaakyi izen a ras banet ikyɛng itek, a di sɛs bakan. A ras bakan nkyɔrɔk ntek ngma ayɛ ites wu.

³⁷Ni izen e yɔng, aTabita bɛ́ a kpa ni irɔk, a bɛ́ a ku, ba se ni so kukom e, ba tsɛ ba sak iko ni kutu ari aton.

³⁸Nek aLida sak na aJopa mak se yik-yik awo, fɛ́ bafi ikuus fok ye aBitrus se na aLida, ba tom banet bafaa sak azɔng ye, “Kabɔk, bɛ́ ziri!”

³⁹Wat aBitrus dorok, a ka ba kuus mo. Ni izen fɛ́ a tse a ta azɔng, ba ngarak ni iwu nitu ari aton e. Ngma bakumung fɛ́ ba se azɔng dorok, ba nyeseng bakat ni iwu, na ba san nanak, na ba ku tonoso nkpin fɛ́ aDokas e kin ka ba bat e, ni wu rēn se ni iba.

⁴⁰Wat aBitrus ka ba tun ngma ayɛt itu me, a te nyɔk na akuut wu, a ra awon. A tirik sak ni kukom abining e, a fɛ̀ ni wu, “ATabita, dorok tsik.” Abining e tarak ayisi, a yɛrɛk aBitrus, a dorok a sonong tsik.

⁴¹ABitrus ku yit kubɔk, a ku sɛ mo idorok. A ma yes bafi ikuus, nɛ bakumung e, a ka ba nabak iwu ni kutset.

⁴²Kucɛɛt ikyɛng fi ite me, tseng kaakye na aJopa, banet dot ban di nɔɔk atsak ne aTisa aYeso.

⁴³ABitrus ban nye nkɔs dot azɔng na aJopa gung na anet kutomong akpa akak fɛ́ ba ku yes aSiman.