Read icen BaRoma 1 Bible Online

BaRoma 1 - icen bible

BaRoma 1

¹Kufumung kang ne ni bɔk aBulus, asam aYeso Kristi, fɛ́ ba ku yes na a sot atom aYeso, ba ku sak kyɛw nek ishara ifɛ̀ itek Adakunom.

²Ifɛ̀ itek deng fɛ́ Adakunom ki mang cɛɛt neme nanu batan wu ni Fumung aJɛrɛ.

³Ifɛ̀ itek e bi se azaton Arim wu, fi i ne ni irɔm, a kin ne ni izɔrɔk agwɔm aDauda,

⁴awɛt nek kusot Kabik ajɛrɛ tɛ Adakunom iwu yet Arim Adakunom. Adakunom kin tonong anɔng e, ni kukyem wu ni izen idoro ifaben aYeso Kristi aTisa yit.

⁵Ni bɔk aYeso wu fin kin di sɛ yit itek ni iyes in di sot yit batom aYeso, iyerek wu di sɛ iratek, in di sɛ in di sak Ícɛn-iduk ba di nesek atsak, nɛ ba di fok ifɛ̀ Adakunom,

⁶ngma ni iyin fɛ́ ba mi ki yes yin ni i sot yin bafɛ́ aYeso Kristi.

⁷Sak na ngma bayɔng fɛ́ ba se na aRoma, bayɔng fɛ́ Adakunom ka ba shim, fɛ́ ba ka ba yes batek. Won itek ni kusonong kukyang fi ku nes na Ada yit Adakunom nɛ aTisa yit aYeso Kristi ni ku bɛ́ ni yin.

⁸Ni mɛsɛng e, in tsin nesek ifeng sak na Adakunom hom ni iyerek aYeso Kristi nek iyin ngma, nek kucɛɛt inɔɔk atsak yin mi kat kaakɛ na azatse.

⁹Nek Adakunom fi in tsin ku ra kutomong ishara ifɛ̀ itekari wu, ni iyɛ hom ngma kusum, iwu fɛ́ a yet anet inɔɔk kanu ifɛ̀ naton hom fok, imi yiring ni iyin kaakyi izen,

¹⁰in ras awon, ni in tɔ ye, ki i yet ishim Adakunom, won na a di tarak kawat, ni in bɛ́ azɔng ni yin yɔkɔnɔng.

¹¹Nek imi bi iyɛ ingash ku di yin, nɔng in da ki te yin awɛng nnang fɛ́ kabik nesek

¹²na anɔng, ngma yit in di ki sɛ yit agap, ayɛt inɔɔk atsak yit.

¹³Ábaruneng, imi shim ni i rēn yin fok, in mi tsɛt kubɛ́ azɔng ni yin (awɛt in mi ni in sɛ kawat awo). In shim kubɛ́ me, nek in di bɛ́ na bakak ayɛt yin ni ikuus kpaf ti nshɛrɛp Ícɛn-iduk.

¹⁴Ba mi di nɔk kutomong sak nɛ bafi ilem aGirik nɛ bayɔng fɛ́ ba yet ilem aGirik awo, sak na batsitsɛng nɛ áshɔp.

¹⁵Nek anɔng wu, in di bi iyɛ ingash ishara ifɛ̀ itek ni yin fi i se yin na aRoma bà.

¹⁶Nek imi fok nsum ishara ifɛ̀ itek awo, nek ide yet kukyem Adakunom fi ku nesek isheshek sak na kaangan fɛ́ a nɔɔk atsak, ba tun tumung ne baYahuda ni Ícɛn-iduk di kuus.

¹⁷Nek ayɛt de fɛ́ ba di tonoso kusot kutabat fi ku nes na Adakunom, nek ba sɛs kusot kutabat e ni irèn inɔɔk atsak, nkum itumung e sak ni igang e, kyɔn ti i se ni ijɛk, “Anet kusot kutabat, da sɛ kutset nek inɔɔk atsak wu.”

¹⁸Nek ishɔt Adakunom mi tik azatse naton ngma bayɔng fɛ́ ba raba inye ikyɛng fɛ́ Adakunom shim nɛ bayɔng fɛ́ ba raba ira atsak na ba nyɔ atsak ni nggɔn avit atsak bá.

¹⁹Nek ikyɛng fi i se yɛɛt na ba rēn naton Adakunom, ba mi rēn ide, nek Adakunom mang ka ba tonong ide.

²⁰Nek kukyem Adakunom se vit nkum ni kusot Idakunom wu, nyɔng fɛ́ ayisi kyem a di awo. Awɛt neme ni itumung inye kazatse, ba mi tonong ina wɛshɛk, ba kyem ba rēn ina nek nkyɔrɔk fɛ́ ba kin nye ni itumung kazatse me. Nek anɔng, vit ayɔng fɛ́ a da kyem a ra nanan.

²¹Ngma ni irēn Adakunom fɛ́ ba rēn, ba raba dang ku nesek iratek tɛ Adakunom kɛ na ba ku nesek ifeng ayi, aza anɔng, kuyiring ba se kpɛɛ, agadiring áyɛ bá te ngmalak.

²²Ba nye fok ba bɛ́ kutsitsɛng, awɛt ba yet áshɔp,

²³na ba shesheng izɔk fi i yet ifɛ́ Adakunom fɛ́ ashɔɔm sak ni nkyɔrɔk fi da in shɔɔm awo tɛ nanon ni nkyɔrɔk fi in tsees na atak ni nyɔng fi in kɔk nafa aben.

²⁴Nek anɔng, Adakunom ka ba nabak sak ni kuduk kuyiring bá, sak ni iras nkyɔrɔk fi in se gbɛk-gbɛk, sak ni iras nkyɔrɔk nsum fi in beseng nrɔm bá,

²⁵nek ba mi tirik atsak Adakunom a sot mbɔɔs, ba ya ntong nɛ ba ra isam sak ni nkyɔrɔk fɛ́ ba nye aza Anet Inye me, iwu fɛ́ a kyem na ba ku tere ayɛ vit igang! Anɔng.

²⁶Nek anɔng, Adakunom ka ba nabak ayɛt ifoos ikɔk nkyɔrɔk fi in tes ni nsum. Nek banyining bá monoso nrɔm ni kuri irèn ikak zɛɛt ni iyɔng fɛ́ Adakunom nye.

²⁷Kpaf anɔng bà, batek e raba inyis ne banyining, na ba tsɛsɛk bafidang ba bamatek ki ikɔk e ka ba daam. Bamatek nɛ bamatek ras nkyɔrɔk nsum, na anɔng fɛ́ ba di kok ice bá ishɔt fi i se kpaf ni kutomong anyas bá.

²⁸Ayet nek iba raba irēn Adakunom na yɛ bá, Adakunom ka ba nabak ayɛt kuduk kuyiring bá tɛ áshɔp na ba ras ntomong fi in se gyat ira awo.

²⁹Nkum nggɔn bá ka sot nfɛ́ vit atsak kusum ni imaan e nɛ anyas nɛ nhwyɛ nɛ aduk nggɔn. Ba shining ni ifup ni ikok kutset ni kurēn ni mbɔɔs nɛ angmagalak áyɛ. Ba yet banet imonoso ncɛɛt,

³⁰bafi imɔɔt bakak, bafi iraye Adakunom, bafi itok, bafi ikok ice, bafi inesek ice bá iratek, bafi imonoso anyas, bafi ibyɛs batek.

³¹Ba yet áshɔp, bafɛ́ avit atsak, vit iba ni ishim, vit iba ne angmishish.

³²Ngma ni irēn ishɔt Adakunom fɛ́ ba rēn fok anet fɛ́ a ras nggɔn yɔng, a kyem na ba sok kutset wu, ngma na anɔng, iba nyeseng ni iras e kyɛk awo, ba nesek irun ama na bayɔng fɛ́ ba ras ina.