Read icen BaRoma 10 Bible Online

BaRoma 10 - icen bible

BaRoma 10

¹Ábaruneng, kushim iyɛ hom, nɛ awon hom sak na Adakunom nek bafi aIsrela yet fok, na ba sɛ isheshek.

²Nek imi da kyem in nɔk kanu ifɛ̀ akuce bá fok, ba bi iyɛ ingash na Adakunom akabes, awɛt iyɛ ingash e ni i se naton irēn awo.

³Nek ba kyem ba rēn kusot kutabat fi ku nes na Adakunom awo, ba tsɛsɛk itup kusot kutabat kufuba. Nek anɔng, ba raba inabak ice bá sak ni kusot kutabat fi ku nes na Adakunom.

⁴Nek Anet-Isheshek wu fɛ́ a yet igang ntsi, nɔng kaangan fɛ́ a nɔɔk atsak, bin sɛ kusot kutabat ashon Adakunom.

⁵AMusa jɛk irèn kusot kutabat fɛ́ ba sɛs ni irèn ikuus ntsi: “Anet fɛ́ a nye ikyɛng fi ntsi me fɛ̀, a da sot nek ina.”

⁶Awɛt kusot kutabat fɛ́ ba sɛs ni irèn inɔɔk atsak fɛ̀, “I bi fɛ̀ ayɛt iyɛ ngɔn ye, ‘Angan bi ngarak sak azanɛn ɛ?’ Nek, na a tik na Anet-Isheshek na azatse yɛ.

⁷“Kɛ ‘Angan da tik tsik aben ɛ?’ ” Nek, na a tun Anet-Isheshek ni irɛk ɛ.

⁸Awɛt akyɛ fi ijɛk e fɛ̀ yɛ? “Ifɛ̀ me se bakat ni iyin, i se na anu yin, i se ayɛt ayɛ yin,” Idɔng tonong, ifɛ̀ inɔɔk atsak fi in tsin shara yit;

⁹Fok, ki i tak na kanu ngɔn fok, “AYeso yet aTisa,” i nɔɔk atsak ayɛt iyɛ ngɔn fok, Adakunom ku donong ni irɛk, i da sɛ isheshek.

¹⁰Nek iyet ni iyɛ de fɛ́ anet di shan atsak, na di sɛ kusot kutabat. I ti yet ne kanu wu fɛ́ anet di tak fok, aYeso yet aTisa, na di sɛ isheshek.

¹¹Ti ifɛ̀ Adakunom di fɛ̀, “Ngma ayɔng fɛ́ a nɔɔk atsak ni iwu, a da sɔ nsum awo jɛm-jɛm.”

¹²Nek vit ikaba, ke ni i yet afɛ́ aYahuda, ke afi Ícɛn-iduk ayi, aTisa azining e yet afɛ́ akaangan, a di tes itek wu na akaangan fɛ́ a tsɛt a ku sɛ mo.

¹³Nek, “Ngma ayɔng fɛ́ a yes iyerek aTisa, a da sɛ isheshek.”

¹⁴Na anɛ fɛ́ ba da yes ayɔng fɛ́ da ba di nɔɔk atsak ni wu awɛ? Na anɛ fɛ́ ba di ki nɔɔk atsak na ayɔng fɛ́ ba man fok ikyi ikak naton wu awɛ? Na anɛ fɛ́ ba da fok dang akak na ka ba shara ifɛ̀ me yɛ?

¹⁵Na anɛ fɛ́ ba da shara ifɛ̀ me ke da ba tom akak ni ba awɛ? Ti i di se ni ijɛk, “Di yin fɛ́ atak bafi ishara ifɛ̀ itek di sas makiyi!”

¹⁶Awɛt i ni se fok da ngma bafi aIsrela ba, ba nɔɔk atsak ni ifɛ̀ itek e me awo. Nek aIshaya jɛk fok, “ATisa, angan nɔɔk atsak ni itom yit ɛ?”

¹⁷Nek anɔng, inɔɔk atsak nes nek ifoos itom e, ba foos itom e ni irèn ishara ifɛ̀ Anet-Isheshek.

¹⁸Won in rip ane: Ba ki mang fok ifɛ̀ me awɛ? Ey, ba mang fok; “Ntɔ bá mi wuru kaakye azatse, ntɔ bá in mi tsin in ta ni igang azatse.”

¹⁹Won in tin rip ane: Bafi aIsrela rēn ifɛ̀ me awɛ? AMusa kin tun fɛ̀ ye, “Imi da sak i da fok yin ifup bayɔng fɛ́ da ba kyem kuwɔp awo; in da sak ayɛ yin da beseng azaton banet fɛ́ ba se vit irēn.”

²⁰Wat aIshaya kin fɛrɛng ni iyɛ ting ye, “Banet fɛ́ da ba di tsɛt awo, ayet iba ba ba di sɛ; imi tonong ice hom sak na bayɔng fɛ́ da ba di tsɛt awo.”

²¹Awɛt a fɛ̀ ane sak ni aIsrela, “Nkum kadiding sak kahwyɛ, in nabak kubɔk hom sak na bayɔng fɛ́ ba raba ifok ifɛ̀, na ágadiring ánet.”