Read icen BaRoma 12 Bible Online

BaRoma 12 - icen bible

BaRoma 12

¹Nek anɔng ábaruneng, in tsin ra awon ni iyin nek angmishish fɛ́ Adakunom mi nye, nasap nrɔm yin tɛ kunang kutset, kuyɔng fi ku se jɛrɛ, ikyɛng fɛ́ Adakunom shim, nek anɔng e yet irèn iya ntong abik yin in fɛ́ atsak.

²I bi ti ikuus yin nggɔn azatse kang awo, won yin Adakunom na a shesheng kuyiring yin ni nggɔn yin. Na anɔng wu, i da kyem imara yin, ni rēn yin ikyɛng fɛ́ Adakunom shim, idɔng fi i se gyat, ikyɛng ishim, i ti se yɛɛt.

³Nek itek fɛ́ Adakunom mi di nɔɔk, in shim in ki tak yin ngma yin fok, da akak bi mak nye kukaa fi ku naat agap wu awo, tit na a nɔ ni nhwyɛ wu ni irèn fɛ́ a di yɛrɛ ice wu, na a sas ice wu kpaf ti inɔɔk atsak fɛ́ Adakunom ku nɔɔk.

⁴Kyɔn tɛ fɛ́ kaangan yit di bɛ̀ nkap irɔm zizɛɛt, wat nkap e bi ntomong na zizɛɛt-zizɛɛt,

⁵i se kpaf anɔng ayɛt Anet-Isheshek, iyit fi in se yit dot, in mi sot yit kurɔm kuzining, kaakye azining yit yet kukap afidang.

⁶Ngma yit in bɛ̀ yit nnang zizɛɛt-zizɛɛt kpaf ni itek fɛ́ ba mi ki nɔɔk yit. Ki kunang anet yet itaas ibes, won na a ra kutomong ni ide kpaf ni inɔɔk atsak wu.

⁷Ki kunang ngɔn yet kufi iras kutomong igbingding banet, ra iko. Ki kunang ngɔn yet ifi itees banet, ra itees e.

⁸Ki ku yet kufi ites banet gbagba, na ya kashon e. Ki ku yet kufi inesek kunang, won na nesek ni kubɔk washak. Ki ku yet kufi akɔk-ashon, won na a kɔk banet e yɛlɛl. Ki ku yet kufi itonoso angmishish, won na a nye anɔng ni iyɛ ikan.

⁹Won ishim yin ni i yet ifɛ́ atsak. Rayin ikyɛng fi i yet imaan e; di fit yin ni idɔng fi i yet itek.

¹⁰Di te yin ice ni ishim barunyining, nesek yin bafidang iratek aza ice yin.

¹¹Te yin nyɛk ni kutomong yin, i bi sot yin bafɛ́ arut awo, ra yin kutomong Adakunom ayɛt abik.

¹²Nye yin ifeng nek ite iyɛ yin, nye yin akabɔk ayɛt mgbang, ras yin awon kaaki izen.

¹³Kabasa yin ikyɛng fi i bɛ̀ yin ne banet Adakunom fɛ́ ba se dang ikyɛng, shashang yin batsen na nasa yin.

¹⁴Di tes yin itek sak na bayɔng fɛ́ ba ki nesek yin mgbang, ka ba tes yin mo itek, da kawɛy awo.

¹⁵Nyes yin ifeng gung na bayɔng fɛ́ ba se ni ifeng, nyes yin kafa kawe gung na bayɔng fɛ́ ba se ayɛt kafa kawe.

¹⁶Nyes yin kusot kukyang na bafidang. I bi kok yin ice yin garang awo, mon yin ice yin na bayɔng fɛ́ ba se aben ni iyin, i bi sok yin ice yin ti i got yin bakak itsɛ́ng awo.

¹⁷I bi tarang yin bayɔng fɛ́ ba ki nye yin anyas, na anyas awo. Nye yin yɛɛt ni ikyɛng fi i da nye yin, fi i da se gyat ashon banet ngma kusum.

¹⁸Ki i da nye, ki nek ikyɛng fi ingɔn da nye wu, nye kusot kukyang na akaangan.

¹⁹Ábaruneng, i bi tirik yin anyas na anyas awo, tit ni won yin Adakunom bi ki tarang yin ne ni izen naman wu, nek i se ni ijɛk ye, “Itarang kutomong anyas yet inaan, imi bi ka ba tarang,” aTisa wu a fɛrɛng anɔng.

²⁰Ifɛ̀ Adakunom ti i fɛ̀ ye, “Ke afidang ifa ngɔn foos nzong, ya ni wu; ke a foos iyɛ ngash, ku nɔɔk ashi isɔ. Na anɔng wu, i da sot ti i tsin ku korok aca-rong ni ice wu.”

²¹I bi won yin anyas na a ya awɛng naton yin awo, tit itek fi iras yin ni i ya awɛng naton anyas.