Read icen BaRoma 13 Bible Online

BaRoma 13 - icen bible

BaRoma 13

¹Won kaangan na a sot afi ifoos ifɛ̀ bakɔk-ashon, nek vit kukyem igwɔm ke da Adakunom tarak irèn e awo. Nek ngma bayɔng fɛ́ ba tsin ya igwɔm yɔkɔnɔng, Adakunom wu a ka ba nɔɔk.

²Nek anɔng, ngma ayɔng fɛ́ a se ni ifa na bayɔng fɛ́ ba se na ata isosok igwɔm, i sot a se ni ifa ni ikyɛng fɛ́ Adakunom nye, bayɔng fɛ́ ba nye anɔng e, ba tsin kɔk ice bá ishɔt.

³Nek bafi igwɔm yet ikyɛng nnyim sak na bafi nggɔn ntek awo tit sak na bayɔng fɛ́ ba ras imaan ikyɛng. Ngɔn shim i sot vit nnyim bafi igwɔm ɛ? Nye ikyɛng fi i se yɛɛt, i da sɛ itere wu.

⁴Nek iwu yet asam Adakunom fɛ́ a da ka ba nye itek. Awɛt ki ngɔn nye ikyɛng imaan e, ku teng wu, nek awal fɛ́ a se ni bɔk wu a yet afi kuro awo. Nek iwu yet asam Adakunom fɛ́ a tisik na naman wu, ni ishɔt wu naton bayɔng fɛ́ ba ras imaan e.

⁵Nek anɔng, i se gbing-gbing ni inabak yin ice yin sak na bayɔng fɛ́ ba se na ata igwɔm, da nek nnyim itabak awo, tit nek ayɛ yin ki tonong yin anɔng.

⁶Anɔng wu sak fi i di tarasa yin itsɔm mben, nek bafi igwɔm e yet basam Adakunom, fɛ́ ba nesek izen bá ngma kusum nek kutomong igwɔm.

⁷Tarang yin kaangan ikyɛng fɛ́ a ki kuus yin, ke ba ki kuus yin itsɔm mben, ni tarang yin ide, kɛ na a yet itsɔm fɛ́ ba tarasa naton ares ayi, ka ba nɔɔk yin ide, ke a yet bayɔng fɛ́ ba kyem na ba fok nnyim bá, ni fok yin nnyim bá, ki i yet inesek iratek, ni ka ba nesek yin iratek e.

⁸Ba bi ki kuus yin kuta ikikak awo, tit kufi iya kashon itonoso ishim sak na bafidang, nek ngma ayɔng fɛ́ a tonong ishim sak na afidang, a mi shining ntsi.

⁹Ntsi me fɛ̀ ye, “I bi ra kujang awo, i bi sok kutset akak awo, i bi yi ikyɛng akak awo, i bi te kuhwyɛ ni ikyɛng akak awo.” Ni nshɛrɛp ntsi me ngma, ba kunung ina ni ifɛ̀ izining de ye, “Shim afidang isot ngɔn ti ice ngɔn.”

¹⁰Ki i shim afidang isot ngɔn, i da ku nye anyas awo. Nek anɔng, ishim ye, i yet ishining ntsi.

¹¹Nye yin anɔng, ni rēn yin kuri izen fi in di se yit yɔkɔnɔng. Izen mi nye, fi i da shemeng yin ni nda yin, nek izen isheshek yit se bakat yɔkɔnɔng aza izen fi in kin di nɔɔk yit atsak.

¹²Katuk mi bɛ́ bakat igang, kadiding ngmash na ka tarak. Nek anɔng, won in wobok yit ntomong nhwyi, won in te yit ares itsom afi mgbey.

¹³Won nggɔn yit ni i sot gyat, tɛ bafi mgbey, da na ba ki sɛs yin ayɛt ngu ice ni isɔ ni ifeng awo, kɛ iras kubi ni itsɛsɛk nta abap awo, da na ba ki sɛ yin ni itsɛsɛk ifa ni ifup awo.

¹⁴Tit ni sok yin nggɔn aTisa aYeso Kristi, da i bi tarak yin kawat nek ikɔk irɔm awo.