Read icen BaRoma 14 Bible Online

BaRoma 14 - icen bible

BaRoma 14

¹Shan yin ayɔng fɛ́ a se buk-buk ayɛt inɔɔk atsak, i bi woso ikɔk yin nanan ni iwu azaton ncɛɛt fi in se aben awo.

²Inɔɔk atsak akak, ku nɔɔk na a ya kaakyi ikyɛng, awɛt akak fɛ́ a se buk-buk ni inɔɔk atsak, a ya ikon kyɛk.

³Won ayɔng fɛ́ a ya kaakyi ikyɛng, a bi byɛs ayɔng fɛ́ da a ya kaakyi ikyɛng awo; won ayɔng fɛ́ da a ya kaakyi ikyɛng e awo, a bi tsɛɛt ayɔng fɛ́ a ya kaakyi ikyɛng e ishɔt awo, nek Adakunom mi ku shan.

⁴Ngɔn yet angan fi i da tsɛɛt asam akak ishɔt ɛ? Atekari wu wu kyɛk fɛ́ a rēn fok, ke a tsin tseng gyat a? Kɛ a mi kpa yɛ? A da kyem a nyeseng, nek aTisa da kyem a ku sak na a nyeseng.

⁵Akak sok kunom kukak ku wat kukak, na akak sok nnom e ngma in se nagbirigbɔng. Kaangan na a bereng ikyɛng fi kuyiring wu ku nɔɔk.

⁶Ayɔng fɛ́ a sok kunom kukak ku wat e, a nye anɔng nek Adakunom di sɛ iratek. Ayɔng fɛ́ a ya kaakyi ikyɛng, a nye anɔng nek Adakunom di sɛ iratek, nek a nyes ifeng sak na Adakunom. Ayɔng fɛ́ a kasa nayak, a nye anɔng nek Adakunom di sɛ iratek, nek a nyes ifeng sak na Adakunom.

⁷Nek vit akak ayɛt yit fɛ́ a se ni kutset nek itek ice wu, vit ayɔng fɛ́ a ku nek itek ice wu.

⁸Ki in se yit ni kutset, in se yit ni kutset nek aTisa, ki in ku yit, in ku yit nek aTisa. Nek anɔng, ke ni in se yit ni kutset a kɛ in ku yit ayi, in yet yit bafɛ́ aTisa.

⁹Nek ikyɛng deng de fi i sak Anet-Isheshek di ku, a tɛ a shemeng ni kutset, nɔng a di sot aTisa bafi kutset nɛ bayɔng fɛ́ ba mi ku.

¹⁰Wat ngɔn, akyɛ sak fi i tsɛk arunyining ishɔt ɛ? Kɛ akyɛ sak fi ibyɛs arunyining ɛ? Nek ngma yit in bi nyeseng yit ashon ishɔt Adakunom.

¹¹Nek i se ni ijɛk ye, “ATisa fɛ̀ ye, ‘Imi shemeng ni kutset hom,’ ‘kaakyi ikuut, bi te gururuk ashon hom; kaakyi ilem bi fɛrɛng fok imi yet Adakunom.’ ”

¹²Na anɔng, kaangan bi fa kutomong wu anu ashon Adakunom.

¹³Nek anɔng, won yin itsɛɛk bafidang ishɔt. Tit kaangan na a sok ni iyɛ wu fok, da iwu da sot kuta ikpa akak awo, ki ikyɛng isɛ inɛn sak na akak awo.

¹⁴Tɛ ayɔng fɛ́ a se ayɛt aTisa aYeso, imi rēn wɛshɛk fok, vit nayak fɛ́ da na se cɛ́l awo, awɛt ke akak sok fok nayak nakak se cɛ́l awo, i sot anɔng sak ni wu.

¹⁵Ke arunyining nɔ kudaam azaton ikyɛng fi i tsin ya, i sot ngɔn bi ishim arunyining awo. I bi won ikyɛng fi i tsin ya ni i wey na arunyining fɛ́ Anet-Isheshek ku nek iwu awo.

¹⁶I bi won ikyɛng fi ngɔn sok fok i yet itek, na ba cɛɛt naton de ti imaan e awo.

¹⁷Nek igwɔm Adakunom yet ifi iyak ni isɔs awo, tit kusot kutabat, kusot kukyang ni ifeng ayɛt Kabik aJɛrɛ.

¹⁸Nek ngma ayɔng fɛ́ a kuus Anet-Isheshek anɔng, a tɛrɛk Adakunom iyɛ, na sɛs irun ama na banet.

¹⁹Nek anɔng, won ni in te nyɛk yit na akaakyi irèn, ni in ras yit ikyɛng fi ibɛ́s ni kusot kukyang, ni inok ace yit.

²⁰I bi won yin kucɛɛt iyak, ni ku beseng kutomong Adakunom awo. Kaakyi kuyak se cɛ́l, awɛt da i se yɛɛt anet na a ya ikyɛng fi i da sak akak ikpa awo.

²¹Idung se gyat anet na a rawu iya nayak, kɛ na rawu isɔ ashi anap, kɛ na a nye ikyi ikak fi i da sak arunyining ikpa.

²²Won kuyiring fi i bɛ̀ naton ikyɛng deng, ni i sot nate ngɔn nɛ Adakunom. Awɛng se naton anet yɔng fi da iyɛ wu kutsɛk ishɔt naton ikyɛng fɛ́ mi di nyeseng awo.

²³Awɛt ayɔng fɛ́ a bi iyɛ gak naton ikyɛng fɛ́ a tsin ya, a tsin kɔk ice wu ishɔt Adakunom, nek kuyak fɛ́ a se ne ku ni inɔɔk atsak awo. Nek ngma ikyɛng fi da i ni inɔɔk atsak awo, i yet inɛn.