Read icen BaRoma 16 Bible Online

BaRoma 16 - icen bible

BaRoma 16

¹In shim in ki tonong yin anganeng yit aFibi, anet itomong nate bafi ikuus fɛ́ ba se na aKɛnkɛrɛya.

²Imi shim ni i ku shan ni irèn fɛ́ bafi ikuus di shashang bafidang. Ku nɔɔk yin kaakyi kuri igbingding fɛ́ a da tsɛt ni yin, nek iwu ice wu, a mi gbinding banet dot ngma ni imi.

³Di te show yin aPrisila nɛ Akwila, bafidang itomong hom na Anet-Isheshek aYeso.

⁴Ba nɔɔk nwaa kutset bá nek imi. Imi azimin kyek awo, awɛt ngma ni nshɛrɛp bafi ikuus Ícɛn-iduk bi iyɛ ikan sak ni ba.

⁵Di te show bafi ikuus fɛ́ ba nyis ari bá. Di te show yin icɛk iyɛ hom aEfenitus, anet imɛsɛng fɛ́ a kin tun shan aKristi ni mben Asiya ngma kusum.

⁶Di te show yin aMarya, iwu fɛ́ a di ngu ice ni kutomong nek iyin.

⁷Di te show yin Andaronikus nɛ aJuniyas, bafi izit in fɛ́ ba kin se ari nyang gung ni imi. Iba fɛ́ ba mak ka ba rēn kaakɛ ayɛt batom-aYeso, iba kin tin shan aYeso aza min.

⁸Di te show yin icɛk iyɛ hom ayɛt aTisa, Amfiliyatus.

⁹Di te show yin aUrbanus, afidang itomong yit ayɛt Anet-Isheshek, ni icɛk iyɛ hom aSitakis.

¹⁰Di te show yin Afalis, anet fɛ́ ba mi ku mara, a nyeseng gak na Anet-Isheshek. Di te show yin bafɛ́ ari Aristobulus.

¹¹Di te show yin aHirodiyɔn, afi izit hom. Di te show yin bafɛ́ ari aNasisus fɛ́ ba se ni ikuus aTisa.

¹²Di te show yin aTirayifina nɛ aTirayifusa, banyining fɛ́ ba di ngu ice ni kutomong aTisa. Di te show yin icɛk iyɛ hom aPasis, azining ayɛt banyining fɛ́ ba di ngu ice ayɛt kutomong aTisa.

¹³Di te show yin aRufus, anet fɛ́ ba ku kasa ni kutomong aTisa. Ni ti di te show yin nggɔ wu, fɛ́ a di sok tɛ ari wu.

¹⁴Di te show yin Asinkritus nɛ aFiligon nɛ aHarmis nɛ aPaturobas nɛ aHarmas ni nshɛrɛp baruneng fɛ́ ba se gung ni iba.

¹⁵Di te show yin aFilologus nɛ aJuliya nɛ aNeriyus nɛ anganeng bá nɛ aOlimpas ni nshɛrɛp bafi ikuus fɛ́ ba se gung ni iba.

¹⁶Te show yin bafidang ni ite ngmak aJɛrɛ. Ngma bafi ikuus Anet-Isheshek tsin ki nye yin ashow.

¹⁷Ábaruneng, in tsin ra awon ni yin, nye yin yɛɛt na bayɔng fɛ́ ba bɛ́s ni ikaba, na ba ki ro yin inye ikyɛng fɛ́ ba man ki tees yin. Nyeseng yin atsitse ni iba.

¹⁸Nek kuri bayɔng tsin ra kutomong nek aTisa yit Anet-Isheshek awo, tit ifɛ́ nafa bá kyɛk. Ayɛt nta ncɛɛt bá ni itere mbɔɔs, ba di wɔrɔsɔ banet fɛ́ ba se vit itsɛ́ng.

¹⁹Nek kaangan mi fok ifoos ifɛ̀ fi i bɛ̀ yin, nek anɔng, in bi ifeng nek iyin, awɛt imi shim ni i sot yin tsɛngtsɛng naton ikyɛng fi i yet itek, ni ma kusu yin mbɔk yin ni ikyɛng fi i yet imaan e.

²⁰Adakunom fɛ́ a nesek kusot kukyang, ngmash na a fɛlɛ aShetan na atas atak yin. Won itek aTisa yit aYeso, i di nak gung ni iyin.

²¹Afidang itomong in aTimoti ki nye show yin; nɛ aLushiyos nɛ aJasɔn nɛ aSosipata bafi izit hom.

²²Imi aTatiyus fi in jɛk kufumung kang, in tsin ki te show yin ayɛt aTisa yit.

²³AGayus anet fi in tik ari wu, ayɔng fɛ́ bafi ikuus ngma nyis ari wu, tsin ki te show yin. Arastus, akɔk-ashon bafi itomong iwɔp nɛ aruneng yit aKwartus, ki nye show yin.

²⁴Won itek aTisa yit aYeso Kristi ni i sot gung ni yin ngma. Anɔng.[2]

²⁵Won ízɔk ni i sot ifɛ́ Adakunom, iwu fɛ́ a bɛ̀ kukyem a ki te tsik yin ayɛt inɔɔk atsak yin nek ifɛ̀ itek fi in shara naton aYeso Kristi. Ifɛ̀ itek e dɔng fi i tsang se ni nɛt na ayɛ ama,

²⁶awɛt yɔkɔnɔng, ba mi tun ide wɛshɛk ni ijɛk batan. Wat Adakunom vit nkum kin fɛ̀ na ba tonong ide ngma sak ni Icɛ́n azatse, nɔng ba bin di nɔɔk atsak na ba foos ifɛ̀ me.

²⁷Won ízɔk ni i sot ifɛ́ Adakunom, iwu aziwu kyɛk fɛ́ a yet atsitsɛng, ayɛt aYeso Kristi ayɛ na ayɛ! Anɔng.