Read icen BaRoma 2 Bible Online

BaRoma 2 - icen bible

BaRoma 2

¹Nek anɔng, ngɔn anet fi iyɛrɛ inɛn akak, vit ngɔn ni ihwyet, ki ni i yet angan ɛ. Nek izen fi i tsin ras bakak ishɔt, i tsin ras ice ngɔn e yɔng, nek ngɔn anet ishɔt e, i tsin ras nggɔn nzining e yɔng.

²Iyit rēn yit fok ishɔt Adakunom se kpaf naton bayɔng fɛ́ ba ras nkyɔrɔk e nang.

³Ngɔn anet! Ngɔn di ti ngɔn fi i tsin ras bayɔng fɛ́ ba ras nkyɔrɔk e yɔng ishɔt, ni ngɔn tsin ras ina bà, ngɔn di ti i bi shorop ishɔt Adakunom ɛ?

⁴Kì ngɔn byɛs kudot itek Adakunom nɛ akabɔk fɛ́ a nyes ni iyɛsɛp iyɛ fɛ́ a nye ni ngɔn ɛ? Kì ngɔn rēn fok itek fɛ́ Adakunom tonoso yet nek ngɔn di tirik sak ishan atsak awɛ?

⁵Awɛt nek kugbarak ice ngɔn ni kugbarak iyɛ fi ngɔn bɛ̀, ngɔn se ni itusung ice ngɔn ishɔt fi i tsin da tot, atuk fɛ́ Adakunom bi tonong kafa kawe wu, atuk e yɔng wu Adakunom bi bɛ́ a da tonong ishɔt wu fi i se tabat.

⁶Nek Adakunom bi nɔɔk kaangan izang wu kpaf ni kutomong wu.

⁷Sak na bayɔng fɛ́ ba se ni iras ntomong ntek ayɛt akabɔk, ba se ni itsɛt iratek ni itere ni kutset vit nkum, Adakunom bi ka ba nɔɔk kutset vit igang.

⁸Awɛt bayɔng fɛ́ ba tsin tsɛsɛk ifi ice bá, bayɔng fɛ́ ba raba atsak, wɔn iras anyas, ba bi nyim ne kafa kawe ni mgbang Adakunom.

⁹Izot ni mgbang tsin tot ngma banet fɛ́ ba ras anyas, ba bi tumung na baYahuda ni Ícɛn-iduk di kuus.

¹⁰Awɛt ngma ayɔng fɛ́ a ras ntomong ntek, a bi sɛ iratek ni ízɔk ni kusonong kukyang, ba bi tumung na baYahuda ni Ícɛn-iduk di kuus.

¹¹Nek Adakunom tonoso ishim ice awo.

¹²Ngma bayɔng fɛ́ ba ras inɛn dang isɛ irēn ntsi aMusa, ba bi ka ba tabak dang ntsi aMusa, awɛt ngma bayɔng fɛ́ ba ras inɛn, iba ni irēn ntsi aMusa, ba bi ka ba ra ishɔt ni ntsi aMusa.

¹³Kusot kutabat ashon Adakunom se na bayɔng fɛ́ ba ifoos ikyɛng fi Ntsi fɛ̀ kyɛk awo, tit na bayɔng fɛ́ ba ras ikyɛng fi Ntsi me fɛ̀, iba ba ba fɛ̀ tabat ashon Adakunom.

¹⁴Nek ki Ícɛn-iduk fɛ́ ba se vit ntsi, ngma na anɔng ayɛt kuyiring bá, ba kyem ba ra ikyɛng fi ntsi fɛ̀, a sot ba rēn ntsi me ayɛt ayɛ bá, ngma ne avit ntsi bá.

¹⁵Ba tonong fok ikyɛng fi ntsi fɛ̀ se ni ijɛk na ayɛ bá, kayɛt iyɛ bá run kama anɔng, ni kuyiring bá ka ba ras ishɔt.

¹⁶Atuk e yɔng, kpaf ti ifɛ̀ itek deng fi in tsin shara me, Adakunom bi ra ishɔt nanu Anet-Isheshek aYeso naton nkyɔrɔk fi in se ni nɛt na ayɛ banet.

¹⁷Awɛt ki ngɔn yes ice ngɔn, afɛ́ aYahuda, i nesek agap ni ntsi aMusa, ni tsot kukaa ayɛt ifidang na Adakunom,

¹⁸ni nye fok ngɔn rēn ikyɛng fi iwu shim, ngɔn rēn idɔng fi i se kpaf nek ntsi da tonong anɔng,

¹⁹ngɔn bi inɔɔk atsak fok, ngɔn yet akɔk-ashon bakpatɔn, i yet mgbey sak na bafɛ́ ahwyi.

²⁰Anet itees bayɔng fɛ́ ba se vit itsɛ́ng, anet itees bayɔng fɛ́ ba bɛ̀ kuyiring nnon, nek ayɛt ntsi aMusa wu fi irēn nɛ atsak di se.

²¹Wat ngɔn fi itees bakak, itees ice ngɔn bà awɛ? Ngɔn fi ishara fok, da ba bi yising awo, ngɔn yising awɛ?

²²Ngɔn fi i nye fok da ba bi ras kujang awo, ngɔn ras kujang awɛ? Ngɔn fi i rangɔn nabannom, ngɔn yising nkyɔrɔk iya ntong nabannom e awɛ?

²³Ngɔn fi itsot kukaa ni ntsi aMusa, ngɔn beseng Adakunom iyɛ fi ibeseng ntsi me awɛ?

²⁴Nek i se ni ijɛk, “Nek iyin baYahuda, i mi sak yin Ícɛn-iduk mi beseng iyerek Adakunom.”

²⁵Iya katse se yɛɛt, ki i kuus yin ntsi aMusa, awɛt ki rayin dang kuus ntsi aMusa, i mi sot yin tɛ bayɔng fɛ́ ba se vit iya katse.

²⁶Nek anɔng, ke anet fɛ́ da ba mi ku ya katse awo, a ras ikyɛng fi Ntsi fɛ̀, ba da ku sok tɛ ayɔng fɛ́ ba mi ku ya katse awɛ?

²⁷Nek anɔng, ayɔng fɛ́ ba mi ku ya katse awo, ngma na anɔng, na ras ikyɛng fi Ntsi fɛ̀, a bi da barak ni ishɔt, ngɔn ayɔng fi i bɛ̀ ntsi ni ijɛk, ba mi da ya katse, awɛt ni rangɔn dang ras ikyɛng fi ntsi me fɛ̀.

²⁸Nek anet kyem a sot atitup afɛ́ aYahuda ni irɔm kɛ nek iya katse kyɛk awo,

²⁹Koba! Atitup anet aYahuda se ayɛt iyɛ, iya katse yet ifi iyɛ, fɛ́ Kabik ras, da ifi ijɛk awo. Itere anet e yɔng, nes na banet awo tit na Adakunom.