Read icen BaRoma 3 Bible Online

BaRoma 3 - icen bible

BaRoma 3

¹Wat akyɛ de fi i yet itek e yɛ, ke anet sot afɛ́ aYahuda me yɛ? Kɛ akyɛ de fi i yet kugyat katse me yɛ?

²Ey, na akaakyɛ irèn, ni imɛsɛng e, baYahuda ba Adakunom kin kaba nɔɔk ifɛ̀ atsak ni bɔk bá.

³Awɛt, ke bakak ayɛt bá raba dang bereng ifɛ̀ me anɛ? Avit ibereng ifɛ̀ me, da sak Adakunom da won ikyɛng fɛ́ a mi tsang sak fok, a da nye yɛ?

⁴Koba! Won Adakunom na a sot afɛ́ atsak, won kaangan na a sot afi mbɔɔs, ti i di se ni ijɛk, “Nek ba di di katsak ngɔn ni icɛɛt, nɔng i di waat akaangan na atsak ni izen ishɔt.”

⁵Awɛt ke avit atsak yit, tonoso kusot kutabat Adakunom wɛshɛk, akyɛ fi in da fɛ̀ yit ɛ? In da fɛ̀ yit fok Adakunom dun, ke a ki tabak yit ɛ? (In tsin cɛɛt tɛ anet awe.)

⁶Koba! Ki ifi se anɔng, na anɛ wu fɛ́ Adakunom di ki ra kazatse ishɔt ɛ?

⁷Akak da kyem a fɛ̀ ane, “Ki mbɔɔs hom da tun atsak Adakunom wɛshɛk, ni i ku barasa iratek wu, akyɛ sak fɛ́ ba rēn di ras ishɔt, tɛ anet inɛn ɛ?”

⁸Bakak ki tsɛk yit mbɔɔs fok iyit fɛ̀ yit ane, “In da ya yit kashon na anyas, mok itek di ki bɛ́ yɛ?” Ki i se anɔng, akyɛ ki rone ni in ya yit kashon ni iras anyas nɔng itek e di ki bɛ́s ɛ? Bayɔng fɛ́ ba nye ncɛɛt ibeseng yɔng, kyem na ba wey ni ba.

⁹In da gang yit ifɛ̀ me deng anɛ? Ke iyit baYahuda in wat yit nshɛrɛp banet ɛ? Koba! Iyit mi tsɛɛt yit ifɛ̀ fok, iyit baYahuda nɛ Ícɛn-iduk, ngma yit in se yit nawop inɛn.

¹⁰I se ni ijɛk fok, “Vit azining fɛ́ a yet afɛ́ kusot kutabat, vit kitsarang e.

¹¹Vit akak fɛ́ a bi irēn, vit ayɔng fɛ́ a tsɛt Adakunom.

¹²Ngma ba ba mi nɔɔk Adakunom kama, ngma ba ba mi sot ahwye me. Vit azining ba fɛ̀ a nye ikyɛng itek, vit itsarang e.”

¹³“Agbɔgbɔrɔ bá, se ti kurɛk fi ku se piyot, ba wɔrɔsɔ banet na alem bá.” Alem bá turung nadɔm tɛ na fɛ ámazɛrɛ.

¹⁴“Ánu bá shining ni itok nɛ amaan ifɛ̀.”

¹⁵“Atak bá se ziri ziri ni noos nasok;

¹⁶bà bɛ́ atak akan;

¹⁷ba rēn irèn kusonong kukyang awo.

¹⁸“Ba bi nnyim Adakunom na ayɛ bá awo.”

¹⁹Yɔkɔnɔng in rēn yit fok ngma ikyɛng fi Ntsi fɛ̀, cɛɛt naton bayɔng fɛ́ ba se nawop ntsi, nɔng vit ayɔng fɛ́ a bi sɛ ikyɛng ifɛ̀, nɔng ngma kazatse bi nyeseng nanu ashon Adakunom nek ishɔt.

²⁰Nek vit anet fɛ́ a da kyem a sɛ ihwyet anu ashon Adakunom nek ntomong ntsi, i yet ntsi na fi in tonoso anet inɛn wu.

²¹Awɛt yɔkɔnɔng, ba mi tun irèn ikak fɛ́ banet di ki sɛs ishashang ashon Adakunom, da ni irèn ntsi awo, kpaf tɛ ba kin di fɛ̀ ni ijɛk aMusa, ni ifɛ̀ batan ayame awo.

²²Kusot kutabat nes na Adakunom, ni irèn inɔɔk atsak na aYeso Kristi sak na bayɔng fɛ́ ba nɔɔk atsak. Nek iwu tonoso ishim ice awo,

²³nek kaangan mi ra inɛn, a mi gaat itsa sak ni imara ízɔk fɛ́ Adakunom nesek.

²⁴Wat Adakunom mi tonong itek kunang wu, in mi sot yit tabat anu ashon Adakunom, nek ibisik fɛ́ aYeso ki nye yit e.

²⁵Adakunom nabak aYeso na a sot kunang inabak ifuut anɛn, nek mok nasok wu, banet di sɛ ifuut anɛn bá nek inɔɔk atsak bá. Adakunom nye anɔng nek a di tonong kusot kutabat wu, nek ayɛt akabɔk wu a di wosong anɛn fɛ́ ba ki mang ra.

²⁶Adakunom kin nye anɔng ni izen e yɔng, nek a di tonong kusot kutabat wu, ama anɔng, a di tees bayɔng fɛ́ ba nesek atsak na aYeso ba di sot bafɛ́ kusot kutabat.

²⁷Awɛt naton akyɛ fi in di ki tsot yit kugwɔm ɛ? Vit ikikak! Ke ayet nek kutomong ntsi wu in di ki tsot yit kugwɔm ɛ? Awey! A yet nek atsak fi in nɔɔk yit na aYeso wu.

²⁸Nek iyit mi di yit, anet sɛs kusot kutabat ashon Adakunom nek inɔɔk atsak da nek iras ntomong ntsi awo.

²⁹Ke Adakunom yet Adakunom baYahuda kyɛk ɛ? A yet Adakunom Ícɛn-iduk bà awɛ? Ey, A yet afuba bà.

³⁰Nek Adakunom yet azining, iwu wu a bi kusu bayɔng fɛ́ bamang ka ba ya katse, ni irèn inɔɔk atsak, ngma nɛ bayɔng fɛ́ ba se vit iya katse, ni irèn inɔɔk atsak bá.

³¹I sot in da barak yit ntsi me, nek inesek atsak ɛ? Koba! In da bang te tsik yit ina ningya.