Read icen BaRoma 4 Bible Online

BaRoma 4 - icen bible

BaRoma 4

¹Wɛt akyɛ fi in da fɛ̀ yit fok aIbrahim adakop yit ni irɔm ɛ? Kin rēn ayɛt icɛɛt kang ɛ?

²Nek ki aIbrahim kin fɛ́ a sɛ kusot kutabat nek ntomong wu, ke a bi ikyɛng itsot kugwɔm, awɛt ki itsot kugwɔm wu me se ayɛt Adakunom awo,

³nek ikyɛng de fi kufumung Adakunom fɛ̀ yɛ? “AIbrahim kin nɔɔk atsak na Adakunom, nek anɔng, Adakunom ku te mo, i sot kusot kutabat ashon wu.”

⁴Nek ikyɛng fɛ́ ba tarasa anet itomong, yet kunang awo, tit izang wu.

⁵Awɛt ayɔng fɛ́ da ite iyɛ wu se naton kutomong wu awo, tit ni inɔɔk atsak na Adakunom, iwu yɔng fɛ́ a kanang bafi inɛn, ba fa inɔɔk atsak wu me, naton kusot kutabat nanu ashon Adakunom.

⁶Ikyɛng de fɛ́ aDauda kin cɛɛt ni izen fɛ́ a kin fɛ̀, awɛng se gung ne anet yɔng fɛ́ Adakunom mi ki sok fok, a se tabat nanu ashon wu dang kutomong:

⁷“Awɛng se gung na bayɔng fɛ́ ba mi ku fuut anyas wu, ba mi ku kanang anɛn wu.

⁸Awɛng se gung na anet yɔng fɛ́ da aTisa tɛ a fa anɛn wu awo.”

⁹Asot fok awɛng e yong yet afɛ́ bayɔng fɛ́ ba mi ka ba ya katse kyɛk ɛ? Ke a yet ngma ne bayɔng fɛ́ ba se vit iya katse yɛ? Nek iyit mi fɛ̀ yit, Adakunom kin fa inɔɔk atsak aIbrahim naton kusot kutabat ashon wu.

¹⁰Na akyi izen fi ikyɛng e deng kin te anɔng e yɛ? Na ba mi tsang ku ya katse me a? Ke na ba resek dang ku ya ne yɛ? Awey, ikyɛng e kin te na ba resek dang ku ya katse da ami ma me awo.

¹¹Ba kin ne ba ku ya katse ami ma me, nɔng katse me bin sot ikyɛng idi kusot kutabat wu fɛ́ a kin sɛ iko nek inɔɔk atsak wu, neme dang na ba ku ya katse. Ba kin nye anɔng, mok a da sot ada bayɔng fɛ́ ba nesek atsak dang na ba ka ba ya katse, nɔng ba bin sot bafi kusot kutabat nanu ashon Adakunom bá,

¹²nɔng aIbrahim a da tɛ a sot ada bayɔng fɛ́ ba mi ka ba ya katse, da nek iya katse me kyɛk awo, tit nek ikuus atak inɔɔk atsak fɛ́ ada yit aIbrahim kin nye neme dang na ba ku ya katse.

¹³Nek kushii fɛ́ ba kin nye aIbrahim ni izit wu ne ye, a bi iya itekari azatse, anɔng e kin te nek iwu shining ntsi awo, tit nek kusot kutabat fi iwu kin sɛ ni irèn inɔɔk atsak.

¹⁴Nek i kin fi i yet fok bafi ishinishi ntsi ba fɛ̀ ba iya itekari azatse, ki inɔɔk atsak, sot abap, ni ikyɛng fɛ́ Adakunom kin kushii me, sot vit ice me.

¹⁵Nek ntsi sas naman Adakunom na na tik, awɛt karɔ fi ntsi se vit, ibeseng ntsi se narɔ me yɔng awo.

¹⁶Nek anɔng, kushii me kin ne ni inɔɔk atsak, nɔng itek e da bin sot atitup kunang fɛ́ Adakunom nɔɔk bafi izit aIbrahim ngma kusum, da nkum bayɔng fɛ́ ba berese ntsi kyɛk awo, tit ngma ne bayɔng fɛ́ ba di kuus atak inɔɔk atsak aIbrahim bà. Iwu fɛ́ a yet ada yit ngma.

¹⁷I se ni ijɛk ye, “Imi mi da sak ni i sot ada icɛ́n azatse dot.” Iwu yet ada yit nanu ashon Adakunom, ni wu fɛ́ a di nɔɔk atsak. Adakunom fɛ́ a nesek kutset sak ni nkom, na tɛ na sas nkyɔrɔk fi in se vit, ni in sot.

¹⁸Ngma ni kuri ndaam fi in kin te aIbrahim nate, a ya kashon ni inesek atsak na Adakunom, ni ite iyɛ fok iwu da sot ada icɛ́n dot. Nek Adakunom man fɛ̀ ni iwu ye, “Izit ngɔn bi se ane.”

¹⁹AIbrahim kin se bakat ayɛ anakat azining, ngma ni ikop fi i mi ku ya ti kukom, ni ikumung fɛ́ abining wu aSara bɛ̀, ngma na anɔng, inɔɔk atsak wu te gbɛrɛk awo.

²⁰Awɛt aIbrahim won ikikak i ku tegak iyɛ ni inɔɔk atsak wu, azaton ikyɛng fɛ́ Adakunom mi fɛ̀ a da ku nye ne awo, awɛt inɔɔk atsak wu ban te agap, na tere ízɔk Adakunom,

²¹ni ite iyɛ fok Adakunom kyem fɛ́ a da shining ifɛ̀ wu.

²²Nek anɔng wu fi inɔɔk atsak wu sak, “Ba ku fa iye i sot, kusot kutabat nanu ashon Adakunom.”

²³Awɛt ikyɛng fɛ́ ba kin jɛk e yet nek iwu aziwu kyɛk awo,

²⁴tit sak ni yit ngma yit fi in nɔɔk yit atsak na ayɔng fɛ́ a dorok aYeso aTisa yit, ni irɛk.

²⁵AYeso yɔng fɛ́ ba kin ku nabak, a ku nek anɛn yit, ba tɛ ba ku donong ni kutset nek kusot kutabat yit ashon Adakunom.