Read icen BaRoma 5 Bible Online

BaRoma 5 - icen bible

BaRoma 5

¹Yɔkɔnɔng fi in bɛ́ yit kusot kutabat ashon Adakunom nek inɔɔk atsak, in mi sɛ yit kusot kukyang ne Adakunom fi ku ne na aTisa yit aYeso Kristi.

²Ni wu fi in mi sɛ yit kunɔ ayit itek fi in di se yit yɔkɔnɔng, nek inɔɔk atsak yit. In bɛ̀ yit ifeng ni ite iyɛ imoon mbɔk iyit ízɔk Adakunom.

³Da idɔng kyɛk awo, in bɛ́ yit iyɛ ikan ayit mgbang yit, nek in rēn yit fok mgbang bes ne anyɛk,

⁴nɛ anyɛk bes ni nggɔn ntek, ni nggɔn ntek nesek ite iyɛ na Adakunom.

⁵Ni ite iyɛ yit ki tes yit nsum awo, nek Adakunom mi ki korok yit ishim wu na ayɛ yit ni irèn Kabik aJɛrɛ fɛ́ ba mi ki nɔɔk yit.

⁶Na kpaf izen, ni iyit rēn resek yit mo vit agap, Anet-Isheshek ku mok iyit fi in yet bafi inɛn.

⁷Nek i bi mgbang akak na a ku nek anet kusot kutabat. Awɛt nyen akak da kyem a nye iyɛ na aku nek anet fɛ́ a bɛ̀ nggɔn ntek.

⁸Awɛt Adakunom ki tonong yit ishim wu, ni iyit ren resek yit mo bafi inɛn, aKristi ku mok iyit.

⁹Ki inosong nasok Anet-Isheshek mi ki bɛ́ yit ni kusot kutabat nanu ashon Adakunom, wat a bi ne a won dang ki sheshek yit na naman Adakunom ɛ?

¹⁰Nek ki izen fi in ren se yit ifa ne Adakunom, in sɛ yit kusot inosong-ashi nek iku ari wu, wat yɔkɔnɔng fi in mi nosong ashi, a da won dang ki sheshek ni kutset wu ɛ?

¹¹Kashon na anɔng, in bɛ̀ yit iyɛ ikan ne Adakunom nek aTisa yit aYeso Kristi, iwu fɛ́ a bɛ́ ni inosong-ashi yit.

¹²Nek anɔng, kpaf ti fi inɛn di nɔ azatse na anet azining, iku di kuus kama inɛn, na anɔng wu iku se na banet ngma kusum nek kaangan man nye inɛn,

¹³nek inɛn kin se azatse neme dang na ba nɔɔk ntsi, awɛt ba kyem ba fa inɛn narɔ fɛ́ da ntsi di se awo.

¹⁴Ngma na anɔng, ikyɛng fi iyit izen Adamu sak ni izen aMusa iku ya igwɔm naton banet, ngma na bayɔng fi inɛn ba yet kuri nfi ibeseng ntsi tɛ Adamu awo. Adamu sot tɛ nawu ayɔng fɛ́ a da bɛ́.

¹⁵Awɛt kunang fɛ́ Adakunom mi nɔɔk na ayɔng fɛ́ a bi bɛ́ me, ku se zɛɛt ni inɛn fi i kin ne na Adamu. Di yin fi inɛn anet azining bɛ́ ni iku na banet dot. Ngma na anɔng itek Adakunom wat, ngma ni kunang fi ku ne na anet azining aYeso Kristi fi ku ki bɛ́ yit mo na agbat awɛng.

¹⁶Nek, kunang Adakunom se ki ikyɛng fi inɛn anet azining bene awo. Ishɔt e bɛ nek inɛn izining, i bɛ́ ni iku, awɛt kunang Adakunom fi ku ne ama anɛn zizɛɛt, bɛ́ ni ikusu ashon Adakunom.

¹⁷Ke nek inɛn anet azining, iku ya igwɔm naton banet nek anet azining e yɔng, bayɔng fɛ́ ba mi sɛ kunang itek, ni kusot kutabat, ba da ya igwɔm makiyi nek anet azining e yɔng fɛ́ a yet aYeso Kristi.

¹⁸Nek anɔng, kpaf ti fi inɛn anet azining bɛ́ ni ishɔt iku banet ngma kusum, kpaf anɔng fi kutomong kutabat fɛ́ anet azining nye bɛ́ ni kusot kutabat ni kutset sak na banet ngma.

¹⁹Kpaf ti fi avit ifok-ifɛ́ anet azining tirik banet ngma ba sot bafi inɛn, anɔng wu fi ifok-ifɛ́ anet azining da tirik banet dot di sot bafi kusot kutabat ashon Adakunom.

²⁰Ba bɛ́ ni ntsi nɔng anɛn bin bang di wuru, awɛt karɔ fi inɛn di ya kashon, azɔng wu Adakunom bang di barasa itek wu,

²¹nɔng kpaf ti fi inɛn kin ya igwɔm ni kubɛ́ iku, anɔng wu fi itek Adakunom da ya igwɔm ayit kusot kutabat ni kutset vit nkum fɛ́ aTisa yit aYeso Kristi nesek.