Read icen BaRoma 7 Bible Online

BaRoma 7 - icen bible

BaRoma 7

¹Ábaruneng, in tsin cɛɛt ni iyin tɛ bayɔng fɛ́ ba rēn ntsi, nek iyin rēn yin fok ntsi ya naton anet fɛ́ a yet atset kyɛk awɛ?

²Kpaf tɛ ane, ntsi iweneng, in rosom abin iweneng na amatek wu, ni izen fɛ́ amatek wu se ni kutset kyɛk, awɛt ke amatek wu me a ku, ba mi ku bisik ni ntsi iweneng e yɔng.

³Nek anɔng wu, ke a tɛ a ra kuweneng ne anet akak, i sot ba da ku yes afi irɔs, ke amatek wu me rēn resek mo ni kutset. Awɛt ke amatek wu me mi ku, a sot ba mi ku bisik ni ntsi kuweneng e yɔng, ke a tse a bɔ amatek akak, da i ti yet irɔs kong awo.

⁴Idɔng kpaf anɔng ábaruneng, iku Anet-Isheshek naton kukum itekak, mi ki sak yin i mi kus yin ni ikuus ntsi, nɔng i da bin sot yin bafɛ́ akak, iwu ayɔng fɛ́ ba mi ku donong ni iku, nɔng i da bin nye yit kusot fi ku da nɔɔk Adakunom iratek.

⁵Nek ni izen fi in rēn kuus yit ikɔk ishim irɔm yit, ntsi me ki barasa yit mo ikɔk iras inɛn ni nrɔm yit, nɔng ngma nkyɔrɔk fi in ras yit ina, in da tse ni yit ni iku.

⁶Awɛt yɔkɔnɔng fi mi kus yit, ni nkyɔrɔk yɔng fi i ki rosom yit, ba mi ki bisik yit ni ntsi me, nɔng in da bin ra yit kutomong ni irèn ifas ifɛ́ Kabik, da ni in tin tsees yit ni irèn izen ifi ntsi fi in se ni ijɛk e me awo.

⁷Akyɛ fi in da fɛ̀ yit kong ɛ? Ntsi me yet inɛn ɛ? Koba! Afɛ́ yet ke da nek ntsi me awo, ki imi rēn ikyɛng fi i yet inɛn awo. Ke da nek ntsi me awo, ki imi rēn ikyɛng fɛ́ ba yes ide kuhwye awo, ina fɛ̀ ye, “Da i bi te kuhwye ni ikyɛng akak awo.”

⁸Awɛt inɛn, i sɛ kawat nek ntsi me, i di tes mo kuhwye ndiri-ndiri me. Nek ke da ni ntsi me awo, inɛn mi te kukom me.

⁹Yame fi ntsi kin di se awo, in yet atset dang ina. Awɛt izen fi ntsi bɛ́, in shemeng inɛn, in wat in ku.

¹⁰In da ni in di kong fok, ina ntsi me yɔng fɛ́ ba yes nyan in da bɛ́ ni kutset, in da ni in bɛ́ ni iku.

¹¹Nek inɛn sɛ kawat nek ntsi me, i di wɔrɔk, ni irèn ntsi me, in di fɛt mo.

¹²Nek anɔng e kong, ntsi me se jɛrɛ, ata-ifɛ̀ me se jɛrɛ, in se tabat, in se gyat.

¹³Sɛɛ in da fɛ̀ fok, ikyɛng fi i yet itek e me de i di bɛ́ ni iku yɛ? Koba! Awɛt nɔng ba bin rēn fok inɛn yet inɛn, i di bɛ́ ni iku ni irèn ikyɛng fi i kin yet itek, nɔng ni irèn ata-ifɛ̀ me, in da bin di yit gbɛngɛrɛng fok inɛn yet aduk ikyɛng.

¹⁴Iyit rēn yit fok ntsi me ne na kabik Adakunom, awɛt imi yet anet awe kyɛk, fɛ́ a yet asam ni bɔk inɛn.

¹⁵Imi rēn ikyɛng fi in di se ne awo. Nek ikyɛng fi in shim in ra ide, da ide de fi in ra awo, awɛt ikyɛng fi imi ramin ide zak-zak, ide me dɔng in ras.

¹⁶Ki imi ras ikyɛng fi da in shim irade awo, idɔng sot fok in mi fɛ̀ ey, ntsi me yet ntek.

¹⁷Awɛt yɔkɔnɔng, da a tɛ a yet imi ice hom wu fi in ras nkyɔrɔk e me yɔng awo, tit inɛn fi i sot ayɛt iyɛ hom de.

¹⁸Nek in rēn fok vit ikyɛng itek fi i se ayɛt hom, ayet nggɔn anet awe. Nek in bi iyɛ ingash inye ikyɛng itek akabɛs, awɛt in ni in kyem ira me awo.

¹⁹Nek ikyɛng fi in nye, da i yet ikyɛng itek fi in shim in nye awo, awey, tit imaan e me dɔng fi in shim i nye ide awo, ide me dɔng in di ban iras e.

²⁰Yɔkɔnɔng, ki in ras ikyɛng fi da in shim ira me awo, idɔng tonong fok, da imi wu in ras ide awo, tit inɛn fi i se ni kusot ayɛt hom de fi iras iko.

²¹Nek in mi di ane: Izen fi in shim in nye ikyɛng itek, ni imaan e ma sot pang ni imi.

²²Nek tsik ayɛt iyɛ hom, iyɛ hom tɛrɛk ni ntsi Adakunom,

²³awɛt i ni in di ntsi nkak fi in se ni kutomong ni nkap irɔm min, fi in se ni itang itsom ni ntsi abik hom. In di sas ni in sot asam inɛn, fi i se ni kutomong ayɛt nkap irɔm hom.

²⁴Ye kukuu! In mi sot ikyɛng angmishish! Angan di ki sheshek ni kurɔm kang fi ku di ki tsa sak ni iku yɛ?

²⁵Itere ni i sot ifɛ́ Adakunom fɛ́ a di sheshek ni irèn aYeso Kristi aTisa yit. Na anɔng, imi ice hom ayɛt iyɛ hom, in yet asam ni ntsi Adakunom, awɛt ayɛt nggɔn anɛn irɔm, in yet asam ni ntsi inɛn.