Read icen BaRoma 9 Bible Online

BaRoma 9 - icen bible

BaRoma 9

¹Anet-Isheshek rēn fok in tsin cɛɛt atsak, imi tsin ki wɔrɔk yin awo. Kabik aJɛrɛ di tonong tsɛngtsɛng ayɛt kuyiring iyɛ hom, fok da in tsin cɛɛt mbɔɔs awo.

²Nek in bɛ̀ kudaam ni itusup iyɛ makiyi ayɛt iyɛ hom.

³Zɔng kin ishim, kawɛy di kpa ni imi, na ba di kam na aKristi akuce banet hom, bafi izit hom,

⁴banet aIsrela. Iba fɛ́ Adakunom kasa ti nnon wu, iba fɛ́ Adakunom ka ba te iratek, Adakunom kin rosom kushii ni iba, iba fɛ́ ba kin shan ntsi, iba fi kutu iya Adakunom ntong se ni iba, ni kushii fɛ́ Adakunom man nye ni iba.

⁵Bada badakop yit kin ne ni izit bá, ni nse anet awe, Anet-Isheshek me kin ne ni izit bá, iwu fɛ́ a yet Adakunom aza kaangan, na ba tere iyerek wu kaakyi izen! Anɔng.

⁶Da ayet fok, ifɛ́ Adakunom kpa na abap awo. Nek da ayet kaangan fɛ́ a ne ni izit aIsrela wu fɛ́ a yet atitup afi aIsrela awo.

⁷Da ayet kaangan fɛ́ a ne ni izit aIbrahim iwu fɛ́ a yet atitup arim aIbrahim awo, nek kucɛɛt ka fɛ́ Adakunom kin fɛ̀ ni aIbrahim ye, “Ayet ni irɔm aIshaku wu fɛ́ ba bi di fa izit ngɔn.”

⁸Idɔng tonong fok, da ayet ngma nnon fɛ́ ba sɛs ina ni irɔm fɛ́ na yet nnon Adakunom awo, tit na yɔng fɛ́ ba tes ina kpaf ti kushii fɛ́ Adakunom nye, fɛ́ na yet nnon aIbrahim.

⁹Nek ane wu fɛ́ ba kin nye kushii me, “Na kpaf ishining izen, in bi tin bɛ́s in, aSara bi tes nggon.”

¹⁰Ayet idɔng kyɛk awo, nek nnon aRebeka kin ne na ada azining, ada yit aIshaku.

¹¹Ngma na anɔng, na ba resek dang tes nafɛrɛs e, Adakunom kin fɛ̀ na aRebeka ye, “Ako me, bi ra a wosong e isam.” Anɔng e kin te ni iba resek dang ra ikyi ikak itek ki imaan e ayi. Adakunom kin cɛɛt anɔng, nɔng ayɔng fi iwu mi kasa ayɛt ite iyɛ wu, ni isot anɔng, da nek kutomong fɛ́ anet e me ra awo.

¹³Kyɔn ti i di se ni ijɛk ye, “Imi shim aYakub, imi ramin aIsuwa.”

¹⁴Akyɛ fi in da fɛ̀ kong ɛ? Adakunom ras ishɔt ishim ice yɛ? Koba!

¹⁵Nek Adakunom kin fɛ̀ na aMusa, “In da nye itek sak na ayɔng fi in da nye itek ni wu, in da fok angmishish ayɔng fi in da fok angmishish wu.”

¹⁶Nek anɔng, da ikasa me se nek kushim kɛ inye anet awe awo, tit itek fɛ́ Adakunom tonoso.

¹⁷Nek ifɛ̀ Adakunom kin fɛ̀ na aFirauna ye, “Imi kin da ta i sot agwɔm, nek ikyɛng deng, nɔng in bin di tonong kukyem hom naton ngɔn, nɔng ba bin di shara iyerek hom azatse ngma kusum.”

¹⁸Na anɔng, Adakunom nye itek sak na ayɔng fi iwu shim a da nye itek, na rosom iyɛ ayɔng fi iwu shim a rosom iyɛ wu.

¹⁹Nyɛng akak ayɛt yin di ki rip ye, “Wɛt akyɛ sak fɛ́ Adakunom rēn ki tsɛt yit mo ni inɛn ɛ? Nek angan kyem na rawu kushim wu yɛ?”

²⁰Awɛt ingɔn anet awe! Ngɔn yet angan fi i da bun Adakunom ni ifɛ̀ yɛ? Ikyɛng fɛ́ ba nye i da kyem ni ifɛ̀ na anet fɛ́ a nye ide ye, “Akyɛ sak fi i di nye anɔng ɛ?”

²¹Anet inok nadonong irɔp, a bi ízɔk fɛ́ a da bɔ ayɛt irɔp izining e na di nok nadonong nakak na fi kutomong izén-izén nɛ na ma nok nakak na fi kutomong akaakyi izen awɛ?

²²Won in fɛ̀ yit ke Adakunom shim a tonong naman wu, ni kukyem wu wɛshɛk. Ngma na anɔng, ayɛt kutsik akabɔk Adakunom, a nye kabɔk na bayɔng fɛ́ ba mi kyem naman wu na na di tik ni ba, na ma wey ni iba.

²³Anɔng wu fɛ́ Adakunom shim, a di tonong kutsik ízɔk wu na bayɔng fi iwu shim a ka ba tonong itek wu, bayɔng fi iwu man myak gyam nɔng ba bin sɛ ízɔk wu.

²⁴Iyit yet yit bayɔng fi iwu mi kasa me, ayet baYahuda kyɛk aziba awo, ngma ni Ícɛn-iduk bá.

²⁵Kyɔn tɛ fɛ́ Adakunom kin di fɛ̀ ni fumung aHosiya ye, “Bayɔng fɛ́ ba yet banet hom awo, in bi ka ba yes ‘banet hom;’ icɛ́n fi i tsang yet icek iyɛ hom awo, in da yes iye ‘icek iyɛ hom.’ ”

²⁶“I bi te ana, na akpaf arɔ fɛ́ ba kin di fɛ̀ ni ba ye, ‘Iyin yet yin banet hom awo,’ azɔng e, ba bi ka ba yes, ‘nnon Adakunom fɛ́ a yet atset.’ ”

²⁷AIshaya tos nek aIsrela, a fɛ̀, “Ngma ni kudot nnon aIsrela fɛ́ na se ti nzɛk anu izɛk, nkum bayɔng fɛ́ ba kyɛk, fɛ́ ba bi ka ba sheshek.

²⁸Nek Adakunom bi ra ngma kazatse ishɔt, vit ibeseng izen sak ni igang.”

²⁹Kyɔn tɛ fi aIshaya mi di cɛɛt ye, “Ke da nek aTisa Azɔk-Bazɔk kin di shemeng ice wu ija me awo, ki in mi sot yit tɛ aSodom ki in mi sot yit tɛ aGomora.”

³⁰Akyɛ fi in da fɛ̀ yit kong ɛ? Fok Ícɛn-iduk fi i tsang irade kusot kutabat, ba mi sɛ iko. Ba sɛ kusot kutabat e me, ni irèn inɔɔk atsak.

³¹Awɛt bafɛ́ aIsrela fɛ́ ba tsɛsɛk kusot kutabat ni irèn ikuus ntsi, da ba kyem ba sɛ iko awo.

³²Akyɛ sak anɔng ɛ? Nek ba di kuus irèn inɔɔk atsak awo, ba sok fok ba sɛs nek ntomong ice bá. Ba turuk kutak, “Ni kuta fi kusas ituu atak.”

³³Kyɔn ti i di se ni ijɛk, “Di yin, in mi sak kuta fi ku saas ituu atak na aSihiyona. Kuta fi ku ka ba saas ikpas, awɛt ngma ayɔng fɛ́ a nɔɔk atsak ni iwu, a bi sɔ nsum awo jɛm-jɛm.”