Read icen 1 BaKorinti 10 Bible Online

1 BaKorinti 10 - icen bible

1 BaKorinti 10

¹Ábaruneng, yɔkɔnɔng, in shim ni irēn yin tsɛngtsɛng nkyɔrɔk yɔng fi in kin te, fɛ́ anɔk kin te gyip badakop yit, ba kin tat izɛk isɛng naton ntong nkoot.

²Izen fɛ́ ba se na anɔk e ni izɛk e, itonong fok, ba ka ba ra abatisma ngma, ba te bafi ikuus aMusa.

³Ngma ba ba kin ya kuyak abik, kuri kuzining e.

⁴Ba kin tɛ ba sɔ ashi abik, kuri kuzining e. Nek ba sɔ ashi fɛ́ a ne ni Kuta abik, fi ku tseng gung ni iba. Kuta me yɔng yet Anet-Isheshek.

⁵Ngma ne anɔng, Adakunom fok nta na bakak bá awo, nek anɔng a ka ba fɛɛs natse.

⁶Nkyɔrɔk nang kin te anɔng, nɔng in da bin sot ikyɛng imɛɛs ni yit, kɔng in bi bɛ̀ yit iyɛ ngash iras nkyɔrɔk imaan e ti iba kin di ra.

⁷I bi ya yin nabannom ntong awo kyɔn tɛ bakak ba nye. Kyɔn ti i se ni jɛk ye, “Banet e sosok, na ba ya, na ba sɔ, ama me, na ba ras kujang.”

⁸In bi ra yit kujang awo kyɔn tɛ bakak ba nye, fɛ́ banet agup nsɔk nfaa ina taat ba kus kunom kuzining.

⁹In bi mara yit aKristi awo kyɔn tɛ bakak ba nye, fi i sak íhwyen kin ka ba fɛɛs mo.

¹⁰I bi ngɔɔt yit nanu awo kyɔn tɛ bakak ba nye, fɛ́ atomaza iwɛs banet, ka ba fɛɛs mo.

¹¹Nkyɔrɔk nang kin te anɔng, nɔng in da bin sot ikyɛng imɛɛs, ba kin te ni ijɛk nɔng ba bin di kɔrɔk yit mo kuto, iyit fi in se yit ni nnom igang azatse.

¹²Nek anɔng, ki ngɔn di fok ngɔn mi nyeseng gak, won ni nye yɛɛt, kɔn i bi kpa!

¹³Vit imara ikak fi imang ki sɛ yin, fi da imang sɛ banet awo. Adakunom yet afi ishining ifɛ̀ wu, a da won imara ikak ni ki kpa yin fi i da waat agap yin awo. Awɛt izen fi imara me ki bɛ́ yin, a da ki nɔɔk yin agap inyeseng yin gak, na ki tarak yin irèn ihwyet.

¹⁴Nek anɔng, iyin bacɛk iyɛ hom, sak yin ace yin yik-yik ni iya nabannom ntong.

¹⁵In tsin cɛɛt ni yin tɛ banet fɛ́ ba se tsɛngtsɛng, mara yin kucɛɛt hom ice yin, i da di yin.

¹⁶Katsereng izɔɔn katek fi in di tonoso yit ifeng, ayet iwu wu fɛ́ a ki sak yit in sot yit ikyɛng izining ayɛt nasok aKristi awɛ? AKpam fi in bushung yit, ayet iwu wu fɛ́ a ki sak yit in sot yit ikyɛng izining ni irɔm Anet-Isheshek awɛ?

¹⁷Nek akpam e yet azining, iyit fi in se yit dot, in yet yit kurɔm kuzining, nek ngma yit in ya yit ayɛt akpam azining e me.

¹⁸Yiring yin banet aIsrela. Bayɔng fɛ́ ba yas nayak inabak-akuce me, ba yet bayɔng fɛ́ ba ras kutomong ni kuta ashosh e awɛ?

¹⁹Iyin di yin fok nyeng in cɛɛt fok, kuyak nabak-akuce fɛ́ ba nabak nabannom e, ina na na yet ikyi ikak ɛ? Kɛ nabannom e ka ka ka yet ikyi ikak ɛ?

²⁰Awey yo! Ikyɛng fi in cɛɛt yet fok, nnang ashosh fɛ́ bafi nhwyi nasap, ba nasap itséng e, da Adakunom awo. Da imi shim ni imoon yin ifidang ni itséng awo.

²¹I da kyɛm i sɔ yin na katsereng izɔɔn Adakunom ni ti ni sɔ yin na fi itséng bà awo. I da kyɛm ni ya yin ne atebul Adakunom ni ti ya yin na fi itséng bà awo.

²²Kɛ iyit shim in sak yit aTisa na fok ifup ɛ? Kɛ iyit di yit ti in ku wat yit na agap ɛ?

²³“In bɛ̀ yit irēn ira kaakyi ikyɛng,” awɛt da kaakyi ikyɛng e de fi i se gyat awo. “In bɛ̀ yit irēn ira kaakyi ikyɛng,” awɛt da kaakyi ikyɛng e de fi i bɛ́ ni iya kashon awo.

²⁴Da akak bi daam ni ice wu kyɛk awo, tit na a daam na bakak bà.

²⁵Ya yin kaakyi kuri ikyɛng fɛ́ ba rɛs narɔ ijik inam, vit irisim, kɔng ayɛ yin bi se gak naton de.

²⁶Nek, “Kazatse yet ka fɛ́ aTisa, ni nkyɔrɔk fin in se ayɛt e ngma.”

²⁷Ke afi nhwyi akak ki rini yin iya nayak, ki i shim i tse yin, ya yin ngma kuri ikyɛng fɛ́ ba ki nɔɔk yin vit nrisim, kɔng ayɛ yin bi se gak naton de.

²⁸Awɛt ke akak bɛ́ a ki tak yin fok ye, “Ba mi tsang nabak nayak nang inabak-akuce sak na nabannom,” i bi ya yin ina awo, nek i di sɛ ayɔng fɛ́ a da tak e, nek kuyiring iyɛ,

²⁹nek kuyiring iyɛ wu fi in di cɛɛt da kufɔɔn awo. Ke nyɛng akak da kyem a rip fok, “Akyɛ sak fi kuyiring iyɛ akak da bi ízɔk naton hom ɛ?

³⁰Ki in ya nayak e ni ifeng, akyɛ sak fɛ́ da wey ni mi naton ikyɛng fi in mi di nɔk Adakunom ifeng ɛ?”

³¹Nek anɔng, ngma ikyɛng fi i se yin ne, kɛ na ayet kuyak, kɛ i sɔ ayi, nye yin ide sak iratek Adakunom.

³²I bi sak yin akak na kpa awo, kɛ na yet afɛ́ aYahuda, kɛ afɛ́ aGirik, kɛ afi ikuus Adakunom ayi.

³³Nye yin kyɔn ti imi di ras. In nye nyɛk ayɛt akaakyi ikyɛng itɛrɛk banet iyɛ, in tsɛsɛk itek ice hom awo, tit ifɛ́ bakak dot, nɔng ba bin sɛ isheshek.