Read icen 1 BaKorinti 12 Bible Online

1 BaKorinti 12 - icen bible

1 BaKorinti 12

¹Yɔkɔnɔng, ábaruneng, azaton nnang abik, imi shim ni i rēn yin.

²Iyin rēn yin fok, ni izen fi i kin yet yin bafi nhwyi, ba kin sɔ ice yin, ba kin ki kɔrɔk yin atse sak ikuus nabannom fɛ́ da na cɛɛt awo.

³Nek anɔng, in fɛ̀ ni yin fok, vit anet fɛ́ a cɛɛt ayɛt abik Adakunom fɛ́ a kyem a fɛ̀, “Tang aYeso anyas.” Vit ayɔng fɛ́ a da kyem a fɛ̀, “AYeso yet aTisa,” tit Kabik aJɛrɛ ka ku sɛ mo.

⁴Nnang abik di se zizɛɛt-zizɛɛt, awɛt Kabik kazining e ka ka nesek.

⁵Ntomong ira di se zizɛɛt-zizɛɛt, awɛt ba ras sak na aTisa azining e.

⁶Irèn iras ntomong se zizɛɛt, awɛt Adakunom azining e wu a nesek banet agap iras e ngma.

⁷Kabik Adakunom e tonoso ice ka sak na kaangan, nek itek banet ngma.

⁸Kabik e nɔɔk akak kutsitsɛng aBik, na Kabik kazining e nɔɔk akak kutsik irēn,

⁹na Kabik kazining e nɔɔk akak kunang inesek atsak, na Kabik kazining e nɔɔk akak kunang ites banet kyang.

¹⁰Na ka nɔɔk akak kukyem iras ntomong abes, na ka nɔɔk akak kukyem itaas ifɛ̀ Adakunom, na ka nɔɔk akak kukyem ikaas ndiri-ndiri nabik, na ka nɔɔk akak kukyem icɛɛt ayɛt alem zizɛɛt-zizɛɛt, na ka nɔɔk akak irēn tirisi alem e.[1]

¹¹Ngma nkyɔrɔk nang yet kutomong Kabik kazining e, iwu nesek kaangan kunang kpaf ti iwu di shim.

¹²Kurɔm anet awe se burang, ngma ni nkap zizɛɛt-zizɛɛt fi ku bɛ̀; ne ngma nkap dot fi ku bɛ́, ngma nsot kurɔm kuzining. Anet-Isheshek yɔng a se anɔng.

¹³Nek ngma yit ba kin ki ra yit abatisma ne[2] Kabik kazining sak ni kurɔm kuzining, ke ni i yet baYahuda kɛ bafɛ́ aGirik ayi, ke asam kɛ nnon ari ayi, ngma ba kin ki nɔɔk yit Kabik kazining e in sɔ yit.

¹⁴Fok yin, ba nye kurɔm na abak azining awo, tit nkap dot-dot.

¹⁵Ki kutak fi ku fɛ̀, “Nek da imi yet kubɔk awo, vit ikyɛng fi i di moon ni kurɔm,” kutak e da kyem ku tɛn ice ko ni kurɔm nek ikyɛng fi ku fɛ̀ awo.

¹⁶Ki kuto fi ku fɛ̀, “Nek da imi yet iyisi awo, vit ikyɛng fi i di moon kurɔm,” Kuto me da tɛn ice ko ni kurɔm nek ikyɛng fi ku fɛ̀ awo.

¹⁷Ki kurɔm kusum fi ku yet ayisi, ke anet e foos na akyɛ? Ki kurɔm kusum fi ku yet wɔn ato, ke anet foos nkɔn na akyɛ?

¹⁸Awɛt Adakunom saas nkap irɔm, kaa kungan ko kpaf narɔ fi iwu shim.

¹⁹Ke ngma nkap e fi in yet kukap kuzining kyɛk, ki kurɔm e se akyɛ?

²⁰Ti in da se, nkap dot-dot, awɛt kurɔm kuzining.

²¹Da iyisi da kyem i fɛ̀ ni kubɔk, “Imi da shim awo!” Kɛ ni ice fɛ̀ ni kutak, “Imi da shim awo!”

²²Akuce anɔng, nkap irɔm fi in se tɛ vit ina na agap, ina na ba kyem ba nye ikikak dang ina awo.

²³Nkap irɔm e fi in yɛrɛ yit kurat na, in nesek yit ina iratek gyet awo, nkap irɔm fɛ́ ba tonoso ina awo, ba berese ina gyatgyat awo,

²⁴nyɔng fɛ́ ba tonoso tsɛt anɔng awo. Awɛt Adakunom moon nkap irɔm e, a nɔɔk iratek sak ni nyɔng fi in bɛ̀ kurat,

²⁵kɔn ikaba bi se nate nkap irɔm e, tit kukap irɔm e kukaa gyerep kuyaa.

²⁶Ke abak akak tsin sɔ mgbang, ni nshɛrɛp nkap e sɔ mgbang gung ni iko; kɛ abak akak sɛ iratek, ni nshɛrɛp nkap e sɔ nta gung ni iko.

²⁷Yɔkɔnɔng iyin ba i yet yin kurɔm Anet-Isheshek, kaangan yin yet abak irɔm e.

²⁸Ayɛt itusung bafi ikuus, Adakunom tung kasa bakak ba sot batom aYeso, bafɛ́ afaa yet batan, bafɛ́ ataat yet bafi itees, nɛ bakak yet bafi ntomong abes, nɛ bakak yet bafi ites banet kyang, nɛ bakak yet bafi igbingding bakak, nɛ bakak yet bafi itonoso irèn itseng ni ntomong, nɛ bakak yet bafi icɛɛt ayɛt alem zizɛɛt-zizɛɛt.

²⁹Banet ngma kusum yet batom ɛ? Banet ngma kusum yet batan ɛ? Banet ngma kusum yet bafi itees ɛ? Banet ngma kusum ras ntomong abes ɛ?

³⁰Banet ngma kusum bɛ̀ kunang ites banet kyang ɛ? Banet ngma cɛɛt ayɛt alem zizɛɛt-zizɛɛt ɛ?[3] Banet ngma tirisi kucɛɛt-abes ɛ?

³¹Awɛt muu yin ice ayɛt itsɛsɛk nnang fi in wat. Yɔkɔnɔng in da ki tonong yin irèn fi idung se gyat.