Read icen 1 BaKorinti 13 Bible Online

1 BaKorinti 13 - icen bible

1 BaKorinti 13

¹Ki in fi in kyɛm in cɛɛt ni ilem banet nɛ bafɛ́ batomaza, awɛt vit imi ni ishim, in sot in se ti kutsɔm fi kuwɔng, kɛ tɛ ibing fi iwɔng kyɛk.

²Ki in fi in bɛ̀ ngma nnang itaas abes, kɛ ngma irēn nkyɔrɔk inɛt, kɛ ngma irēn nkyɔrɔk ayi, kɛ i bi inɔɔk atsak fi i da kyem i serek ahwyanang, awɛt da in bi ishim awo, in sot ikyi ikak awo.

³Ki in sok ngma ikyɛng fi in bɛ̀ in nɔɔk bakan, in ti nɔɔk kurɔm hom na ba shosh ni irong, awɛt vit imi ni ishim, in bi itek ikyi ikak awo.

⁴Ishim bɛ̀ akabɔk ni nhwyɛ. Ishim bi ifup awo, i bi itsot kugwɔm kɛ icɛshɛk ice awo.

⁵I bɛ́ kugbarak ice awo, i bɛ́ ishim ice awo, i bi namaan ziri awo, i bɛ́ tusung nkyɔrɔk imaan e ni iyɛ awo.

⁶Ishim fok nta iras nkyɔrɔk nmaane awo, tit ifoos nta iras atsak.

⁷Ishim bi te kawat ni izen mgbang awo, i bi nɔɔk atsak, i bi te iyɛ, i bi kabɔk na kaakyi ikyɛng.

⁸Ishim bi igang awo. Awɛt itaas-ibes bi gang, ncɛɛt ni ilem zizɛɛt bi te yuu, irērēn nkyɔrɔk bi gosok.

⁹Irēn yit mi shining awo, itaas ibes yit bà mi shining awo.

¹⁰Awɛt izen fi ishining e i bi bɛ́, idɔng fi ishining e awo bi te bit.

¹¹Ni izen fi in yet nggon, in cɛɛt ti nggon, in yiring ti nggon, in tɔrɔng nkyɔrɔk ti nggon. Awɛt izen fi in sot anet, in wobok nggɔn kuri nfi nnon.

¹²Nek yɔkɔnɔng in yɛrɛ yit nawu yit ni ikyɛng iyɛrɛ na se hwyi, awɛt atuk e yɔng in bi yɛrɛ yit ayisi na ayisi. Yɔkɔnɔng irēn hom mi ishining awo, awɛt atuk e yɔng in bi rēn wɛshɛk irēn fɛ́ Adakunom di rēn mo.

¹³Yɔkɔnɔng nkyɔrɔk ntaat na in di ki nak; inɔɔk atsak, ni ite iyɛ, ni ishim, awɛt iyɔng fi idung waat yet ishim.