Read icen 1 BaKorinti 14 Bible Online

1 BaKorinti 14 - icen bible

1 BaKorinti 14

¹Nye yin nyɛk itsɛsɛk ishim ni iyɛ ngas nnang abik, imakmak e kunang itak ibes.

²Nek anet fɛ́ a cɛɛt ni ilem iduk, a cɛɛt ne banet awo, tit a cɛɛt ne Adakunom wu. Nek vit anet fɛ́ a rēn ikyɛng fɛ́ a cɛɛt, nek a cɛɛt nkyɔrɔk yɔng fi i se ni nɛt ayɛt kukyem Kabik.

³Awɛt ayɔng fɛ́ a taas ibes, a cɛɛt ne banet wu nek i ka ba gbinding, ni ka ba barang mo agap, ni nok imen iyɛ.

⁴Anet yɔng fɛ́ a cɛɛt ni ilem iduk, a tsin ban nok ice wu wu, awɛt ayɔng fɛ́ a taas ibes, a tsin nok bafi ikuus ngma.

⁵Imi shim kaangan na cɛɛt ni ilem iduk, awɛt in dung shim ki itaas yin ibes ningya. Ayɔng fɛ́ a taas ibes a nat ayɔng fɛ́ a cɛɛt ni ilem iduk, nek tit ma akak tirisi ifɛ̀ me ninyen, bafi ikuus da ne ba sɛ inok.

⁶Di yin ábaruneng, ki in bɛ́ ni in ma cɛɛt ni yin ni ilem iduk, wat itek e yet akyɛ? Tit in ki bɛ́ yin ni itarak ice naton Adakunom, kɛ irēn, kɛ ibes, kɛ itees ikak ayi.

⁷Kyɔn ti nkyɔrɔk yɔng fin in bi kutset awo fi in wɔng, ti ihwyɛrɛ ni izom, ki ntɔ me wuruk yɛɛt awo, ne anɛ fɛ́ akak da kyem a rēn ikyɛng fɛ́ ba fɛsɛm kɛ ba tsot ɛ?

⁸Nek ke da ba fɛɛp igba yɛɛt nɔng banet da rēn awo, angan da ka na nye nek itsom ɛ?

⁹I se kpaf anɔng ni yin. Ke icɛɛt yin ni ilem iduk fɛ́ vit akak fɛ́ a kyem a rēn, ne anɛ fɛ́ akak da kyem a rēn ikyɛng fi icɛɛt yin ɛ? I sot icɛɛt yin ni wun kyɛk.

¹⁰Icɛ́n di se zizɛɛt-zizɛɛt na azatse kang, kaakyi icɛn ba kyem ba rēn ikyɛng fi icɛɛt.

¹¹Nek ki da in kyem in rēn ikyɛng fɛ́ akak se ni cɛɛt e awo, i sot in sot atsen sak ni iwu yɔng, iwu tɛ a sot atsen sak ni imi bà.

¹²I se kpaf anɔng ni yin. Kyɔn tɛ fi i bɛ̀ yin iyɛ ngash itsɛt yin nnang abik, nye yin nyɛk itsɛsɛk yin nnang abik fi in wat, fi in da bɛ́s ni inok bafi ikuus.

¹³Nek anɔng, ngma ayɔng fɛ́ a cɛɛt ni ilem iduk, na ra awon na ba ku nɔɔk kunang tirisi me.

¹⁴Nek ki in ra awon ni ilem iduk, i yet kabik hom ka ka tsin ra awon e, awɛt kuyiring hom sɛ ikyi ikak awo.

¹⁵Nek anɔng akyɛ yet ikyɛng a ra yɛ? In da ra awon ne kabik hom, awɛt ngma ne kuyiring hom bà. In da ra abom na kabik hom, awɛt ngma ne kuyiring hom bà.

¹⁶Nek ki ngɔn feng Adakunom ne kabik ngɔn kyɛk, ne anɛ fɛ́ ayɔng fɛ́ a se nate yin fɛ́ da a rēn ilem iduk e da shiwu ye, “Anɔng” ni ifeng fi i se ne, fi iwu rēn ikyi ikak naton e awo yɛ?

¹⁷Awon ifeng ngɔn sak ne Adakunom e se yɛɛt akabes, awɛt ayɔng e sɛ ibarang ikyi ikak awo.

¹⁸In tere Adakunom nek in kyem in cɛɛt ni ilem iduk aza kaangan yin.

¹⁹Awɛt ngma ne anɔng ni itusung bafi ikuus, in wat shim in tak itin ifɛ̀ itoon fi in da tees bakak, azaton itak itin ifɛ̀ agup kusok ni ilem iduk.

²⁰Ábaruneng, i bi ya yin kashon ni kuyiring ti nnon awo. Sot yin ti nnon na kabak anyas, awɛt won kuyiring yin ni kusot tɛ anet ako.

²¹I se ni Kufumung Adakunom fok, “ATisa fɛ̀, ‘In bi cɛɛt ne banet hom ni irén bafi ilem iduk, in bi tin cɛɛt ni ba ni ilem batsen, ngma ne anɔng, da ba di fok awo.’ ”

²²Nek anɔng, kucɛɛt ni ilem iduk yet ikyɛng idi nek bafi ikuus awo, tit bayɔng fɛ́ da ba yet bafi ikuus awo. Awɛt itak ibes, yet nek bafi ikuus, da nek bayɔng fɛ́ da ba yet bafi ikuus awo.

²³Nek anɔng, ke ngma bafi ikuus ka na tusung ngma kusum, na kaangan tsin cɛɛt ni ilem iduk, nɛ bakak fɛ́ da ba rēn ikyɛng fɛ́ ba se ne awo, kɛ bayɔng fɛ́ da ba yet bafi ikuus awo nɔ, iyin di yin, ba da fɛ̀ iririm yin awɛ?

²⁴Awɛt ke afi nhwyi ke ayɔng fɛ́ a shim a rēn ayi nɔ a ki sɛ yin na kaangan tsin taas ibes, a da di kurat wu, ni ishɔt ku mes naton ikyɛng fɛ́ a fok,

²⁵ba tsin taas ikyɛng fɛ́ a mi nɛt ni iyɛ, na anɔng wu a da men pak ayisi aben, na nye, “Na tsak e, Adakunom se nate yin!”

²⁶Ábaruneng, akyɛ fi in da fɛ̀ kong ɛ? Izen fi i nyim yin, won akak yin na ra abom, akak itees, akak itak ikyɛng fɛ́ Adakunom ku tonong e, akak icɛɛt ni ilem iduk, akak tirisi me. Won nkyɔrɔk nang ngma ni sot nek inok bafi ikuus ngma.

²⁷Ke akak da cɛɛt ni ilem iduk, won da ba bi nat banet bafaa kɛ bataat awo, na ba cɛɛt bazizining, na akak na tirisi.

²⁸Ke vit anet itirisi me, won anet icɛɛt ni ilem iduk e me na te yuu ayɛt i nyim bá me. Won na cɛɛt ni ice wu nɛ Adakunom wu kyɛk.

²⁹Won banet bafaa kɛ bataat na ba tak ibes, na bakak ba mara ikyɛng fɛ́ ba taas.

³⁰Awɛt ke Adakunom tonong akak fɛ́ a se ni sonong ikyi ikak, won ayɔng fɛ́ a tsin cɛɛt e na nyeseng ninyen.

³¹Ngma yin i da kyem i tak yin ibes bazizining, na kaangan sɛ itees ni ibarang agap.

³²Kabik inang ibes se ni bɔk batan.

³³Nek Adakunom da a yet Adakunom iras nkyɔrɔk kpɛɛ awo, tit ayɛt kusonong kukyang. Ti i se ni tusung bafɛ́ ajɛrɛ ngma,

³⁴won banyining na ba sot yuu ni tusung bafi ikuus. Nek da ba ka ba nang kawat cɛɛt awo, tit na ba nabak ice, kyɔn ti i di se ni jɛk ni fumung Ntsi.

³⁵Ke ba shim ba rip ikyi ikak, won na ba risim batek ari bá na nasa bá. Nek i yet ikyɛng nsum abining na cɛɛt ayɛt itusung bafi ikuus.

³⁶Ni ice yin wu fi ifɛ̀ Adakunom di tumung ɛ? Kɛ nkum ni yin kyɛk fi ifɛ̀ me ta yɛ?

³⁷Ke akak di fok iwu yet atan, kɛ a bɛ̀ kunang abik, won na a rēn fok, ikyɛng deng fi in tsin ki jɛk yin e yet agbat ifɛ̀ aTisa.

³⁸Awɛt ke akak a rawu dang tot agbat ifɛ̀ me deng, iwu ma ba bi ku rawu bà.

³⁹Nek anɔng, ábaruneng hom, bɛ̀ yin iyɛ ngas itak ibes, i bi ro yin ne ni cɛɛt ni ilem iduk awo.

⁴⁰Tit na ba nye kaakyi ikyɛng ni irèn fi i se kpaf, i tseng yɛɛt.