Read icen 1 BaKorinti 4 Bible Online

1 BaKorinti 4 - icen bible

1 BaKorinti 4

¹Nek anɔng, i se gyat banet ki sok yit, tɛ bafi kutomong Anet-Isheshek, tɛ bayɔng fɛ́ Adakunom mi ka ba nɔk itot nkyɔrɔk Adakunom fi in kin se ni nɛt.

²Ikyɛng fɛ́ ba shim bayɔng fɛ́ ba mi ka ba nɔk itot nkyɔrɔk e nang, na ba sot banet atsak.

³Awɛt a di yet imi ikyikak awo ki iyin di tsɛt yin ishɔt kyɔn tɛ bafi ishɔt azatse di ras, imi da ra ice hom ishɔt awo.

⁴Nek kuyiring in se halal, ngma na anɔng, i sot fok in se dun inɛn awo. ATisa wu a yet agwɔm ishɔt in.

⁵Nek anɔng, i bi tsɛɛt yin ikikak ishɔt ni izen e resek awo; tot yin ma aTisa a bɛ́s wu ninyen. Iwu wu bi tun wɛshɛk ikyɛng fi ahwyi nɛt, a bi tarak ikyɛng fɛ́ banet nɛsɛk na áyɛ ba. Ni izen e yɔng wu, banet bi sɛs itere bà na Adakunom.

⁶Ábaruneng, in bɛ́ ni kucɛɛt kang naton ice min nɛ Apolos nek iyin, nɔng iyin da sɛ yin ikyɛng imɛɛs ni cɛɛt e, “I bi shorop yin ikyɛng fi i se ni jɛk awo.” Kɔng i bi tsot kugwɔm naton akak aza akak.

⁷Angan da te, i wat bakak ɛ? Akyɛ fi bɛ̀, fɛ́ da Adakunom wu a da nɔɔk awɛ? Ki i se anɔng, akyɛ da saas tsot kugwɔm ti kunang fɛ́ ba da nye ne awɛ?

⁸I di yin ti i mi sɛ yin kaakyɛ! I mi te yin barúm! I mi sot yin bágwɔm akɔn in dang iyit! Ki ifi yet fok i yet yin bágwɔm na atsak e, kin in bin di ya yit igwɔm e ngma!

⁹Nek a di se imi, tɛ Adakunom mi sak iyit batom-aYeso ni in sot yit bayɔng fɛ́ ba da ne ama, tɛ bayɔng fi ishɔt mi ka ba ya fɛ́ ba da fɛɛs ashon banet. In mi sot yit ikyɛng iyɛrɛ azatse ngma nɛ sak na batomaza ne banet bà.

¹⁰In mi sot yit áshɔp nek Anet-Isheshek, awɛt iyin yet yin batsitsɛng ayɛt Anet-Isheshek! Iyit mi te yit gbɛrɛk, awɛt iyin te yin agap! Ba ki nesek yin iyin iratek, awɛt na ba ki byɛs yit iyit!

¹¹Sak atut ana, in yɔng in rēn ya yit nzong ni in foos yit iyɛ ingash, in yɔng in rēn tsees yit na agyɛt áres, ba ki foos yit nrɔm ni itosok yit, vit iyit na nasa.

¹²In nye nyɛk yit ntomong ni mbɔk yit. Ba ki nyes yit itok, ni iyit ka ba tes awɛng; ba ki nesek yit mgbang, ni in tsesek yit;

¹³ba ki nyes yit mbɔɔs, ni iyit ka ba bushung yit kucɛɛt yɛlɛl. Sak atut ana, iyit mi sot tɛ karɔ ikorok arik azatse, ikyɛng fɛ́ kazatse byɛn.

¹⁴Da imi tsin ki jɛk yin nkyɔrɔk nang, nek in ki te yin nsum awo, tit nek in ki kɔrɔk yin kuto, ti icɛk iyɛ ni nnon hom.

¹⁵Ngma ne banek agup kusɔk fi bɛ̀ yin ni kufiri yin ne Anet-Isheshek, i bɛ̀ yin bada dot awo, ayit kufiri yin ne Anet-Isheshek, imi sot ada yin mok kufiri ne Anet-Isheshek aYeso ni ifɛ̀ itek deng.

¹⁶Nek anɔng wu fi in di fɛ̀ ni iyin, di mɛɛs yin mo.

¹⁷Nek anɔng wu fi in tsin ki tom yin mo aTimoti, ari hom ayɔng fi in shim makiyi, afɛ́ atsak ayɛt aTisa. Iwu da ki yiring yin mo kuri nse fi in bɛ̀ ni kufiri hom ne Anet-Isheshek aYeso, fi ku se kpaf ni itees fi in tees ngma ni itusung bafi ikuus fi in di tse.

¹⁸Bakak ayɛt yin kok ice, ti imi bi tin bɛ́ azɔng awo.

¹⁹Awɛt imi yɔng in bɛ́ bakat ibɛ́, ni kushim aTisa, nɔng in da bin fok ncɛɛt fɛ́ ba cɛɛt, ni kukyem fɛ́ ba bɛ̀.

²⁰Nek igwɔm Adakunom yet kudot icɛɛt awo tit kukyem.

²¹Akyɛ fi iyin kasa yin ɛ? In ki bɛ́ yin na ahwyereng a kɛ in ki bɛ̀ yin ni ishim nɛ kabik kayɛlɛl e yɛ?