Read icen 1 BaKorinti 8 Bible Online

1 BaKorinti 8 - icen bible

1 BaKorinti 8

¹Yɔkɔnɔng, naton kucɛɛt nayak fɛ́ ba nabak inabak-akuce sak ne nabannom: Iyit rēn yin fok ngma yit in bɛ̀ yit irēn. Irēn bɛ́ ni kok ice, awɛt ishim bɛ́ ni inok.

²Ngma ayɔng fɛ́ a di fok iwu rēn ikyi ikak, idɔng tonong fok a rēn resek dang rēn ikyɛng fi i se yɛɛt na a rēn e.

³Awɛt ngma ayɔng fɛ́ a shim Adakunom, Adakunom rēn ni iwu.

⁴Yɔkɔnɔng naton kucɛɛt iya nayak fɛ́ ba nabak inabak-akuce sak na nabannom e: Iyit rēn yit fok, na azatse ngma kusum, nabannom na yet ikyi ikak awo, in ti rēn yit fok Adakunom yet azining kyɛk, vit akak ama wu.

⁵Ngma ne fɛ́ bakak nye fok nabannom di se, kɛ nazanɛn kɛ na azatse ayi (na atsak e, “nabannom” e nɛ naban na “atisa” me, na di se dot),

⁶ngma ne anɔng, iyit rēn yit fok, Adakunom yet azining kyɛk. Iwu wu a yet Ada fi nkyɔrɔk ngma ne ni wu, ni in se yit ni kusot nek iwu. In ti bɛ̀ yit aTisa azining kyɛk, iwu yet aYeso Kristi. I yet ni wu wu fi nkyɔrɔk ngma in ne, ni wu bà fi in di se yit ni kutset.

⁷Awɛt da kaangan wu a rēn ne anɔng awo. Sak atut ana, banet bakak fɛ́ ba mi tsang di mɛɛ ni nggɔn ikuus nabannom, nizen fɛ́ ba ya kuri nayak e yɔng, na ba yiring fok ba mi tsang di nye inabak-akuce sak na nabannom e. Nek kuyiring bá rēn yet kufi nnon, ni i ka ba yet kudaam.

⁸Awɛt nayak kyem na tse ni yit bakak ne Adakunom awo, na da ki kyɛk yit ikyikak ke na ki barang yit mo awo.

⁹Ngma na anɔng, nye yin nhwyɛ kɔng ishim itonoso atsak yin bi sot kuta ikpas sak na bayɔng fɛ́ ba se vit agap awo.

¹⁰Nek ke azining ayɛt bayɔng fɛ́ ba se vit agap da di ngɔn fi ibɛ irēn e ni tsin yas nitu iya nabannom ntong, ngɔn di, i da bang ka ba nɔk agap na ba kpa yas nayak fɛ́ ba nasap-akuce sak na nabannom awɛ?

¹¹Na anɔng, na aruneng agbɛrɛk yong fɛ́ Anet-Isheshek ku nek iwu, wat na beseng nek irēn ngɔn.

¹²Ki inyes yin barunyining anɛn anɔng, ni ka ba sas yin ndaam ayɛt áyɛ bá fɛ́ a se vit agap, aKristi wu fi i tsin ku ras yin inɛn.

¹³Nek anɔng, ki ikyɛng fi in da ya, da sak aruneng na a kpa ni inɛn, i da tin ya inam awo, kɔng in bi ku sak na kpa.