Read icen 2 BaKorinti 3 Bible Online

2 BaKorinti 3 - icen bible

2 BaKorinti 3

¹In da kpa yit itere yit ice yit kong ɛ? Ke in da kpa tsɛsɛk yit afumung itere ni yin, ke ni iyit ki nesek yin afumung itere kyɔn tɛ bakak di ras ɛ?

²Iyin ace yin, i yet yit afumung itere yit, fɛ́ ba mi jɛk na ayɛ yit, fɛ́ ngma banet da rēn na ba fa.

³Iyin mi tonong yin wɛshɛk fok iyin yet yin afumung fɛ́ a ne na Anet-Isheshek fɛ́ a yet kutomong fi in ra yit, ayɔng fɛ́ da ba jɛk na name ijɛk awo tit ayɔng fɛ́ ba jɛk na Kabik Adakunom afi kutset, ayɔng fɛ́ da ba jɛk naton afak ata awo tit ayɔng fɛ́ ba jɛk ina na ayɛ banet awe.

⁴In cɛɛt yit anɔng, nek agap iyɛ fɛ́ Adakunom ki nesek yit ayɛt aKristi.

⁵Vit iyit ni ikyɛng fi i da tonong fok in nye yit anɔng na agap ice yit tit in ses yit kukyem yit na Adakunom,

⁶iwu fɛ́ a ki nɔɔk yit kukyem isot banet itomong kushi kufas, bafi ntsi ijɛk awo tit bafɛ́ abik. Nek ntsi fɛ́ ba jɛk ina fi in bɛ̀ ni iku awɛt Kabik ka ka bɛ̀ ni kutset.

⁷Ke anet itomong iku, fɛ́ ba kin ta naton afak ata, kyem a bɛ́ ni mgbey Adakunom naton aMusa fi i sak nnon aIsrela kyem na yɛrɛ ayisi wu awo, kuri mgbey yɔng fi in bi nkum,

⁸wat iyin di yin tɛ kutomong abik fi mgbey na se gyet awo bi wat kufi ntsi ijɛk awɛ?

⁹Ki izen ntsi ijɛk kin bɛ̀ mgbey anɔng, ni iku ma ya banet ni ishɔt; kutomong abik fi ku wat mgbey ye yɔng, nek ku bi sas banet kusot kutabat ashon Adakunom.

¹⁰Nek ki ikyɛng fi i man ni i bɛ̀ mgbey, mi sot idɔng fi i se vit mgbey hwyiri-hwyiri, nek mgbey ikak fi i wat idɔng mi bɛ́.

¹¹Nek ki kushii fi ku nye shuut kin bɛ̀ ni mgbey anɔng, awɛt kushi fi ku mi bɛ wat kushi kuyɔng fi ku tsin te shuut, ni mgbey makiyi.

¹²Nek anɔng, fi in bɛ̀ yit ite iyɛ anɔng, fi in di cɛɛt yit na agap iyɛ,

¹³da kuri ifɛ́ aMusa fɛ́ a kin fam ayisi wu ni icɛk ikpin kɔn nnon aIsrela bi yɛrɛ igang mgbey e fi i tseng sak igang awo.

¹⁴Awɛt ayɛ bà kin se kashalang, fi ite sak atut, ke ba tsin fa kushi kuzen e, na ba rēn yɛrɛ icɛk ikpin e rēn resek mo, nek kukyem itun icɛk ikpin e nes na Anet-Isheshek kyɛk.

¹⁵Nkum izen e yɔng sak atut, ki ba tsin fa ijɛk aMusa, ni icɛk ikpin e ka ba nye gyip ayɛ.

¹⁶Izen fɛ́ anet tirik sak na aTisa, na ba tun icɛk ikpin e.

¹⁷Kɔ di yin, aTisa wu fɛ́ a yet Kabik e, karɔ fɛ́ Kabik aTisa di se, kaakyi ikyɛng se washak.

¹⁸Ngma yit fɛ́ ba mi ki tun yit icek ikpin na ayisi, in yɛrɛ yit mgbey aTisa, a tsin ki shesheng yit ni nse aTisa ni mgbey wu di barasa ni iyit na ayɛ yit, kashon sak kashon, fɛ́ a yet Kabik e.